په‌كه‌كێ گومان ژ سازیێن ئێمناهییا سلێمانیێ هه‌یه‌ كادرێ وێ راده‌ستی میتێ كربیت

په‌كه‌كه‌ ب گومانه‌ كو سازیێن ئێمناهییا سلێمانیێ ئالیكارییا میتێ كربه‌

سازییا هه‌والگیرییا تركیێ، كادره‌كێ پارتییا كاركه‌رێن كوردستانێ کو ئەندامێ «یەکینەیێن جوانێن شۆرەشگەر» بوو د خانییەکێ تایبەت ب میتێ ڤە ل سلێمانیێ هات دەستەسەر کرن.

چاڤکانیێن پێگەها دارکا مازی ل باشوورێ کوردستانێ راگهاند، سازییا هه‌والگیرییا ترکیێ “میت”ێ ل رۆژا 22/10/2020ان، كادره‌كێ پەکەکێ ب ناڤێ «فەرهاد یووسف تەکینەر» ب کۆد ناڤێ «فورات بۆتان» كو ئەندامێ «یەکینەیێن جوانێن شۆرەشگەر» یا گرێدای په‌كه‌كێ یه‌، د خانیەکی تایبەت ب میتێ ڤە ل تاخا کارێزە وشک ل باژارێ سلێمانیێ دەستەسەر کر و ژ بۆ ترکیێ هات ڤەگوهاستن.

ل گۆر زانیاریێن د دەست پێگەها مە دا، «فەرهاد یوسف تەکینەر»، بەرپرس بوویە ژ دانینا بۆمبەیان و تەقاندنا 2 ئۆتۆبیسێن لەشکه‌رێ ترکیێ ل سالا 2016ان ل باژارێ قەیسەریێ یێ ترکیێ کو ئه‌ڤ یێك ببوو سەدەما کوشتنا 15 لەشکەران و برینداربوونا 54 لەشکەرێن دن.

 پشتی ئەنجامدانا کارێ تەقینێ فەرهاد بازدایە و دەرباسی باشوورێ کوردستانێ بوویە، فەرهاد ل باشوورێ کوردستانێ ل مەخموورێ، هەولێر، کەرکووک و سلێمانیێ ژیایە.

چاڤکانیێن پێگەها دارکا مازی هەر وەها ئەشکەرە کر، هه‌والگیرییا ترکیێ ب رێیا دەستەسەرکرنا ئەندامەکی «یەکینەیێن جوانێن شۆرەشگەر» ب ناڤێ «ئەرهان گارزان» ل باژارێ ئامه‌دێ کو دبیته‌ هەڤالەکی نێزیك یێ «فەرهاد»، زانیاری ل سەر وی ب دەست خوە خستینە، هەر وەها باڤێ «فەرهاد» چەند جاران ل دادگەهێ ئاماژە ب ڤێ یەکێ کریە کو کورێ وی ل سلێمانیێ یه‌.

ئەڤ یەک د دەمەکی دە یە کو هەیا نها پەکەکە پشت راست نەبوویە كانێ سازیێن ئەولەهیێ یێن باژارێ سلێمانیێ دەست د گەل میتا ترکیێ دە هه‌بوونە ژ بۆ دەستەسەرکرنا «فەرهاد»، یان ژی میتێ «فەرهاد» ب رێیا ئەرهان گارزان و باڤێ وی رازی کرییە كو خوە د چارچووڤه‌یا یاسایا «خوە رادەستکرنا تەرۆریستان» دا تەسلیمی ترکیێ بکەت داکو سزایا وی وەرە سڤک کرن.