هه‌په‌گێ بالێ له‌شكری یێ رێخستنا په‌كه‌كێ، ئیرۆ ناسنامه‌یا دوو گه‌ریلایان راگه‌هاند كو ب ده‌ستێ عه‌سكه‌رێن ترك هاتنه كوشتن، یه‌ك ژێ ب ناڤێ «ئاخینه» و ژ وێنه‌یێن وێ خوه‌یا دكه‌ت كو هێژان د ته‌مه‌نا زارۆكینیێ دا یه.
ناڤه‌ندا مه‌دیا و راگه‌هاندنا هه‌په‌گێ، ئیرۆ رۆژا ئێكشه‌مبی 24/1/2021ێ، داخویانییه‌ك به‌لاڤ كر و تێدا ناسنامه‌یا دوو گه‌ریلایان راگه‌هاندییه كو ب ده‌ستێ عه‌سكه‌رێن ترك هاتینه كوشتن، هه‌په‌گێ وه‌ك هه‌ر جار ناڤ و پێزانینێن تام ل سه‌ر ڤان دوو گه‌ریلایان ئه‌شكه‌ره كرینه، لێ به‌لێ چ ئاماژه ب ته‌مه‌نا وان نه‌كر ژ بۆ كو تاوانا ره‌ڤاندن و چه‌كدار كرنا زارۆكێن كورد ل سه‌ر نه‌هیته ته‌سبیت كرن.
یه‌ك ژ وان گه‌ریلایێن كو هه‌په‌گێ ئیرۆ ناسنامه‌یا وان راگه‌هاندی، ب ناڤێ «گولیزار گور» و كۆد ناڤێ «ئاخین فه‌راشینه»، خه‌لكا وانێ یه، رێخستنا په‌كه‌كێ ئه‌و ل 24 مژدارا 2016ان ل باشوورێ كوردستانێ ب ده‌ستێ عه‌سكه‌رێن ترك ب كوشتن دایه.
ژ وێنه‌یێن ئاخینێ خوه‌یا دبیت كو ئه‌و هێژان ئه‌و د ته‌مه‌نا زارۆكینیێ دا یه، هه‌روه‌ها ل گۆر داخویانییا هه‌په‌گێ، ئاخین ل 2016ێ شه‌هید كه‌تییه، لێ به‌لێ ژ نوو و پاش ده‌رباسبوونا 5 سالان په‌كه‌كه هاتییه و دبێژیت ئه‌م وان ب رێزداری ل بیر دئینین.
هه‌په‌گێ گۆتییه: «ئاخین میلیتانه‌كا نموونه یا ئاپۆی بوو، وێ ئه‌نه‌رژییا خوه ژ ئایدۆلۆژییا ئاپۆ وه‌ردگرت»!.
هێژای گۆتنێ یه، رێخستنا په‌كه‌كێ ژ بۆی چێكرنا شه‌رڤانان پشت به‌ستنێ ل سه‌ر ره‌ڤاندنا زارۆك و جوانێن كورد ژ هه‌ر چار پا‌رچه‌یێن كوردستانێ دكه‌ت، ئه‌ڤ یێك ژی ژ هێلا رێخستنێن مافێن زارۆكان و مافێن مرۆڤان یێن ناڤنه‌ته‌وه‌یی هاتییه ته‌سبیت كرن.
