کوردێن باکور ل پێش پەرلەمانێ کوردستانێ ل دژی پەکەکێ داخویانی دان

کوردێن باکور ل پێش پەرلەمانێ کوردستانێ ل دژی پەکەکێ داخویانی دان

شاندەک ژ باکورێ کوردستانێ ل سەر ناڤێ 500 رەوشەنبیر، نڤیسکار و وەلاتیان ل پێش پەرلەمانێ ھەرێما کوردستانێ داخوویانی دان و کریارێن پەکەکێ یێن ل دژی سەروەریا کوردستانێ رەخنەکرن. سەر ناڤێ شاندێ ژ رەوشەنبیران ئازاد ئاکگول، ئیبراھیم گوچلو، ئەحمەد ئاجار و ئال بوران داخوویانی دان.

د داخوویانیێ دا ھاتە گۆتن کو، “پشتی ئێریشا پەکەکێ ل دژی پێشمەرگەیان رەوش ل ھەرێما فیدرال یا کوردستانێ گەهشتە قۆناخەکا مەترسیدارتر. لەوما ژی دڤێت ھەلوەست ل دژی پەکەکێ بهێنە وەرگرتن. ئەم ژی ڤێ یەکێ دکەین.”

ناڤەرۆکا داخوویانیێ ب ڤی رەنگی یە:

“وەک دهێتە زانین پشتی شەرێ کەنداڤێ، بەشەکی مەزنێ باشوورێ کوردستانێ ب هاریکاریا ئەمریکا وەک ھەرێمەکا ئازاد ھاتە راگەهاندن.

ھەر چار دەولەتێن کۆلۆنیالیست ژی، دترسییان کو کوردستان دێ بیتە دەولەت. ژ بەر ڤێ یەکێ ژی دخواستن کو دەستوەردانا باشوورێ کوردستانێ بکەن، لێ ژ ئەمەریکایێ ژی دترسییان. چار دەولەتێن کۆلۆنیالیست ب ریا پەکەکێ دەست ب ئێریشان کرن.

دەولەتێن کۆلۆنیالیست پشتی کو پەرلەمان و حکوومەتا کوردستانێ ئاڤا بوو و فەدەرالیزم راگەهاند بوو، زێدەتر ئێریشکەر بوون. چار دەولەتێن کۆلۆنیالیست ژ بۆ کو دەستھەلاتدارییا کوردستانێ تێک ببەن، هاریکارییا پەکەکێ کر. پەکەکێ ژی دەستھلاتداری، سیستەمێ یاسایی یێ کوردستانێ ناس نەکر. د سالا ١٩٩٢ێ دا شەرەکی دژوار پێک ھات. 3500 پێشمەرگە شەھید بوون. پەکەکە تەسلیم بوو، گۆت کو ئەز دەستھەلاتداری و نیزاما کوردستانێ ناس دکەم.

سەرۆکێ کوردستانێ بەرێز مەسعوود بارزانی، وی دەمی د دەربارێ ئێریشکاری و تەرۆرا پەکەکێ دا، ژ بۆ 25 دەولەتێن ئەورووپایێ راپۆرتەک پێشکێش کر. وی دەمی ژی ئەو ئێریشێن پەکەکێ، ژ لایێ کوردپەروەران ڤە وەک ئۆپەراسیۆنا دەولەتێن داگیرکەر ھاتە دییار کرن و ل دژی راوەستان.

لێ پەکەکێ، ب پشتگرییا دەولەتا ئیراق و ئیرانێ، ل باشوورێ کوردستانێ جیوار بوو. دەولەتا ترک ژی ئەڤ چەندە ژ بۆ ئۆپەراسیۆنێن خوە وەکو سەدەما ستراترەژیک نیشان دا. حەتا ئیرۆ ژ ل باشوورێ کوردستاێ 30 ئۆپەراسیۆن زێدەتر پێک ئانینە.. ل کوردستانێ قەرەقۆل و هەرێمەکا ئەولەهیێ ئاڤا کر.

پەکەکێ، ل باشوورێ کوردستانێ ب ئاڤاکرنا “حکوومەتا بۆتان-باندینانێ” و “کۆمارا زاپێ” و ب ھەموو کارێن خوەیێن دی، رێزێ ل حقووق و سەروەری و دەستھەلاتدارییا کوردستانێ ناگریت و ناس ناکەت. ژ بەر ڤێ یەکێ گەلەک گوندێن کوردستانێ داگیر کرینە. ژ گوندییێن کورد باجێ وەردگریت. گەنج و زارۆکێن کوردان درەڤینیت و ددەتە کوشتن. دەستوەردانا سییاسەتا باشوورێ کوردستانێ دکەت. رێخستنێن سییاسی ئاڤا دکەت. رێکێ ژ بۆ داگیرکەرییا چار دەولەتێن کۆلۆنیالیست ڤەدکەت. پارتییێن کوردستانێ و سەرۆکێن کوردستانێ رەوا نابینیت.

دڤێت باش بهێتە زانین کو پەکەکە ل ھەرێما فیدرال یا کوردستانێ رێخستنەکا داگیرکەرە.. ل شەنگالێ و ل مەخموورێ و ل قەندیلێ و ل گەلەک گوندێن کوردستانێ داگیرکەرییا وێ ب سالانە کو بەردەوامە.

حکوومەتا فیدرال یا ئیراقێ و حکوومەتا کوردستانێ ژ بۆ کو پەکەکێ و حەشدا شەعبی ژ شەنگالێ و ل ھەموو دەڤەرێن دی دەرکەڤن د رێکەفتنەکێ دا ل ھەڤ کرن. لێ پەکەکێ ژ بۆ کو ژ شەنگالێ دەرنەکەڤیت، ل کوردستانێ شەر راگەهاندیە. ئێریشی پێشمەرگەیان و بەرپرسییارێن ئاساییشێ دکەت.

ئەم ئارمانجا پەکەکێ یا ستراتەژیک ژ نێزیک ڤە و باش ناس دکەین کو ئەو دخوازیت ھەرێما فیدرال یا کوردستانێ ژ ھۆلێ راکەت.

راستیەکا ڤەکری ھەیە کو ھەرێما فیدرال یا کوردستانێ، د ڤێ قۆناغێ دا ھێڤییا ھەموو بەشێن کوردستانێ و کوردێن دنیایێ یە. خرابییا بێ سەرێ وێ، زیانێ دگەهینیتە ھەموو کوردان.

ئاشکەرایە کو پەکەکە، ل ھەرێما فیدرال یا کوردستانێ ھێزەکا بیانی و داگیرکەر و تەرۆریستە. پەکەکە، ل باشوورێ کوردستانێ و ل ھەموو بەشێن دی یێن کوردستانێ ل ھەمبەری رێخستن-پارتیێن کوردستانێ و کوردێن وەلاتپارێز ب ئاوایەکی بێ پەروا چالاکیێن تەرۆریستی پێک ئانینە و پێک تینیت. ب ڤان تایبەتمەندیێن خوە دڤێت ژ کوردستانێ بهێتە دەرخستن. جەرباندنێ ژی دەرخستیە ھۆلێ کو دگەل پەکەکێ دیالۆگ چارەسەر نینە.

لەوما ئەم ژ بۆ کو گەلێ مە و گەنجێن مە نایێن کووشتن و زیانێ نەبینن، ئەم ژ پەکەکێ داخواز دکەین کو دەست چەکان بەردەن و بێ قەید و شەرت دەستھەلاتداریا ھەرێما فیدرالا کوردستانێ ناس بکرن و ئان ژی ب شێوازێ ئاشتی ژ ھەرێما فیدرالا کوردستانێ دەرکەڤن…

ھەگەر پەکەکێ ئەڤ چەندە نەکر، دڤێت حکوومەتا کوردستانێ، حکوومەتا فیدرالا ئیراقێ پێکڤە سەروەریا خوە ئاڤا بکەن. ھەر دەولەتەک ل دژی ھێزێن نەحقووقی و تەرۆریست و داگیرکەر چ دکەن، دڤێت ئەو ل ھەمبەری پەکەکێ بهێتە کرن.

دڤێت رێخستنێن باشوورێ کوردستانێ یێن کو دگەل پەکەکێ هاریکار و تێکەلدارن، پەیوەندیێن خوە دگەل پەکەکێ قووت بکەن.

حکوومەتا فیدرالا ئیراقێ و حکوومەتا کوردستانێ ھەگەر مژارا پەکەکێ و ھەموو ھێزێن چەکدار چارەسەر نەکەن، نکارن ژ ئۆپەراسیۆن و بۆمبابارانا دەولەتا ترک ژی خەلاس ببن و سەروەرییا خوە بپارێزن.

ئەم، ژ بۆ کو پەکەکێ ژ ھەرێما فیدرالا کوردستانێ نەمینیت و بهێتە دەرخستن، پشتگیریا هەر بریارەکێ دکەین کو بهێتە دان.

ئەم ژ گەنجێن کوردستانێ یێن کو د ناڤ پەکەکێ دا خەباتێ دکەن داخواز دکەین کو ئەو خرابییێ ل وەلاتێ خوە و نەتەوەیا خوە نەکەن. ل دژی سیاسەتا پەکەکێ یا کو خزمەتا دەولەتێن کۆلۆنیالیست دکەت، دەرکەڤن. دەست ژ چەکا بەردەن.