بۆچی ناکۆکی د ناڤبەرا بەرپرسێن تەڤگەرا ئازادی دا چێبوونە؟

بۆچی ناکۆکی د ناڤبەرا بەرپرسێن تەڤگەرا ئازادی دا چێبوونە؟

دناڤبەرا بەرپرسێن بلند یێن تەڤگەرا ئازادی دا، کو رێخستنەکا سەر ب پەکەکێ ڤە یە و ل باشوورێ کوردستانێ چالاکیان ئەنجام ددەت ناکۆکیێن کوور دروست بوونە، هەیا گهشتیە ئاستەکێ کو هندەک ژ بەرپرسێن ڤێ رێخستنێ گەفا ئاشکەرا کرنا راستیێن ڤێ رێخستنێ ل سەر مەدیایێ دکەن.

چاڤکانیێن پگەها دارکا مازی ل باشوورێ کوردستانێ ئاشکەرا کرن، پشتی کەشف بوونا گەندەلیێن د ناڤا رێخستنا تەڤگەرا ئازادی دا ناکۆکیێن هەری کوور و دژوار د ناڤبەرا بەرپرسێن ڤێ رخستنێ دا دروست بوونە، ب تایبەت پشتی بلندبوونا دەنگێ نەرازیبوونێ ل سەر گەندەلیێن تەڤگەرێ د ناڤا ئەنجوومەنا گەرمیان یا ڤێ رێخستنێ دا، ئەڤ دەنگێن نەرازی ب ئاوایەکێ راستەراست ژ لایێ دکتۆر ئازاد ڤە تێنە سەرپەرشتی کرن و رۆلەکێ سەرەکە هەبوویە د کەشف کرنا ڤان گەندەلییان دا.

چاڤکانیێن پێگەها دارکا مازی ئاشکەرا کرن، پشتی هەستکرن ب کوور بوونا پرسگرێکێ و بلندبوونا دەنگێن نەرازی د ناڤا تەڤگەرێ دا، دکتۆر ئازاد هاتیە ڤەخواندن ژ بۆی بارەگەها گشتی یا تەڤگەرێ و ل ور بریار ل سەر تەجمیدکرنا “سرکرنا” وی دهێتە دایین. پاش ڤەگەرینا دکتۆر ئازاد ژ بۆی سنۆرێ گەرمیان و هایدار کرنا کادرێن ئەنجوومەنا گەرمیان ژ تەجمیدکرنا خوە ژ لایێ تەڤگەرا ئازادی ڤە، پرسگرێک گەلەک ئالۆزتر و مەزنتر دبیت و نێزیکی نیڤا ئەندامێن ئەنجوومەنێ ل همبەر ڤێ بریارا تەڤگەرێ نەرازیبوونا خوە دیار دکن.

هەر وەها راگهاند، ژ ئالیەکێ دی دکتۆرە رابیعە عەباس قاسم یا بەرنیاس ب هەڤال ڤیان، کو ئەنداما گشتی یا تەڤگەرێ یە ل همبەر بریارا سرکرنا دکتۆر ئازاد دلگران بوویە و دەست ب گەف کرنێ ل کادرێن پایەبلندێن تەڤگەرێ کریە و داخواز کریە ئەڤ بریارە بهێتە هەلوەشاندن، لێ بەلێ تەڤگەرا ئازادی هیچ گرنگیەک ب گەفێن دکتۆرە ڤیانێ نەدایە، ژ بەر ڤێ یەکێ ڤیان نها گەفان ل تەڤگەرێ دکەت کو دێ پرسگرێک و گەندەلیێن پەکەکێ و تەڤگەرا ئازادی د مەدیایێ دا کەشف کەت، لێ بەلێ هەیا نها هیچ کارەک ئەنجام نەدایە.

تەڤگەرا ئازادی یەک ژ رێخستنێن سەر ب پەکەکێ ڤە یە کو ل سالا 2014ێ ل باشوورێ کوردستانێ هاتیە دامەزراندن و نها ل باشوورێ کوردستانێ و ئیراقێ چالاکیان دکەت و ب باسکێ سەرەکی یێ پەکەکێ ل باشوورێ کوردستانێ دهێتە ناسکرن، ل سالا 2019ێ دا ل سنۆرێ هەر یەک ژ سلێمانی و گەرمیان و راپەرین ژ لایێ ئێکەتیێ ڤە بارەگەهێن وان هاتنە داخستن، نە پەکەکێ و نە ژی تەڤگەرێ هیچ کارڤەدانەک جدی ل همبەر ڤی کارێ ئێکەتیێ نیشان نەدا.

پوستێن ھەمان بەش