ڤه‌گه‌ریان بۆ دیرۆكێ.. شه‌هید كرنا پێشمه‌رگه‌ی ل ژێر په‌رده‌یا هاریكاریێ!
نه‌ورۆزا 1989ان ئه‌و شه‌ش كادرۆ و پێشمه‌رگه‌هێن ل خوارێ یێن پارتییا ده‌مۆكرات یا كوردستانێ، وه‌كه یه‌كه‌م گرووپا پێشمه‌رگه‌هێن ناڤچه‌یا به‌هدینان، پاش ئه‌نفالان خوه‌ستن ده‌رباسی باشوورێ كوردستانێ ببن ژ بۆ كو پێوه‌ندیێ ب گه‌لێ باشوور بكن و ژێره ببێژن شۆرش هێژان مایه و پێشمه‌رگه گرووپ گرووپ دێ ڤه‌گه‌رن كوردستانێ. پێشمه‌رگه وه‌ختا كو گه‌هه‌شتین گوندێ شیڤره‌زانێ ل سنۆرێ نێڤبه‌را باكور و باشوور، ل ئالێ باكورێ وه‌لات بوونه مێهڤانێن خه‌لكێ وی گوندی، د وان ده‌مان دا هه‌ژماره‌كا چه‌كدارێن په‌كه‌كێ گه‌هشتنه جه‌م وان و ژێره گۆتن:
«چه‌ند مه‌هن ژ پاش هه‌وا ئه‌نفالا به‌هدینان، ئه‌م ل سه‌ر ڤان سنۆرانه و وه‌ها باشتره هه‌ر هه‌وله‌كا هه‌وه ل ڤێ ناڤچه‌یێ ب هه‌ماهه‌نگی ل گه‌ل هێزێن مه بهێته كرن، ژ بۆ ڤێ مه‌به‌ستێ به‌رپرسه‌كێ مه ل جهه‌كێ نێزیكی ڤی گوندی هه‌یه و دڤێت ل گه‌ل هه‌وه ب ئاخڤیت ژ بۆ هه‌ماهه‌نگی كرنێ».
د وی ده‌می دا، كادر و پێشمه‌رگه‌هێن په‌ده‌كێ هایداری رێككه‌فتنا په‌كه‌كێ ل گه‌ل ره‌ژێما به‌عس نه‌بوون، وان نه‌دزانی په‌كه‌كه ژ بۆ رێگریكرنێ ل لڤ و ته‌ڤگه‌رێن پێشمه‌رگه‌هان چه‌ك و پاره وه‌رگرتینه. پێشمه‌رگه ژ بۆ دیتنا به‌رپرسێ په‌كه‌كێ كه‌تنه رێ. چه‌كدارێن په‌كه‌كێ ژێره گۆتن باشتره هوون بێ چه‌ك بچن، ژ به‌ر كو فه‌وجه‌كا ئارته‌شا تركیێ ل نێزیكی گوندی یه و ترسا مه هه‌یه بزانن و ل مه بده‌ن.
پێشمه‌رگه ژ ئالیه‌كی ژ به‌ر كو ل سالا 1983ێ هاریكارییا گه‌ریلایێن په‌كه‌كێ كربوو، ژ ئالیه‌كێ دی ئاگاهییا وان ژ رێككه‌فتنا په‌كه‌كێ ل گه‌ل ر‌ژێما ئیراقێ ل دژی پێشمه‌رگه‌هان نه‌بوو، ب دله‌كێ ساف و بێ كو چه‌كان ل گه‌ل خوه ببه‌ن، كه‌تنه رێ پشتره چه‌كدارێن په‌كه‌كێ ئه‌و ده‌سته‌سه‌ر كرن و راده‌ستی هێزه‌كا ئارته‌شا ئیراقێ ل زاخۆ كرن، ئه‌ڤ پێشمه‌رگه ل باره‌گه‌ها ئه‌من و ئیستخباراتا ئیراقێ ل دهۆكێ كه‌تنه ژێر لێكۆلین و ئه‌شكه‌نجه‌دانێ.
ر‌ژێما به‌عس وان پێشمه‌رگه‌هان دده‌ته ده‌ستێ په‌كه‌كێ ژ بۆ كو بهێنه كوشتن. په‌كه‌كه پێشمه‌رگه‌هان دبه‌ته چیایێ مه‌لا نزارێ تاوێ كو دكه‌ڤیته همبه‌ر گوندێ شیڤره‌زانێ ل ئالێ باشوور و هه‌ر شه‌شان شه‌هید دكه‌ت.
ل گۆری چاڤكانییا ڤێ نڤیسێ، وه‌ك خه‌لكێ گوندێ شیڤره‌زانێ ڤه‌گێران، چه‌كدارێن په‌كه‌كێ ڤه‌گه‌رین گوند و چه‌كێن ڤان كادر و پێشمه‌رگه‌هان برن.
ناڤێن وان شه‌هیدان ئه‌ڤن:
ئدریس جه‌رجیس ب كۆد ناڤێ ئه‌حمه‌د كادر – ژ دایكبوویێ 1953 / گوندێ به‌ربیرێ ل ده‌ڤه‌را شێخان.
سه‌عدوللا ئاڤده‌ل سه‌عدۆ – ژدایكبوویێ 1954 / گوندێ غلبیشێ ل ده‌ڤه‌را بامه‌رنێ.
محه‌مه‌د حه‌مدی – ژدایكبوویێ 1949 / گوندێ وه‌رمێلێ ل ده‌ڤه‌را بامه‌رنێ.
نزار محه‌مه‌د سلێمان – ژدایكبوویێ 1966 / گوندێ خرابییا ل ده‌ڤه‌را زاویته.
خالد ئاده‌م حسێن – ژدایكبوویێ 1966 / گوندێ وه‌رمێلێ ل ده‌ڤه‌را بامه‌رنێ.
نەزمی ئەحمەد چۆلی، ژدایكبوویێ 1969 / گوندێ وه‌رمێلێ ل دەڤەرا بامەرنێ.
