نهێنی – لاهۆر جه‌نگی ل ده‌ربارا كوردستانێ داخواز‌ییه‌كا خه‌ته‌ر ژ به‌غدا دكه‌ت؟
هه‌ڤسه‌رۆكێ یه‌كێتییا نشتیمانییا كوردستانێ، د داوی سه‌ره‌دانا خوه یا به‌غدایێ دا، ل ژێر ناڤێ چاره‌سه‌ر كرنا پرسگرێكا مووچه‌یا فه‌رمانبه‌رێن حكوومه‌تا هه‌رێما كوردستانێ، داخواز ژ رایه‌دارێن ئیراقێ كرییه، ژ ده‌رڤه قه‌واره‌یا ده‌ستووری، ره‌فتارێ دگه‌ل سلێمانیێ بكه‌ن، گه‌ف ژی كرینه هه‌گه‌ر ئه‌ڤ یه‌ك نه‌هێته كرن، وان بژاره‌یێن دی هه‌نه.
چه‌ند پاشتره، سیاسه‌تا لاهور شێخ جه‌نگی یا لاواز كرنا پێگه‌ها باشوورێ كوردستانێ پتر زه‌لال دبیت، ده‌ست ژێ به‌رده كو ل 16 ئۆكتۆبه‌را 2017ێ خیانه‌ت كرییه، جاران ئه‌و ملێ خوه دده‌ته رێخستنا په‌كه‌كێ و به‌ره‌یه‌كی ل دژی رێڤه‌به‌رییا باشوور ددانیت، جاران د گه‌ل حه‌شدا شه‌عبی و جاران دگه‌ل ئیرانێ، ب كورتی لاهۆرێ كه‌سێ یه‌كه‌مێ یه‌نه‌كێ، وه‌ها ره‌فتارێ دكه‌ت هه‌ر وه‌ك پارتییا وی نه‌هه‌ڤبه‌شێ ده‌ستهه‌لاتێ یه د حكوومه‌ت و پارلمه‌نا باشوور دا، ئه‌و ده‌ستكه‌فتیێن حكوومه‌تێ ژ بۆ خوه و پارتییا خوه حه‌ساب دكه‌ت و ل وه‌ختێ قه‌یرانان وه‌ك ئۆپۆزسیۆن كار دكه‌ت.
پێگه‌ها داركا مازی ئاگاهیێن تایبه‌ت ل ده‌ربارێ داوی سه‌ره‌دانا لاهۆر جه‌نگێ بۆ به‌غدایێ ب ده‌ست ئێخستینه، ئه‌و سه‌ره‌دانا كو تێدا داخواز ژ رایه‌دارێن ئیراقێ كری ل ده‌رڤه‌ی قه‌واره‌یێ ده‌ستووری ره‌فتارێ دگه‌ل سلێمانیێ بكه‌ن.
لاهور جه‌نگی ل 6/12/2020ێ، ب هه‌ڤالینییا هه‌ر یه‌ك ژ سه‌عدی پیره و ئاسۆ ئه‌لمانی، ئه‌ندامێن مه‌كته‌با سیاسی یا یه‌نه‌كێ، سه‌ره‌دانا به‌غدایێ كربوو، ل هه‌مان رۆژێ ئه‌و ژ ئالیێ د. به‌رهه‌م سالح سه‌رۆككۆمارێ ئیراقێ ڤه هاتنه پێشوازی كرن، پشتره ل رۆژا 7/12/2020ێ ئه‌و ل جهێ مانا خوه ل نێزیكی كۆچكا سه‌لام یا كۆماری، د گه‌ل كۆمیتا دارایی یا پارلمه‌نا ئیراقێ كۆمبوو.
د كۆمبوونێ دا هه‌ر ئێك ژ پارلمه‌نته‌رێن ئیراقێ:
هه‌یسه‌م جبووری ژ فراكسیۆنا «كفاءات للتغییر».
محه‌مه‌د شه‌یاع سوودانی ژ فراكسیۆنا عه‌تا.
عه‌بوود وه‌حید عیساوی ژ فراكسیۆنا ده‌وله‌تا قانوون.
حه‌سه‌ن شویرد سه‌رۆكێ فراكسیۆنا ئێتێلافا وه‌ته‌نییه.
فه‌یسه‌ل عیساوی و یووسف كیلابی ژ فراكسیۆنا نه‌سر.
حه‌سه‌ن فه‌دعه‌م ژ فراكسیۆنا ئیسلاح.
محه‌مه‌د ده‌راجی ژ فراكسیۆنا فه‌تح.
ئالا تاله‌بانی و جوان ئێحسان سه‌رۆكێ فراكسیۆنا یه‌نه‌كێ.
چاڤكانیێن پێگه‌ها داركا مازی ئاگاهیێن تایبه‌ت ژ ناڤا ڤێ كۆمبوونێئ ب ده‌ست ئێخستینه و كانێ چ گۆتن ژ ده‌ڤێ لاهۆر و ئالا تاله‌بانی ب ڤان پارلمه‌نته‌رێن ئیراقێ هاتینه گوتن.
هێژا گۆتنێ یه، ئه‌ڤ سه‌ره‌دانا لاهۆر و جڤینا وی یا ب پارلمه‌نته‌رێن ئیراقی، پاش په‌سه‌ند كرنا قانوونا قه‌رز ژ ئالیێ پارلمه‌نا ئیراقێ ڤه هاتبوو، ئه‌و قانوونا كو مافێن باشوورێ كوردستانێ تێدا نه‌هاتینه جێگیر كرن.
ل گۆری زانیاریێن ده‌ستێ مه، لاهۆر جه‌نگی ل ژێر ناڤێ چاره‌سه‌ر كرنا پرسگرێكا مووچه‌یا فه‌رمانبه‌رێ حكوومه‌تا باشوور ئه‌ڤ كۆمبوونه چێكربوو، لێ به‌لێ وی ژ پارلمه‌نته‌رێن ئیراقێ را گۆت: «ئه‌م وه‌كه یه‌نه‌كه ئاگاهییا مه ژ مه‌سه‌لا فرۆشتنا په‌ترۆلێ و هه‌ڤبه‌ستێن حكوومه‌تا باشووردگه‌ل كۆمپانیێن جیهانێ نینه، ژ به‌ر ڤێ مه داوی ده‌رفه‌ت ب په‌ده‌كێ داییه».
مه‌به‌ستا لاهۆر ژ داوی ده‌رفه‌تێ كۆمبوونا سێقۆلی یا په‌ده‌كێ، یه‌نه‌كێ و ته‌ڤگه‌را گۆرانێ بوو ئه‌وا پاڤێل تاله‌بانی هه‌ڤسه‌رۆكێ یه‌نه‌كێ تێدا به‌شدار بووی.
لاهور وه‌ها ئاخفتنا خوه ل گه‌ل كۆمیتا دارایی یا پارلمه‌نا ئیراقێ به‌رده‌وام كر: «ژ به‌ر ڤێ پێویسته حكوومه‌تا ئیراقێ ڤێ پرسگرێكێ چاره‌سه‌ر بكهت، هه‌گه‌ر نه، هنده‌ك بژارده‌یێن دی مه هه‌نه».
چاڤكانیێن پێگه‌ها داركا مازی ئه‌شكه‌ره كر كو د وێ كۆمبوونێ دا و پاش ب داوی بوونا گۆتنێن لاهۆر، ئالا تاله‌بانی ده‌ست ئاخفاتنێ دكه‌ت و ب كۆمیتا دارایی دبێژیت: «پێویسته حكوومه‌تا ئیراقێ مووچه‌یا فه‌رمانبه‌رێن سلێمانیێ راسته راست بهنێریت، ژ به‌ر كو په‌یوه‌ندییا یه‌نه‌كێ ب پرسگرێكێن باشوورێ وه‌لات ڤه نینه».
لاهۆر جەنگی، ب یەک ژ وان کەسان دهێته ناسکرن کو ل باشوورێ کوردستانێ ێتر ژ هەر کەسەکی دی باس ل قانوونێ و مایتێنەکرنا پارتییان د کاروبارێن حکوومەتێ دا دکەت، لێ بەلێ چ کەس مینا وی دەستوەردانێ ناکەت، ئەو ب ئاوایەکی سیاسه‌تێ دكه‌ت هەر وەک چ حکوومەت ل باشوور نەبن، هەر تشتێ حکوومەت ئەنجام ددەت ئەو یان ل دژ رادوەستیت یان ژی ب رێیا میدیایا پارتییا خوە حەنەکان پێ دکەت و ناهێلیت چ قانوون و بریارەکا حکوومەتێ وەک پێدڤی ل سلێمانیێ بهێته بجهئینان، وەکە یەک ژ کچێن چالاکڤانێن باشوور دبێژیت: «گەر سه‌رۆكێ حکوومەتا باشوورێ کوردستانێ خوە بێژیت لاهۆر کەسەکێ باشە، دێ رۆژا پاشتر لاهۆر دەرکەڤیته سەر كه‌نالێن خوە یێن راگهاندنێ و بێژیت: نا وللا ئەز نەیێ باشم، ئەز گه‌له‌كێ پیس و سە…..بابم!
ئەڤ ئالۆزیێن لاهۆر شێخ جەنگی چیدکەت هەر هەموو ب فەرمانا ئیرانێ و هاریكارییا پەکەکێ نە، ئەڤ سیاسەتا نها یەنەکە پێ دهێته برێڤەبرن ژ ئەنجاما ڤێ یەکێ یە کو د ناڤا یەنەکێ دا سەر بوویە لنگ و لنگ ژی بوویە سەر، هەر تشت تەڤلیهەڤ بوویە و یەنەکە کەتییە د دەستێن کەسێن ب کارنەهاتی دا، چ رێز ل کەسێن نشتمانپەروەر و سیاسەتڤان ناهێته گرتن، هەر کەسێ پتر دژاتییا حکوومەتێ بکەت و ل دژ راوەستیت دێ پێتر د ناڤا یەنەکێ دا دیار بیت و بەرپرساتی ب وی هێته دایین.
ب راستی جهێ داخێ یە کو یەنەکە یا میراتا مام جەلال بکەڤیته دەستێ زرچەپۆزەک مینا لاهۆر، ب راستی مخابن کو یەنەکە کەتییە ڤێ رەوشێ و نها بوویە خەتەرەیەک جددی ل سەر باشوورێ کوردستانێ، هەر تشتێ کو دەولەتێن داگیرکەر و دژمن دخوازن ل باشوورێ وه‌لات بجهـ بینن، ب رێیا یەنەکێ و شەخسێ لاهۆر دکه‌ن، هەلوەستێن وی یێن ڤێ داویێ ژی باشترین بەلگەنە ل سەر ئاخافتنا مە.
