ئۆپەراسیۆنا گارە یا کو 10 شوباتێ دەستپێکری ب دوماهی هات، د ئەنجامدا دیار بوو د ئۆپەراسیۆنێ دا 13 عەسکەرێن ترکیا ھاتینە کوشتن. نها رۆژەڤ هەموو ل سەر ڤان 13 عەسکەرانە. لێ بەلێ د ڤێ ئۆپەراسیۆنێ دا نە تەنێ ئەڤ 13 کەسە ھاتبوونە کوشتن. لاوێ کوردا جۆتیار موحسن ژی ھاتیە کوشتن. کەس باس ل وی ناکەت. ژ بەر کو ئەو کوردە دشێت بهێتە کوشتن.
راگاھاندنا پەکەکێ و رێڤەبەریا وان ئەڤە چەند رۆژن ئیددیعا دکەن کو ئەو ژ بۆی کەسێن دیلگرتی (ئێخسیر) ھەر دام ب یاسایێن ناڤنەتەوی ڤە گرێدایی بوونە و ئۆجالان سالا 1995ێ راگھاندیە کو ئەو چ جاران عەسکەرێن دیل ناکوژن. ئەم دکارین بێژین کو ئەڤ تشتە راستە، لێ بەلێ تەنێ ژ بەر کو دیل گرتیێن ترکن نەھاتنە کوشتن. لێ بەلێ ئێخسیرێن کورد کو د دەستێ پەکەکێ دانە گەلەک جارا ھاتینە کوشتن. ئەڤە نەفسیەتا گەلێ بندەستە. ئەڤ مللەتێن دی ناهێن کوشتن لێ بەلێ کەسێن گەڵێ خوە دکوژن و وان بن ئاخ دکەن. پەکەکە گەلەک جارا مرۆڤێن کورد ناڤ گوندان، ل سەر رێکا ب ناڤێ سیخۆریا دەولەتا ترک گرتینە و بێ دادگەھ ھاتینە کوشتن. ژ خوە پەکەکێ گەلەک جارا ئەڤ کەسە کوشتینە و ب دارەکێڤە گرێداینە. ھەمان دەم گەلەک ئێخسیر د دەستێ پەکەکێ دا راستی ئیشکەنجەدانێ ھاتینە. ئەو کەسێن کو جارەکێ بکەڤنە زیندانا پەکەکێ دا دبێژن جارەکا دی ئەم دێ خوە کوژین لێ بەلێ ئەم ناکەڤینە زیندانا پەکەکێ دا. پەکەکە تەمامەن وەکو دەولەتا ترک سەرەدەریێ ل گەل ئێخسیران دکەت. جگارەیان ل سەر لەشێ گرتیا دڤەمرینن، کارەبایێ لێ ددەن، ئاڤا سار پێدا دکەن، و گەلەک ئشکەنجەیێن دی ل ئێخسیران دکەن. خوە ھەندەک کەس وەها دبێژن کو بەس داکو ژ ڤێ ئیشکەنجێ خلاس ببم وان چ گۆت من قەبوول کر.
ل گۆر ئاگاھیێن دەستێ مە دا ل زیندانێن خواکورک و گەلیێ زاپێ دا گەلەک گەنج ب گومانا سیخۆریێ ھاتینە ئیشکەنجە کرن و د ئەنجامێ ڤان ئیشکەنجەیا ژیانا خوە ژ دەست دانە یان ژی خوە کوشتنە. لێ ئەڤ تشتە ب تەنێ ژ بۆی کوردایە. نە ژ بۆی عەسکەرێ ترکە. کەس بەحسا زارۆکێن کوردا ناکەت.
ئەو زارۆکێن کو بەحسا وان ناهێتە کرن یەک ژ وان ژی جۆتیار موحسن یێ ژ باژێرێ ئامێدیێ بوو. جۆتیار ئەڤە سالەک و دەھ رۆژ بوو د دەستێ پەکەکێ دا بوو. جۆتیار 23 شوباتا 2020ێ ل گوندێ سیارێ ژ لایێ پەکەکێ ڤە ھاتبوو گرتن. گرتنا وی ب رەنگێ پیلانگێریێ بوو. پەکەکێ کچەک ب کار ئینا و وێ کچکێ ل سەر سۆسیال مەدیایێ پەیوەندیێ د گەل جۆتیار چێکرن. شەڤەکێ گۆتە جۆتیار ئەز دوخوازم ئەم پێکڤە پیچەکێ بگەرین. کچک و جۆتیار دەما چوویە دەرڤەی باژێری گەریلایێن پەکەکێ جۆتیار گرت.
کەسێن دەردۆرا وی گۆتن کو جۆتیار هیچ پەیوەندیەک ل گەل پەکەکێ دا نینە. ئەو کەسەکێ دوورە ژ سیاسەتێ. 5ی گولانا 2020ێ خەلکی ژ بۆی ئازادیا وی خوەپیشاندانەک ئەنجامدا. لێ بەلێ پەکەکێ چ بەرسڤا خالکی نە دا. راگەهاندنا هەپەگێ ئیدیعا کر کو جۆتیار سیخۆرە. دایک و بابێن جۆتیار ئەڤ تشتە ب توندی رەدکرن.
نھا ئەم دپرسین؛ کێ جۆتیار کوشت ترکیا یان پەکەکێ؟ ئەساسەن ئەم دکارین بێژین کو ھەر دو لایەنا پێکڤە جۆتیار کوشتیە. ژبەرکو پەکەکێ هەردەم د گۆت ئاژانە لێ ئەگەر ئەو کورد بیت دبیت بهێتە کوشتن، لێ ترک بیت دبیت کو بەر لێبۆرینێ بکەڤیت. جۆتیار هەر دا هێتە کوشتن. بێ دادگەھ، بێ لێپرسین، بێ عەدالەت. ژ بەر ڤێ یەکێ بکوژێ جۆتیار ھەم پەکەکە و ھەم ژی ترکیا یە.
