پرۆژه‌یا «براتییا گه‌لان» چیه و ژ كو هاتیه؟
پشتی كو ئۆجالان سۆز ب ده‌وله‌تا تركیێ دای خزمه‌تا وێ بكه‌ت، پرۆژه‌یا «براتییا گه‌لان» ل باكورێ كوردستانێ کەفتە د وارێ جێبەجێکرنێ دا، ئۆجالان وه‌ختا ل كینیایێ خوه راده‌ست كری و هێژان د باله‌فرێ دا بوو دەما گۆتیيە ئه‌فسه‌رێن ترك «ئه‌ز ژ بۆی خزمه‌تێ ئاماده‌مه»، ئۆجالان ل وێرێ سۆزا ئاسمیله‌كرنا گه‌لێ کورد دا ده‌وله‌تا تركیێ، سۆزا بێ چه‌ك كرن و گوهه‌رینا ئاراستێ تێکۆشینا رێخستنا په‌كه‌كێ دا، ب ئاوایه‌كی كو بكه‌ڤیته د به‌رژه‌وه‌ندییا ئه‌جێندایێن ده‌وله‌تا ترکیێ دا.
ئۆجالان ل سالا 2013ێ پرۆژه‌یا «براتییا گه‌لان» قه‌بوول كر، ل گۆری وێ پرۆژه‌یێ پێویسته ((ئاشتی ل تركیێ بهێتە چەسپاندن))، ئۆجالان ژ په‌كه‌كێ خوا‌ست چه‌كان دانن و ژ تركیێ ده‌ركه‌ڤن، وی بانگ ل 30 ملیۆن كوردێن باكور كر كو ده‌ست ژ مافێن خوه یێن نه‌ته‌وه‌یی به‌ردەن، ژ بۆ كو ل سه‌ر بنگه‌ها «براتییا گه‌لان» د ناڤا جڤاكێ تركیێ دا ئاسمیله ببن.
یا راست ئه‌ڤە چەندە چێبوو، گه‌ریلا ژ باكور بۆ رۆژئاڤا و باشوور هاتنە ڤه‌گوهاستن، ژ بۆ كو پشتگریێ ل ر‌ژێمێن ئیراقێ و سووریێ بكەن كو پرۆژه‌یا «براتییا گه‌لان» ل ڤان هه‌ردوو پارچهیان ژی سه‌ربێخن.
پرسیار ل ڤێرە ئه‌ڤەیە، گه‌لۆ پرۆژه‌یا «براتییا گه‌لان» چی یه؟
«براتییا گه‌لان» پرۆژه‌یه‌كا قرێژ یا ئیستخباراتی یه، ده‌زگه‌هێ ئیستخباراتا تركیێ ب هاریکارییا هه‌ر یێك ژ ر‌ژێمێن سووریێ و ئیرانێ چێكر، پشتگریێ دده‌تە رژیمێن كوردستان ل هه‌ر 4 پارچهیان داگیر كری، ئه‌ڤ پرۆژه ژ كوردان دخوازیت ده‌ست ژ مافێن خوه یێن نه‌ته‌وه‌یی به‌ردەن و د چارچۆڤه‌یا وان ده‌وله‌تان دا بمینن و د ناڤا گه‌لێن وێ دا ئاسمیله ببن.
یا راست ئه‌م هه‌موو دزانین كو ر‌ژێمێن ده‌وله‌تێن داگیركه‌رێن كوردستانێ ئیدیعایا دیمۆكراتیزه‌بوونێ دكەن، ب ئاوایه‌كێ كو ئه‌و جوداهیێ ل ناڤبه‌را پێكهاته‌یێن گه‌لێن خوه دا ناكەن، پرۆژه‌یا «براتییا گه‌لان» ژی ب تەمامی ئه‌و یێكه كو ئه‌ڤ ده‌وله‌ته دخوازن ل سه‌ر گه‌لێ كورد پێك بینن، ب گۆتنه‌كا دی ئه‌ڤ پرۆژه دبێژیتە كوردان: «ده‌ست ژ خه‌ونێن خوه به‌ردەن و ل گه‌ل گه‌لێن ده‌وله‌تێن داگیركه‌ر بژین و د ناڤا وان دا ئاسمیله ببن».
پرۆژه‌یا «براتییا گه‌لان» كو په‌كه‌كه و رێخستنێن دووڤه‌لانكێن وێ یێن مینا په‌یه‌دێ و رێڤه‌به‌رییا خوه‌سه‌ر دخوازن ل سه‌ر گه‌لێ كورد ل رۆژئاڤا ب دارێ زۆرێ و تیرۆرێ و پرۆباگندایێ جێبەجێ بکەن، ب مه‌زنترین دره‌و و خاپاندن دهێتە حه‌ساب كرن كو ب درێژاهییا دیرۆكێ ل گه‌لێ كورد هاتییە كرن، ژ به‌ركو ئارمانجا ڤێ پرۆژه‌یا قرێژ ژ رێ برنەدەرا دۆزا كوردی یه ل هه‌ر چار پا‌رچه‌یێن كوردستانێ، هه‌روه‌ها دخوازیت كورد حه‌تا رۆژا قیامه‌تێ ل ژێر ده‌ستهلاتا داگیركه‌ران بمینن، له‌وما پێویسته كورد هشیار ببن و بزانن کانێ ئه‌ڤە چ پیلانن ل دژی وان دهێنه مه‌شاندن، هه‌ڤده‌م ب هه‌موو هێز و شیانێن خوه ل دژی ڤی پرۆژه‌ی راوەستن به‌ری كو ببیتە ده‌ره‌نگ، ژ به‌ر كو ئارمانجا ڤێ پرۆژه‌یێ هەدەفکرنا كیان و نه‌ته‌وه‌یا كوردی یه، ئه‌و نه‌ته‌وه‌یا كو رهێن وێ د كووراهییا دیرۆك و جوگرافیایا ناڤچه‌یێ دا جهـ گرتی.
