باله‌فرێن جه‌نگێ یێن ده‌وله‌تا تركیێ ئیرۆ جاره‌كا دی ئێریشێ په‌كه‌كێ ل باشوورێ كوردستانێ كر و ژ به‌ر كو رێخستنێ لڤ و ته‌ڤگه‌رێن چه‌كدارێن خوه ئێخستنه نێزیكی گوندان، 3 كه‌سێن سڤیل بریندار كه‌تن.
چاڤكانیێن پێگه‌ها داركا مازی ل باشوورێ كوردستانێ ئه‌شكه‌ره كر، ئیرۆ رۆژا ئینی 22/1/2021ێ، باله‌فرێن ده‌وله‌تا تركیێ هێرشی نوقته‌یه‌كا رێخستنا په‌كه‌كێ ل گوندێ ب ناڤێ «گری» یێ گرێدای ناڤچه‌یا چه‌مانكێ ل سنۆرێ پارێزگه‌ها دهۆكێ كر و زیانێن جانی گه‌هاندنێ.
ده‌ست نیشان كر، ئه‌ڤ هێرشه 300 مه‌تران دووری ناڤه‌ندا گوندی چێبوویه و ب وێ ئه‌گه‌رێ 3 وه‌لاتیێن گوندێ ناڤبری ب ناڤێن، «س. ش ز، م.س، ی.م» ب سڤكی بریندار بوونه.
ل گۆر ئاگاهیێن ده‌ستێ مه، باله‌فرێن تركیێ 3 رۆكێت ل وێ نوقته‌یا په‌كه‌كێ داینه وهه‌ر چه‌ند كو ئاگاهی ل ده‌ربارا زیانێن په‌كه‌كێ نینن، لێ به‌لێ دهێته ته‌خمین كرن كو ته‌ڤ چه‌كدارێن د وێ نوقته‌یێ دا هاتبنه كوشتن.
رێخستنا په‌كه‌كێ چه‌ند پاشتره، لڤ و ته‌ڤگه‌رێن چه‌كدارێن خوه دئێخیته ناڤا گوند و نێزیكی باژارۆكان و ب ڤێ ئه‌گه‌رێ ئه‌ڤه نه‌جارا ئێكێ یه زیانا هێرشێن ئاسمانی یێن ده‌وله‌تا تركیێ ب خه‌لكێ سڤیلێ گوندان دكه‌ڤن، په‌كه‌كه ڤێ یه‌كێ ب ئه‌نقه‌ست دكه‌ت ژ بۆ كو ئه‌ڤ گونده بهێنه ڤالا كرن و ببنه مه‌یدانا شه‌ری.
