جه‌نازه‌یێ پارێزگه‌رێ كۆچكری یێ هه‌ولێرێ گه‌هشت باشوورێ وه‌لات
جه‌نازه‌یێ د. فه‌رسه‌ت سۆفی پارێزگه‌رێ كۆچ كری یێ پایته‌ختا باشوورێ كوردستانێ ئیرۆ ژ ئه‌نقه‌ره‌یێ ژ بۆ هه‌ولێرێ هات برێكرن، و به‌ریا ده‌مه‌كی گه‌هشت باله‌فرخانه‌یا هه‌ولێرێ ژ بۆ كو ل ور ب ئاخێ بێ سپارتن.
ئیرۆ رۆژا پێنجشه‌می 19/11/2020ان، جه‌نازه‌یێ پارێزگه‌رێ كۆچ كری یێ هه‌ولێرێ، ژ ئەنقەرە یا پایتەختا ترکیێ ڤە بۆ ھەولێرا پایتەختا ھەرێما کوردستانێ ھات برێکرن، به‌ریا ده‌مه‌كی گه‌هشت بالافرخانەیا ناڤدەولەتییا ھەولێرێ كو ل ور ب مەراسیمەکە فەرمی پێشوازی ل تەرمێ فه‌رسەت سۆفی تێ کرن و پشتره دێ ل گۆرستانا شێخ ئەحمەد یا باژارێ ھەولێرێ ب ئاخێ بێ سپارتن.
ل بالافرخانەیا ناڤدەولەتیا ھەولێرێ ب مەراسیمەکە فەرمی پێشوازی ل تەرمێ د. فه‌رسەت سۆفی تێ کرن، د مەراسیمێ دە سەرۆکێ ھەرێما کوردستانێ، نێچیرڤان بارزانی، سەرۆکا پارلمه‌نا کوردستانێ، د. رێواز فایەق، جیگرێ سەرۆکوەزیرێ کوردستانێ قوباد تالەبانی و ھەژمارەک بەرپرسێن دن یێن حکوومەتێ و پارتیێن سیاسی ئاماده بوونه.
پاش مه‌راسیمێ، تەرمێ پارێزگارێ ھەولێرێ یێ کۆچکری دێ ل گۆرستانا شێخ ئەحمەد ل باژارێ ھەولێرێ ب ئاخێ بێ سپارتن.
هێژایی گۆتنێ یه، د. فه‌رسه‌ت سۆفی پاش كو ل رۆژا 20 مه‌ها رابووری ب ڤیرۆسا کۆرۆنایێ (كۆڤید-19) كه‌تی، دوهـ رۆژا چارشه‌می 18/11/2020ان، کۆچا داویێ کر.
فه‌رسەت سۆفی نامزەتێ پارتیا دەمۆکراتا کوردستانێ بوو د 12ێ ئیلۆنا 2019ان دا وەکە پارێزگارێ ھەولێرێ ھاتبوو ھلبژارتن.
گه‌لێ باشوورێ كوردستانێ، رۆشه‌نبیر، نڤیسكار رێخستن و كه‌ساتیێن سیاسی خه‌مگینییا خوه ب وه‌فاتا فه‌رسه‌ت سۆفی دیار كرنه، د سۆسیال مه‌دیایێ ژی ده ژ ده‌ستدایینا وی ب خه‌ساره‌ته‌كه مه‌زن هاتییه حه‌ساب كرن.
هه‌موه‌خت سه‌رۆكاتیێن هه‌رێما باشوور به‌یانامه‌یێن سه‌رساخیێ پارڤه كرن و تێده خه‌مگینی ب ژده‌ست دایینا پارێزگارێ پایته‌ختێ نیشان دانه.
