شرۆڤەیەک کورت ژ بۆ داخویانیا دوهی و ئەڤرۆ یا هەپەگێ!
ناڤەندا راگھاند و چاپەمەنیا ھەپەگێ ئیرۆ رۆژا سێشەمبی 16/2/2021ێ ل سەر ئۆپەراسیۆنا ترکیێ یا ب ناڤێ پەنجە باز 2 کو ل چیایێ گارە ئەنجام دا، داخویانیەک بەلاڤکر و تێدا راگهاند کو ترکیا د ڤێ ئێریشێ دا چەکێ کیمیاوی بکارئانیە.
هەپەگێ د داخویانیا خوە دا ژ بۆ روودانا ل دەڤەرا کو دیل لێ دھاتنە زیندانیکرن یا ل ناڤچەیا سیانێ یا ھەرێما گارە راگهاندیە، “داکۆ ب رەنگەکی زەلال و بەربچاڤ بوویەر بهێتە فێھمکرن ھێزێن مە گھشتنە ڤێ کامپێ. لێ ل گەل کو 3 رۆژ ل سەر بوویەرێ دەرباس بوونە ژی ل کامپا ئێخسیران و ل دەردۆرێ وێ بێھنا گازەکا گران و کمیاوی ھەیە و وسا خوەیا دکە کو ژبەرکو ژ لایێ دەولەتا ترکا فاشیست ڤە ل سەر ڤێ کامپێ چەکێ کیمیاوی ھاتیە بکارئانین، مرۆڤ نکاریت بکەڤیتە ناڤ کامپێ و ب ئیحتیمالەکا مەزن ھەر کەسێ ل کامپێ پشتی کو ب گازا کمیاوی ھاتینە کوشتن پشترا گوللـە ل وان ھاتیە رەشاندن. نیشانەیێن پێشی کو ئەم گھاشتنێ ئەڤن.”
هەپەگە د ڤێ داخوەیانیا خوە دا گومانێ تێخیتە سەر داخویانیا خوە یا پێش نها، دەما تێدا راگهاندی ئێخسیر ژ لایێ دەولەتا ترکیێ ب بۆمبەبارانێ هاتینە کوشتن، ژبەرکو ژ لایەکێ دبێژیت کەس نکاریت ژ بەر بێهنا گازەکا کیمیاوی کو ئەو ب خوە ژی نزانین چ گازەکە بکەڤیتە شکەفتێ و لەکۆلینان ل سەر بوویەرێ بکەت، و ژ لایەکێ دی ژی ترکیا ب بکارئانینا چەکێ کیمیاوی ل دژی وان ئێخسیران سووچبار دکەت و دبێژیت ” خەباتێن ژ بۆ زەلالکرنا راستیا کۆمکوژیێ کو دەولەتا ترکا ژ مرۆڤاھیێ بەهرا خوە نەستاندی ل سەر کامپا ئێخسیران پێک ئانیە بەردەوامن”، ل ڤڕ ئەم ناخوازین بریارێ ل سەر بوویەرێ بدەین کا کێ و ژ بۆی چ ئەڤ کارە ئەنجام دایە و کی سووچبارە، لێ داخوینیێن یەک ل پەی یەک یێن پەکەکێ و ترکیێ هەر تشت شوولی کریە و کەس نکاریت راستیێ بزانیت.
د داخویانیا هەپەگێ دا هاتیە، ” ئەنجامێن زەلال و بیلانچۆیا شەرێ گارە ژ ھەموو لایەنا ڤە دێ ب گەلێ مەیێ وەلاتپارێز و رایا گشتی را هێتە پارڤەکرن”، ئەڤ یەک دیار دکەت کو هێژان ئەنجام نەهاتینە زەلالکرن لێ بەلێ پەکەکە پێش کو ئەنجامان زەلال بکەت وەکو هەرجار و دەما ژ بۆی هەر کارەکی پێش وەخت بریارێ ددەت ژ بۆ ڤێ یەکێ ژی پێش لێکۆلین ب داوی بهێن بریارا خوە دایە.
هەر وەها هەپەگە رادگهینییت 10ێ شوباتا 2021ێ ل دژی تەڤگەرا داگیرکرنێ کو ئارتێشا ترکیا یا داگیرکەر ل سەر قادا گارە دایە دەستپێکرن ب پێشەنگیا گەریلایێن ئازادیا کوردستانێ یێن قەهرەمان 4 رۆژان بەرخوەدانیەکا داستانی ھاتیە کرن و ب سەرفرازیەکا دیرۆکی ئارتێشا ترک ھاتیە تەرتووبەلاڤکرن”، لێ بەلێ دیسان پێش نها هەپەگێ راگهاندبوو کو وان رێ نەدایە لەشکەرێن ترکیێ داکەڤن ناڤچەیێ و چەکدارێن وان رێ ل داکەتنا لەشکەران گرتیە.
هەپەگە جیهێ ئێخسیران ب کامپا ئێخسیران ب ناڤ دکەت، ب ئاوایەکی کو مرۆڤ وسا دفکریت ئەو کامپ ژ بۆی کەسێن سڤیل و بێ گونەهـ هاتیە ئاڤاکرن، لێ بەلێ ب گۆتنا پەکەکێ بخوە کەسێن ل وڕ هاتیە زیندانی کرن هەر هەموو ئەو کەس بوون کو ژ بۆی میتا ترکیێ کار دکر، و لەشکەرێن ترکیێ بوون، ژ ئالیەکێ دی هەر کەس دزانیت کو چ “کامپ” زیندانەک د جیهانێ دا بێ زێرەڤان نینە، پرسا ل ڤڕ سەر هل ددەت ئەڤەیە، گەلۆ گەریلایێن زێرەڤانی ل ڤێ “کامپێ دکر” چ ب سەرێ وان هاتیە؟! ئەو ژی هاتینە کوشتن یان ژی پێش بۆمبەبارانێ ئەو جیهـ بجیهـ هێلایە؟! گەر ئەو جیهـ پێش بۆمبەبارانێ بجیهـ هێلایە، بۆچی گرتی ل گەل خوە نەبرینە؟! ئەڤە ژ لایەکێ و ژ لایەکێ دی، هەپەگێ پێش نها راگهاندبوو هیچ لەشکەرەکێ ترک نکاریە بکەڤیتە هەرێما گارە! ل ڤر ژی ئەم دپرسین گەلۆ گەر هیچ لەشکەرەک ژ بەر بەرخوەدانا قەهرەمانی یا پەکەکێ نەکەتبیتە چیایێ گارە کو پەکەکە ب “هەرێما پاراستنا مەدیا” ب ناڤ دکەت، بۆچی د ڤێ داخوەیانیێ دا دبێژیت “پاش سێ رۆژان ئەم چووین هەرمێ”؟ گەلۆ د وان سێ رۆژان دا هوون ل کو دەرێ بوون و وە ل کودەرێ بەرخوەدانا قەهرەمانی ئەنجام ددا؟!
پێدڤیە پەکەکە داخویانیان ب کەسێن ژیر و عاقلمەند بدەتە نڤیساندن، ژبەرکو کەسێن داخویانیێن وان دبینن و دخوینن نە ب تەنێ ئالیگرێن وانن کو هەر تشتێ پەکەکێ گۆت بێ هزرکرن باوەر بکەن، کەسێن بێ لایەن یێن کورد و بیانی ژی هەنە کو داخویانیێن وان دشووپینن و دکارن جوداهیێ د ناڤبەرا داخویانیان وان یێن هەڤدژ دا بکەن.
