پەکەکە ل سویدێ ژی ل دژی ناڤێ کورد و ئالایێ کوردستانێ دەرکەت
یانەیا داڵکورد (Dalkurd)، کو یانەیەکا فۆتبۆلێ یا ناڤدارا کوردایە ل وەڵاتێ سوید و ژ لایێ ھندەک گەنجێن کوردپەروەر و تژی ھێز و ھەستێن نەتەوەیی ڤە ل ھەرێما دالەرنە (Dalarna) ل وەڵاتێ سوید ھاتیە دامەزراندن، و د دەمەکێ کێمدا کاریە ئەنجامێن گەلەک باش ب دەسڤە بینە، کو باشترین ئەنجام ژی گەھشتنا وێ بوو ژ بۆ خۆلا نایابا فۆتبۆلێ یا وەڵاتێ سویدێ.
سوید بخوە ژی وەڵاتەکێ ئازادە و تاکە وەڵاتە ل ھەموو جیھانێ زمانێ زکماکی ب ئاوایەکێ فەرمی ل خواندنگەھێن دەولەتێ دھێتە خواندن مینا ھەر مژارەکا دن یا زانستی، و ھەر ڤی سەقایێ ئازاد وەکریە، کو رەڤەندێن بیانی ل زمان، چاند و کەلتورێ خۆ ببن خودان و ب ھاریکاریا دام و دەزگەھێن وی وەڵاتی سازی، یانە و کۆمەڵەیێن خوە دابمەزرینن و پاراستنێ ل چاند، کەلتۆر و ناسنامەیێن خوەیێن نیشتیمانی و نەتەوەیی بکەن، ھەلبەت ئەڤ دەلیڤە بۆ ڕەڤەندا کورد ژی ل ڤی وەڵاتی ھەلکەتیە، نەخاسمە بۆ کوردێن باکوور ئەوێن ل سەر ئاخا خوە، دەرئەنجامێ سیاسەتا شۆفینی و دەمارگیریا تورکی ژ مافێن خوە یێن بنەرەتی و خوەزایی بێبەش بووینە، ھەر ب مفا وەرگرتن ژ ڤێ ئازادیێ پەرتوکخانا کوردی، فیدراسیۆنا کۆمەلەیێن کوردستانی، ڕادیۆ، تەلەفزیۆنێن کوردی، و بزاڤا وەشان و چاپەمەنیێ گەشە کرینە، ژ ئالیێ سیاسی ژی ڤە وەکریە چەندین کورد بگەھن پلە و پۆستێن سیاسی و ئیداریێن بلند، ژبلی وێ پێشڤەچوونا د بیاڤێن ھزری و زانستیدا چێبووی.
دامەزراندنا ڤێ یانێ ژی ھەر دچارچۆڤێ ڤێ ئازادیێ دا ھاتیە، وان گەنجێن خوین گەرم ناڤێ داڵکورد (Dalkurd) دانا سەر ناڤێ یانا خوە و ئالایێ پیرۆزێ کوردستانێ بۆ لۆگۆیێ یانێ ھەلبژارت، ئەڤ چەندا ھان ژی بۆ ئەگەر کو پتر بالا کۆردان بۆ ئالیێ خوە ڕابکێشە و پڕانیا وان ژی چ ل سوید و چ ژی ل کوردستانێ و وەلاتێن دن یێن جێھانێ ڤێ یانێ مینا ملکەکێ خوەمالیێ ودەستکەفتەیەکێ نەتەوی ببێنن و ب ھەموو ھێز و شیانێن خوە پشتەڤانیێ بدەنێ.
مخابن ئیرۆ دەستێ ڕەشێ نەحەز و نەیارێن ناڤێ کورد و ڕەنگێن سپەھێ و جوانێن ئالایێ پیرۆزێ کوردستانێ کو سومبول و ھێمایێ یەکگرتن و یەکڕێزیا گەلێ کوردستانێ نە گەھشتنە ڤی دەستکەفتێ نەتەوەیی و ھەولێن خوە چڕ کرنە ژبۆ گھۆڕینا ناڤ و لۆگۆیێ یانێ.
نە تشتەکێ سەیرە کو پەکەکێ (pkk) ب پێش دوژمن و نەیارێن گەلێ کوردڤە ب ڤی کارێ کرێت و قڕێژ ڕاببە، چونکە د بنەڕاتدا پەکەکە بۆ کوشتنا ھێز و ھزرا نەتەویی ھاتیە چێکرن، بەلگەیێن ڤێ چەندێ ژی پشتڕاست دکەن گەلەکن، ئەگەر نە چاوە پەکەکێ ل شەنگالێ حەشدا وەحشی و سۆپایێ داگیرکەرێ عێراقێ قەبۆلە، لێ ھێزا پێشمەرگەی ئەوێ ب دەھان ھزاران ژ وان خوینا خوە ژبۆ ئازادیا کوردستانێ ڕژاندیە قەبۆل نینە، یان چاوە ل( ڕۆژڤالا) ئالایێ بەعس و پستالێن سۆپایێ خوینمێژێ ئەسەد قەبۆلە، لێ ئالایێ کوردستانێ و پێشمەرگەھێ ڕۆژ قەبۆل نینە ویان چاوە پشتی بزاڤا ڕزگاریخوازیا گەلێ کورد ل باکوورێ کوڕدستانێ ژ ھێز و ڤەژەن ئێخستی وێرێ چۆلکریە و بۆ تورکێن ھۆڤ و نەژادپەرست ھێشتیە.
بەلێ ھەر جھێ چریسکەکا کوردایەتێ و بێھنا نەتەوی و نیشتیمانپەروەریێ لێ بێ، پەکەکە وی جھی ب قادا کار و کریارێن خوەیێن کرێت و چەپەڵ دزانیت.
گەلۆ ما دەم نەھاتیە ب یەک دەنگ بێژێن پەکەکێ ئێدی بەسە؟؟؟
تێبینی: نڤیس بێی ت گوهەرینەک ژ مالپەرا فەیسبووکێ یا نڤێسەر هاتیە وەرگرتن.
