ل گۆری چاڤکانیێن ھەرێمێ چەکدارێن سەر ب پەکەکێ ڤە یێن ب ناڤێ یەبەشە کو نێزیکی 1500 کەسن، ب رێکەفتنەکا ناڤبەرا ھەردو ئالیان ل ناڤ سینۆرێن شنگالێ د ناڤ یەکینەیێن حەشدا شەعبی دا هاتنە بجھکرن.
یەکینەیێن بەرخوەدانا شنگالێ (یەبەشە) کو باسکەکێ پەکەکێ یە ل شنگالێ ل گۆر رێکەفتنەکێ، د ناڤ دەستەیا حەشدا شەعبی دا هاتنە بجھکرن و ل شنگالێ دمینن.
شێورمەندێ سەرۆکێ حکوومەتا ھەرێما کوردستانێیێ کارووبارێن ئێزدیان شێخ شەمۆ راگەھاند، ئەو د چارچۆڤەیا رێکەفتنا شنگالێ دا نینە کو پەکەکە د ناڤ ھێزەکا دی یا ئیراقی دا ل شنگالێ بمینیت.
شەمۆ دبێژیت؛ “مانا پەکەکێ ب ناڤێ ھەر ھێز و گروبەکا دی دێ رەوشا شنگالێ وەک بەرێ هێلیت و نابەتە پێش، تشتا ھاتیە کرن فێلە ل رێکەفتنا شنگالێ. ژ بۆ وێ پرسێ ئەم ل بەندا ھەلوەستا حکوومەتا ھەرێما کوردستانێ و ئیراقێ نە.”
شێورمەندێ سەرۆکێ حکوومەتا ھەرێما کوردستانێ گۆت کو پێویستە نەتەوەیێن یەکبوویی و ئەمریکا چاڤدێریا خالێن بجھ ئانینا رێکەفتنا ناڤبەرا ھەولێر و بەغدایێ دا بکەن و ئالیێن کو رێکەفتنێ بجھ نایینن دەستنیشان بکەن.
ل گۆری زانیاریان بەری رێکەفتنا شنگالێ زێدەتری ھەزار چەکدارێن پەکەکێ ل سەر حسابا حەشدا شەعبی ھاتبوون بجھکرن و نھا پشتی رێکەفتنێ 1500 چەکدارێن دی ل گۆر وێ رێکەفتنێ ل سەر فەوجا 80 یا حەشدا شەعبی دهێنە بجھکرن و بوونە حەشدا شەعبی.
