ئەندامێ  ئەنەکەسێ فوئاد براھیم کو ل دێرکێ دژییا، بەری چار سالان، د 24ێ ئادارا 2017ێ دا، ژ لایێ ھێزێن ئاساییشا گشتی یا پەیەدێ ڤە ھاتە دەستەسەر کرن، ژ وێ رۆژێ ڤە، مالباتا وی هیچ ئاگاهیەک ل سەر رەوشا وی نینە. د چارەمین سالا رەڤاندنا وی دا، ژن، زارۆک و دایکا وی بانگا ئازادکرنا لاوێ خوە فوئاد براھیم کر.

فوئاد براھیم ژ باژێرۆکێ دێرکێ گوندێ شەکرخاچ بوو، دەما کو ھاتیە رەڤاندن تەمەنێ وی 46 سال بوون. فوئاد وەلاتپارێزەکێ جوانێ کوردە و خوەدی 8 زارۆک بوو. دەبارا ژییانا خوە ب جۆتکاریێ دکر. چار سال بەرێ، د 24ێ ئادارێ دا، ئەو د ناڤبەرا گوندێن مامەشور و شەکرخاچ دا ژ ترۆمبێلێ ھاتە دەرخستن و برن. ژ وێ رۆژێ پێ ڤە هیچ نووچەیەک ژێ ناهێتە زانین. لێ بەلێ، بوویەرەکا کریارێ وێ نەدییار نینە ژ بەر کو ژ لایێ ھێزێن ئەولەھیێ یێن گرێدایی پەیەدێ ڤە هاتیە رەڤاندن. ژ بەر کو پشترا ھێزێن پەیەدێ دەما کو ئەو رەڤاندنی سویچێ ترۆمبێلێ رادەستی مالباتا وی کرن.

فوئاد براھیم بۆچی ھاتە رەڤاندن؟

مالباتا فوئاد براھیم، گوندێ وی و خوە گوندێن نێزیکێ وان ژی دلسۆزێن تێکۆشینا بارزانی بوون. ھێژ د سالێن 1960 ێ دا، مالباتا وی دلسۆزێن پەدەکێ بوون. فوئاد براھیم د تەمەنەک جوانتر دا ب رەنگەک چالاک بەشداری تێکۆشینا رزگاریا نەتەوەیییا کورد دبیت. ئەو گەلەک جاران ژ لایێ رژیمێ ڤە ھاتیە بنچاڤ کرن. دەما کو بوویەرێن ل سووریێ د 2010ێ دا دەست پێ کری، فوئاد براھیم پڕ چالاکتر خەباتێ دکەت. ئەو ئەندامێ ئەنەکەسێ یە و حەتا دەستەیا گشتی ژی ئەرکدار دبیت. دەما کو دەستەیا بلندا کورد ھاتیە دامەزراندن، ئەو وەکی ئەندامێ مەجلیسێ ھاتە ھەلبژارتن. ئەو ژ بەر خەباتا خوە گەلەک جاران ژ لایێ پەیەدێ ڤە ھاتیە بنچاڤ کرن. بەری کو بهێتە رەڤاندن دیسا 5 مەھان ھاتبوو بنچاڤ کرن. د ڤێ بنچاڤکرنێ دا ل چریا 2016ێ، ئێشکەنجەیەکا گران ل وی ھاتە کرن و دەما کو ھاتیە بەردان 10 رۆژان ل نەخوەشخانەیێ ما. ئاساییشا پەیەدێ ژێرا گۆتن: “ئەڤە ئینزارا داویێ یە، جارەکا دی ئەم مافێ ژیانێ نادەینە تە” گەفا کوشتنێ ل وی ھاتە کرن.

گەفێن ئاساییشا پەیەدێ ل فوئاد براھیم کری جێبەجی بوون و پشتی ھاتیە گرتن ھەیا نووکە چ ئاگاھی ژێ نایێن زانین.

ژنا براھیم دەما کو قالا بوویەرێ دکەت وھا دبێژیت: “فوئاد ل گەل کۆمەک گوندیێن مە چوو سەرساخیێ. گاڤا ئەو دەرەنگ مای و نەھاتی، من گازی گوندیان کر، وان گۆت کو ئەم دەمژمێر 4 ڤەگەریان و مە پاشێ ئەو نەدیت. گوندیێن ژ باژێر هاتی گۆتن کو ترۆمبێلا فوئاد ل دەرڤەیی گوندی یا راوەستیایی بوو. ئەم چووین، کەس تێدا نەبوو، پشتی هنگی ئاپۆچی (ئاساییشا پەیەدێ) ھاتن. وان سویچێ تۆمبێلێ دا مە، مە گۆت فوئاد ل کویە، وان گۆت ” پرسیاران ژ مە نەکەن” و چوون. مە ژ وێ رۆژێ ڤە سەری ل ھەر دەڤەرێ دا، لێ ئەم نکارین دەربارێ وی دا تشتەکێ گوھلێبین “.

دایکا براھیم ئەڤ تشتە گۆتنە کورێ خوە: “زارۆک کەزەبە، مێلاکا من دشەوتیت، جەگەرا من وندا دکەت، ٨ زارۆکێن فوئاد ھەنە، ھەمی ژی بێ چاڤ مان. زارۆکا وی یا مەزن کەچا وییە کو دچیتە پۆلا داوییێ. دێ کی ڤان زارۆکان خوەدی کەت؟ ئەز نکارم بێژم بەسە، لێ بلا وی یان مری یان ژی زندی بدەنە مە “

رەڤاندنا فوئاد براھیم نە کریارا پەیەدێ یا یەکێ یە. گەلەک کەسایەتی و چالاکڤانێن سیاسی یێن کو ھاتینە رەڤاندن ھەنە. ئەڤە ھەموو ئالیگر و ئەندام و کادرێن پارتیێن دەرڤەیی خەتا پەکەکێ نە. رایا گشتی ھاتە ترساندن کو ئەندامێن پارتیێن سیاسی یێن دەرڤەیی خەتا پەکەکێ تەسفیە بکەن. خانی ژ لایێ کەسێن نەناس ڤە ھاتن شەوتاندن، پەنجەرە ھاتنە شکاندن، مرۆڤ ھاتنە لێدان. زەختەک ئابۆری ل سەر مرۆڤان ھاتە فەرز کرن. کرین-فرۆتن ژ بلی ئەندامێن پەیەدێ و پێشخستنا تێکلیێن بازرگانی نەھاتنە پەژراندن. ئەم دکارین بێژین کو تاکتیکا پککێ ل رۆژئاڤا د دەتە مەشاندن ” کەسێن نە پەکەکەیی ب زۆرێ بدەنە کۆچبەر کرن و ھەرێمێ مەحکووم یەک حیزبێ ئانکو پەکەکێ بکەن.

رێخستنا ب ناڤێ “جوانێن شۆرەشگەر”یێن سەر ب پەکەکێ ڤە وەکو ئاساییشێ کار دکەن و دەستوەردانێ ل ھەموو کاران دا دکەن. مرۆڤان دگرن و تەھدید دکەن. حەتا جار ب جار، ئەو ب جلوبەرگێن لەشکەرێن رژیمێ دگەرن و مرۆڤان ئیشکەنجە دکەن. ژ بەر ڤێ سەدەمێ گەلەک کەس ناچار مان کو ژ رۆژئاڤا دەرکەڤن. یێن کو دەرنەکەتین نەچار مان کو د ناڤ خوە دا بژین، ھەما ھەما مینا جڤاکەک بچووک، و د بن تەجریدەکا تووند دا. ئەم دبێژینە بکەرێن بوویەرێ ئاساییشا پەیەدێ، لێ د راستیێ دا ئەو دبێژنە خوە ھێزێن ئاساییشا باکورێ سووریێ. ئەم دزانین کو ئەو ھێزەکا  سەر ب پەکەکێ ڤە یە.

مخابن، د مۆدێلا کۆنفەدەرالیزما دەمۆکراتیک دا، یا کو پەکەکە دبێژیت ھەمی کەس دکارن ب ھەڤ را بژین، تەنێ دەرفەتا ژیانێ ب کەسێن د بن سەیوانا پەکەکێ دا دهێتە دان، کەسێن نە د گەل پەکەکێ ل رۆژئاڤا، ژیان ل وان جەهەنەمە. عەرەبێن کو ل گەل داعشێ، سووریانی و گەلێن دی دکارن ل رۆژئاڤا بژین، لێ بەلێ کوردێن نە ئاپۆچی ل رۆژئاڤا نکارن بژین.

 کەچا 7 سالی یا فوئاد ژ بۆ مەدیایان گۆت، “گاڤا بابێ من ل مالێ بوو، ئەو دا چیتە باژێری و ژ بۆ مە خوارن و جلووبەرگ دئینان، ئەز دا پر کەیفخوەش بم، لێ ئێدی کەس تشتەکێ ژ بۆ مە نایینیت، ئەز دخوازم بابێ من بە سەربەست بەردان، ئەز دخوازم دیسا شا بم. ” لێبەلێ، فوئاد کەسەک نە چەکدار بوو، زەرەرەک نەدگەهاند هیچ کەسەکێ، تەنێ سیاسەتا پەیەدێ رەخنە دکر.

گاڤا کو دەولەت تاوانبارەکێ کورد ئاشکەرا دکەت، ھەمی کورد رادبن سەر پییان، لێ کوردەک 50 سالی ژ لایێ ئاسایشا پەیەدێ ڤە دهێتە رەڤاندن و ئەڤ یەک وەکی رەوشەکا نۆرمال و سرۆشتی دهێتە حەسباندن. ل سەر رەڤاندن و بوویەرێن کوژەرێن وان نە دییار ل ترکیا، دایکێن کەسێن وندا دەستپێشخەریەک ب ناڤێ “دایکێن شەمییێ” دەستپێ کرن و گەلەک سالان بەردەوام کر. ووسا دایرە کو دێ د دەمەک نێزیک دا کورد نەچار بن کو چالاکیەک ووسا ژ بۆ کوردێن کو ژ لایێ رژیما پەیەدێ ڤە ھاتینە رەڤاندن ژ بەر بکەرێن نەدیار هێتە رێکخستن. پەیەدە بەرپرسیارە ژ کەسێن کو ھاتینە رەڤاندن و ونداکرن. ئەو کەسێن ژ بەر ڤێ بوویەرا فوئاد براھیم بێ دەنگ دمینن شریکێ ڤان کریارێن نەباشن و پێویستە بەرسڤێ بدەنە کەچا تەمەن 7 سالی کا دێ بابێ وێ فوئاد براھیم کەنگێ ڤەگەریتە مالێ و یاریکا ژ بۆی وێ ئینیت.