ل دەربارا ئۆپەراسیۆنا لەشکەرێ ترکیێ ل سەر چیایێ گارە ل باشوورێ کوردستانێ، فەرمانداریا بریارگەھا ناڤەندی یا پاراستنا گەل (نەپەگێ) راگهاندنەک بەلاڤکر و تێدا باس ل ئامارێن کوشتی و بریندارێن لەشکەرێ ترکیێ و چەکدارێن خوە کریە، دیسا داخویانیەک نڤیساندیە کو ژ بلی پەسنا خوە تو تشتەک دن تێدا نینە.
ئەڤە دەما ٢٠ سالان پێترە کو پەکەکە باس ل نەمانا رەژیما ترکیێ دکەت
نەپەگە د ڤێ داخویانیا خوە دا دبێژیت، کو چاوا تێکچوونا شوباتا 2008ێ یا ل زاپێ بوو دەستپێکا ب داویبوونا وەسایەتا ئارتێشێ، تێکچوونا شوباتا 2021ێ یا ل گارە ژی دێ بیتە دەستپێکا بداویبوونا رەژیما فاشیست. ئەڤ دەما 20 سالان پێترە کو پەکەکە باس ل نەمانا رەژیما ترکیێ دکەت، هەر سال پەکەکە باس سەرکەفتنا ل سەر رەژیما ترکیێ دکەت ل بەلێ د پراکتیک دا هیچ سەرکەفتنەک ل گۆرێ نینە، پەکەکە ب ڤێ ئاخافتنێ ب تەنێ گەنجێن کورد ژ بۆی بەرژەوەندیێن خوە ددەتە کوشتن و هەر سالا دەرباس دبیت رەژیما ترکیێ نە ب تەنێ ژ ناڤ ناچیت بەلکو بهێزتر ژی دبیت، بەشەک ژ ڤێ بهێزبوونێ ژێ ب تایبەتی ل رۆژهەلاتا ناڤین ب سایا سەرێ پەکەکێ یە، ژبەرکو پەکەکە دکەڤیتە هەر ناڤچەیەکا کو ترکیا بخوازیت داگیر بکەت.
پەکەکە ل شوونا دەولاتا ترکیا، ئاکەپێ و مەھەپێ تاوانبار دکەت
نەپەگێ دیسا ژ بۆی بچووککرنا ڤێ ئێریشێ و بێ گونەهـ نیشاندانا دەولەتا ترکیێ، هەر یەک ژ ئاکەپێ و مەهەپێ تاوانبار دکەت و دبێژیت، ” ئاشکەرایە کو ئەڤ ئێرشا ژ لایێ رەژیما ئاکەپێ-مەھەپێ و ئەرگەنەکۆنێ ڤە ھاتیە کرن ژ لایێ سیاسی و لەشکەری ڤە خوەدی ئارمانجێن مەزن بوو. ئەم پێویستیێ پێ نابینن کو ئارمانجێن سیاسی یێن ڤێ ئێرشا بەرفرەھ بنرخینن”، ئەم ل ڤڕ ژ پەکەکێ دپرسین گەلۆ چما هوون ئارمانجێن سیاسی یێن ڤێ ئێریشێ نانرخینن؟!! قەی ئەو ئارمانج هندە بێ بوهانە کو نەهێنە نرخاندن یان ژی ژبەرکو د ئەساس دا ئەو ئارمانج و ئارمانجێن پەکەکێ کو خوە د چارچۆڤا میساقا مللی یا ترکیێ دا دبینن یەکن؟! بەلێ بێ گۆمان ژ بەر ڤێ یەکێ یە کو هوون و ترکیا لسەر یەک خەت کو ئەو ژی خەتا ژناڤبرنا ستاتویا هەرێما باشوورێ کوردستانێ یە تەڤ دگەرن.
پەکەکە ژ لایەکێ دبێژیت، ئارتێشا ترک خوقست ئێخسیران د دەستێ مە دا وەربگریت و ژ لایەکێ دی ژی دبێژیت ئەڤ ئێریش نە ژ بۆ رزگار کرنا ئێخسیران بوو
د ڤێ داخویانیا پەکەکێ دا کو ل سەر ناڤێ نەپەگێ دایە وەشاندن ژی، دیسا هندەک تەڤلیهەڤی هەنە کو داخویانیێن پەکەکێ یێن پێش نها ل سەر ناڤێ هەپەگێ و کەجەکێ دایە بەلاڤکرن تێخیتە بن هندەک پرسیاران، نەپەگە د ڤێ داخویانیا خوە دا دبێژیت، “ئارتێشا ترک ھەم ب بەلاڤبوونا ل قادێ خواست ب رەنگەکی مایندە لێ ب جھ ببیت، ھەم ژی خواست ئێخسیرێن د دەستێ مە دا وەربگریت. ئەڤ ئێرش نە ژ بۆ رزگارکرنا ئێخسیران بوو، تەقەز ژ بۆ ژناڤبرنا وان بوو”، هەر چەند کو د ڤێ رێزە نڤیسینێ ب خوە دا ژی تەڤلیهەڤی هەیە ژبەرکو ژ لایەکێ دبێژن، ئارتێشا ترک خوەست ئێخسیران د دەستێ مە دا وەربگریت و ژ لایەکێ دی ژی دبێژیت ئەڤ ئێریش نە ژ بۆ رزگار کرنا ئێسیران بوو، تەقەز ژ بۆ ژناڤبرنا وان بوو! گەلۆ گەر ژ بۆی رزگار کرنا وان نەبوویا چما نەپەگە دبێژیت ئارتێشا ترکیێ خوەست ئێخسیرێن د دەستێ مە دا وەربگریت؟! دیسا ئەڤ گۆتن ل دژی گۆتنا هەپەگێ یە دەما دوهـی د داخویانیەکێ دا راگهاندی ئارتێشا ترک نەکاری بکەڤیتە هەرێمێ؟! ئەم ژ پەکەکێ دپرسین گەر ئارێشا ترکیێ نەکەتبیتە زیندانا ئێخسیران کو هوون ب کامپ بناڤ دکەن، چەوا جەنازەیێن ئێخسیران دیتن و کوشتنا وان راگهاند؟ چما هەپەگێ ب هیچ رەنگەکێ باس ل پاراستنا زیندانێ نەکر لێ نها هوون تێن و دبێژن 6 گەریلایا ژ بۆی پاراستنا “کامپێ” جان دا؟!
پەکەکە ژبەر فەرمانا ئاپۆ یا د چارچۆڤا میساقا مللی دا پێشنیاری دەولەتێ کری خوە ب سەرکەفتی نیشان ددەت
نەپەگە دبێژیت، ” ئەردۆگان و باخچەلی، ژ بۆ کو تەمەنێ رەژیما خوە درێژ بکەن دخوازن خوە سەرکەفتی نیشان بدەن، ب ڤی رەنگی چیرۆکێن خوە یێن سەرکەفتنی وەکی کو راستە نیشان ددەن و ژ بۆ ڤێ ژی ئۆپەراسیۆنەکا ب ڤی رەنگی ئەنجامدا. ئەڤ ئۆپەراسیۆنا ئێرشێ ب ئاگاھداریا ھێزێن ل سەر ھەرێما ناڤبۆری سەروەرن و ھەتا رادەیەکێ ب پشتگریا وان ھاتە پلانکرن و ب ڤی رەنگی خواستن تەقەز ئەنجامێ وەربگرن”، گەلۆ گەر مەرەما ئاردۆگان و باخچەلی ئەو بیت، مەرەما وە چییە کو هوون ژی وەکو وان خوە ب سەرکەتی دبینن؟!! ئەو ژ بۆی درێژکرنا ژیێ رەژیما خوە ب ڤی رەنگی داخویانیا ددەن و هوون ژی ژبۆی درێژ کرنا ب کوشتن دانا گەنجێن کورد و ب دەستڤەبەردانا زێدەترا خاکا باشوورێ کوردستانێ و جێبەجێکرنا فەرمانا عەڤدلا ئۆجالان یاکو د ئیمرالیێ دا ژ بۆ داگیرکرنا هەولێرێ د چارچۆڤا میساقا مللی دا پێشنیاری دەولەتێ کری خوە ب سەرکەفتی نیشان ددەن.
روحا فەدایی یا ئاپۆ کیژان روحە؟!!
یا هەری سەیر د داخویانیا نەپەگێ دا باسکرن ل وان گەریلایانە کو د ئۆپەراسیۆنێ دا جانێ خوە ژ دەست دایی، نەپەگە دبێژیت گەریلا ب “رۆحێ فەدایییێ ئاپۆ”، تەڤگەریان و خوە فەدا کر و روو ب روو شەرێ ئارتێشا ترک کر، ب راستی ژی گەلەک سەیرە، پەکەکە وە هزر دکەت کو بیردانکا کوردان وەکو یا ماسی یە و ب تەنێ 6 چرکەیا خوە دگریت، گەلۆ قەی کورد دێ ژ بیر کەن ئۆجەلان ب چ رەنگ بێکو بەرخوەدانەکێ بکەت ل کینیایێ خوە رادەستی ترکیێ کر؟! قەی ئەو بەرخوەدان بوو؟! ما قەی دێ ژبیر کەن دەما ل کینیایێ پاسەوانا ئاپۆ گۆتیە وی، “تەپانجێ بگرە و ل بەر خوە بدە”، ئۆجەلان گۆتێ نا ئەز ناخوازم بەرخوەدانەکا کلاسیک بدمە مەشاندن! گەلۆ قەی ئەڤ بەرخوەدانا گەریلایان وەکو یا ئۆجالانە؟! ب راستی ژی گەلەک شەرمە پەکەکە گەریلایان وەکو ئاپۆیێ کو خوە تەسلیمی ترکان کری بدەتە نیشاندان. ئەم کورد چ جاران ژ بیر ناکەین دەما د بالەفرێ دا ئۆجالان گۆتیە ئەندامێن میتێ “ئەز ژ ترکیێ رە حەز دکم، ئەز ژ بۆی خزمەتکرنا ترکیێ ئامادەمە….”؟! نا ب راستی ژی ئەم نکارین ژ بیر بکەین.
