پێویست بوو د ناڤ گەلێ کورد دا تێگەھا ھەری گرنگ و سەرەکی “ئێکەتی و یەکرێزی” با، لێ بەلکە بەشەک ژ ناڤ کوردان پەیڤێن “ئێکەتی و یەکرێزی” ب مەبەستێن تێکدان و رەشکرنا لایەنێ دی بکار تینن کو گەلەک کەسایەتیێن سەر ب پەکەکێ ڤە و نێزیکی وێ ب رەنگەکێ ئاشکەرا تێگەھێن “ئێکەتی و یەکرێزی” ل سەر دژاتیا کوردان بکار تینن.
ھەلبەت دەما د ڤێ مژارێ دا باسی پەکەکێ دهێتە کرن، گەلەک لایەنگرێن وێ عاجز دبن و دیسا بارزانیان وەکو “خایین” و پەدەکێ ژی ب ھەڤکارا لایەنێن دژی کورد ب ناڤ دکەن. ئێدی ئەڤە بوویە تشتەکی نۆرمال. ژ بەر کو ھزرین و ئیرادەیا وان یا شەخسی ژ دەستێ وان کەسان ھاتیە ستاندن و چاوا تێ خواستن، وسا دھزرن و ل گۆری وێ ھزرا خوە یا حیزبی تەڤدگەرن.
ئەم دێ ل سەر شەخسێ ھەڤسەرۆکێ دەستەیا سەرۆکاتیا پارتیا یەکیتیا دەمۆکراتیک (PYD) ب زمانەکی زەلال بەحسا ڤێ یەکێ کین. خەلیل ب ئاوایەکی ئاشکەرا سڤکاتی ب پێشمەرگەیێن رۆژ کر کو ب ھەڤکاریا ھەڤپەیمانیا ناڤدەولەتی و ئەمریکایێ ژ بۆ رۆژئاڤایێ کوردستانێ ھاتنە پەروەردەکرن و ئەو وەکی “چەتە” ب ناڤ کرن.
ل ھەمبەر ڤان گۆتنێن ئالدار خەلیل کارڤەدانەکا مەزن چێبوو و کارڤەدانێن توند ھاتنە نیشاندان کو ل بەرامبەر وان کارڤەدانان ژی دەردۆرا ناڤبۆری داخویانیێن تاوانبارکرنا پەدەکێ و رەشکرنا پێشمەرگە بەلاڤ کرن. یێن ڤان سڤکاتی و تاوانان دکن بەرێ ھاتنە پەروەردەکرن کو وەکی مە باس کری ل گۆری وێ فێربوونا خوە یا ب وان ھاتیە فێرکرن هزر دکەن.
“دانووستاندنا کوردی-کوردی ب بەشداریا وەلاتێن رۆژئاڤا برێڤەدچیت”
دڤێت خالا ھەری گرینگا دانووستاندنێن یەکرێزیا ل رۆژئاڤایێ کوردستانێ باش بهێتە زانین و ببیرخستن داکو ئەم راستیێ بزانین.
راستی ئەوە کو ھەڤدیتن و دانووستاندنێن ل رۆژئاڤا نە تەنێ د ناڤبەرا کوردان دا تێنە کرن، ھەروھا ئەمریکا، ھەڤپەیمانیا ناڤدەولەتی، وەلاتێن رۆژئاڤا و نەتەوەیێن یەکبوویی ژی د ناڤ دانە و ب وان ڤە دهێتە پێشخستن.
لێ بەلێ پەیەدە ھەول ددەت وێ نێرینا کو دییالۆگا ناڤبەرا ئەنەکەسێ-پەیەنەکێ ئێدی دوبارە دەست پێ ناکەت بەلاڤ بکەت کو ل گۆری زانیاریێن “پەیاماکورد” شاندا ئەمریکایێ ھەری دەرەنگ 20ێ ڤێ مەھێ دێ دەرباسی رۆژئاڤایێ کوردستانێ بیت. گەلۆ یێن کو رۆژەڤێ ب ڤان داخویانیان مژول دکەن و دخوازن کێشەیان د ناڤبەرا کوردان دا گور بکەن ڤێ نزانن؟
سەدەما کو پەیەدە و ب تایبەت ژی ئالدار خەلیل هندە ئیرێشی ئەنکسێ دکەن، ڤالاھیا کو ب ھلبژارتنێن ئەمریکایێ ل ھەرێمێ پەیدابوونە یە کو دخوازن سوودێ ژێ وەربگرن.
ل ئالیێ دی د ھەیاما ھلبژارتنێن ئەمریکایێ دا ھەڤدەم ئیران و ھێزێن سەر ب ئیرانێ ڤە یێن وەکی حەشدا شەعبی و حزبوللاھێ ژی چالاکیێن کو د وێ ڤالاھیا چێبوویی دا دەستهەلاتا خوە بپارێزن پێک ئانین.
ھەروھا ترکیا ژی نە دووری ڤێ یە کو بەریا گوھەرتنا رێڤەبەریا ئەمریکا، ب ئێریشێن نوو ھەول دا کو باژارۆکێ عەین عیسایێ ژ دەستێ ھەسەدێ بینیتە دەر.
ھەلبەت وەکی بەری نھا ژی گەلەک ھێزێن دخوازن کوردان ڤێکرا بەردەن هەنە. لێ بەلێ د دەمەکێ کو کورد بوونە ھەڤپەیمانێن وەلاتێن رۆژئاڤایی، جھێ گومانێیە کو ھندەک لایەن ب تەڤگەر و ھەلوەستێن خوە ل ئالیێ ھێزێن کو خرابیا کوردان دخوازن جیهـ دگرن. د سالێن 1990ێ دا ژی دەما بوویەرێن ل باشوورێ کوردستانێ ب ئیستیفزازێن ئیران و ترکیێ روو دای، ھێزا کو ئاشتیا ناڤبەرا کوردان ساز کری دیسا ئەمریکا بوو و کەسێن وەکی ئالدار خەلیل وی دەمی ژی ھەبوون کو ب سەر نەکەتن.
گۆتنا ئالدار خەلیل کو تێدا پێشمەرگە ب “چەتە” ب ناڤ دکەت ناهێتە قەبوولکرن
دڤێت ژ ئالدار خەلیلێ دبێژیتە پێشمەرگە “چەتە” بهێتە ببیرخستن کو د وی سەردەمی دا ئەمریکایێ چاوا دەرفەت و هاریکاری دابوو کوردێن باشوور نھا ژی ددەتە کوردێن رۆژئاڤا. ھەر کەس دزانیت کو ھەڤپەیمانیا ناڤدەولەتی پشتگری و ئالیکاریێ ددەتە ھەسەدێ و یەپەگێ. ھەروھا دڤێت نەهێتە ژبیرکرن کو ل کۆبانێ ھێزێن پێشمەرگە مل ب ملێ شەرڤانا شەرێ تەرۆرێ کرن. لێ بەلێ ژ بەر کو ژ یێن وەکی ئالدار خەلیل را هاتیە گۆتن، “تو دەرکەڤە و تەنێ بپەیڤە” نۆرمالە کو راستیا نەبینیت. لێ گۆتنا “چەتە” بۆ پێشمەرگەیێن ھەڤبەشێن سەرکەفتنێ نەیا نۆرمالە. ھەر چ دبیت بلا ببیت دڤێت گەلێ کورد بەرسڤا ڤان کەسا بدەت.
دژ دەرکەتنا ڤێ رەوشا کو کورد ب خێرا ئەمریکا و ھەڤپەیمانیێ گھیشتنێ، ب رامانا راوەستانا ل کێلەکا ھەڤپەیمانا رووسیا، ئیران و ترکیێ دهێت. ژبەرکو ئەو ژ بۆ کو کوردان ل دەرڤەیی ھەڤپەمانیێ و ئەمریکایێ بھێلن چ ژ دەستێ وان دهێت دکەن و مخابن کەسێن وەکی ئالدار خەلیل ژی دهێنە پێش چاڤێن مە و دئاخڤن. لێ بەلێ پاشەرۆژا کوردان د جیهـ گرتنا د ناڤ رێزێن ھەڤپەیمانیا وەلاتێن رۆژئاڤا یا کو ئەمریکا پێشەنگیا وێ دکەت دایە.
ژبەرکو ھەڤکاری و شریکاتیا ل گەل ھێزێن ناڤدەولەتی ھەلوەستەکا راستەقینەیە کو ژ تێکچوونا ل بەرامبەر ھێزێن ھەرێمێ چێترە.
گۆتنا “چەتە” بۆ پێشمەرگەیێن رۆژ گرێدایی نێزیکاتیا بۆ برایێن خوەیێن کوردە
ئالدار خەلیل و کەسێن وەکی وی و ھەر کەسێ ژ پێشمەرگەیێن رۆژ عاجز بیت، بخوازن یان نەخوازن ژی دێ بینن کو ئەو دێ ب رێیا دیپلۆماسیا ناڤدەولەتی د چارچۆڤەیا رێکەفتنێ دا ببنە بەشەکێ گرنگ یێ ھێزێ ل رۆژئاڤایێ کوردستانێ.
گۆتنا “چەتە” یا ئالدار خەلیلم ژ بۆ پێشمەرگەیێن رۆژ ژی بخوە گرێدایی نێزیکاتیا بۆ برایێن خوەیێن کوردە.
دڤێت گەلێ کورد ڤێ راستیێ پشتگوھ نائاڤێت و پێشمەرگەیێن کو ل کۆبانییێ ل کێلەکا برایێن خوە شەرێ دژی داعشێ کری، نەکەنە قووربانی. لەورا ئێکەتی نە ب گۆتنێ بەلکو ب کاری پێک دهێت.
