تەڤگەرا جڤاکا دیمۆکراتیک (تەڤ-دەم) داخوازا دیسا دەستپێکرنا دیالۆگا کوردی-کوردی کر کو ئەڤ دەمەک بوو ھاتیە راوەستاندن.
تەڤ-دەمێ ب داخویانیەکا نڤیسکی بانگا دیالۆگا کوردی-کوردی کر و دبێژیت کو رەوشا ل باشوورێ کوردستانێ باندۆرەکا نەرێنی ل سەر پارچەیێن دی یێن کوردستانێ چێکر و دیالۆگا کوردی-کوردی باجا وێ ددەت کو خوەستەکا نشتیمانی و گەلێری یە.
د داخویانیا خوە دا تەڤ-دەمێ دیار کر کو ترکیێ دژایەتیا کوردان دکەت و دخوازیت دۆزا کوردی بێخیتە بن دەستێ خوە و یەکیتیا کوردان تێک بدە.ت
تەڤ-دەم دبێژیت: “ھەر کەس ئێدی ژ مەترسییا پێڤاژۆیا ھەیی یا کو کوردستان تێدا دەرباس دبیت، تێگەھشتیە. ترکیێ ھەموو گرانیا خوە دایە داگیرکرنا کوردستانێ و رێگرتنا ل بەر پێشکەتنێن کوردان. دۆزا کورد بوویە مژارەکا سەرەکی د ناڤەندێن ناڤنەتەوی دا، ترکیا ژ ڤێ یەکێ دترسیت. ژ بەر ڤێ یەکێ ھەموو رێبازان بکار دئینیت دا کو شەرەکێ ناڤخوەیی د ناڤبەرا کوردان دا بقەومیت.”
د ھەمان دەمێ دا تەڤ-دەم ئاشکەرا دکەت کو گرینگە دیالۆگا کوردی-کوردی ژ بۆ یەکرێزیا لایەنان ب رەنگەکێ بەرپرسیارانە بهێتە کرن و ھەموو دەستکەفت بێنە پاراستن.
تەڤ-دەم ھەروھا دبێژیت: “حەساسیەتا پێڤاژۆیێ، گرنگی و بەرپرسیارتیا دیالۆگا کوردی-کوردی و یەکبوونا کوردی و پاراستنا دەستکەفتیان ل مە فەرز دکەت.”
د داخویانیێ دا ھاتیە خواستن کو کۆنگرەیەکا نشتیمانی-کوردستانی بهێتە سازکرن و رێ ل بەر شەرێ برایەتیێ د ناڤبەرا لایەنێن کوردستانی دا بهێتە گرتن و ھاتە گۆتن: “ئەم وەک تەڤ-دەم بانگ ل گەلێ خوە و هەموو ھێزێن نشتیمانی یێن کوردستانی و هەموو بەشێن جڤاکا سڤیل دکەین کو ژ پیلانێن کۆمپلۆگەر “مۆئامەرە” ھشیار بن و خوەدی ھەلوەستەک نەتەوی بن دا کو رێ ل بەر شەرێ براکوژیێ بگرن. ئەم ب دیالۆگا نەتەوی یا کوردستانی ڤە گرێدایی بین و ب لەز کۆنگرەیەکا نشتیمانی یا کوردستانێ بهێتە سازکرن.”
