پارتیا ئازادیا کوردستانێ (پاک) د سالڤەگەرا بریارا 688ێ یا ئەنجوومەنا ئاسایشێ دا کو ژ بۆ پاراستنا گەلێ کورد ژ ئێرشێن رەژیما بەعس ھاتبوو وەرگرتن، راگھاند کو “بریارا 688ێ یا نەتەوێن یەکگرتی بوویە بنگەھێ ھەرێما فەدەرال یا کوردستانێ”
پاکێ ب بۆنەیا دەرباسبوونا 30 سالا د سەر پرۆژەبریارا 688ێ یا ئەنجوومەنا ئاسایشا نەتەوێن یەکبوویی پەیامەک بەلاڤ کر و تێ دا دبێژیت دڤێ گاڤێن فەرەنسا، ئەمەریکا و ھندەک دەولەتێن دی یێن کو ژ بۆ هاریکاری و پشتگرییا د سالا 1991ێ دا دانە گەلێ باشوورێ کوردستانێ نەهێن ژبیکرن.
د پەیاما خوە دا پاک دبێژیت: “2یێ تەباخا 1990ێ دەولەتا ئیراقێ کو سەدام حوسێن دەستھلاتدار بوو، کووەیت داگیر کر. سەدام حوسێن گوھداریا نەرازیبوونێن دەولەتێن جیھانێ نەکر و ھەر ل سەر داگیرکرنا کووەیتێ ما. ب پێشەنگیا ئەمریکایێ، ل گەل فەرەنسا، عەرەبستانا سعوودی، سووریێ، مسرێ 37 دەولەتان وەک ھێزا ھەڤپەیمانیێ، د رۆژا 27ێ چلەیا 1991ێ دا ب ئێریشێن ھەوایی تەڤگەرەکا لەشکەری ل دژی ئیراقێ دەستپێ کرن. د رۆژا 24ێ شوباتا 1991ێ ژی تەڤگەرا لەشکەری یا بەژایی دەستپێ کرن. پشتی ڤێ تەڤگەرا لەشکەری یا ھێزێن ھەڤپەیمانیێ، ئیراق مەجبوور ما ژ کووەیتێ ڤەکێشیت. پشتی کووەیت ژ داگرکەرییا ئیراقێ ھاتە رزاگار کرن، د 1ێ ئادارا 1991ێ دا ئاگربەست ھاتە راگەهاندن.
گەلێ کوردستانێ پشتی کو سەدام حوسێن ل کووەیتێ شکەست خوار، ژ بۆ رزگاری و ئازادیێ راپەرین دەستپێ کر. ب مداخلە و رێکخستنا بەرەیا کوردستانی راپەرین ب رەنگەکێ رێخستی ھاتە برێڤەبرن. راپەرینا ئەول د رۆژا 5ێ ئادارا 1991ێ ل رانیایا ناڤچەیا سلێمانیێ دەستپێ کر. ب راپەرینا گەلێ کوردستانێ د نەڤبەرا 3 حەفتەیان دا ھەولێر، سلێیمانی، دوھۆک، حەلەبجە، کەرکووک ژ دەستێ رەژیما بەعسی یا دەولەتا ئیراقێ ھاتە رزگارکرن”.
د بەردەوامیا پەیامێ دا پاک دیار دکەت: “د رۆژا 27ێ ئادارا 1991ێ دا ئارتێشا ئیراقێ ئێریشەکا بەرفرەھا ھەوایی و بەژایی ئینا سەر باشوورێ کوردستانێ، گەلەک زارۆک، ژن و پیر ژی تێ دا، گەلێ مەیێ سڤیل د ڤان ئێریشان دا ھاتنە کوشتن. نێزیکی یەک ملیۆن گەلێ مە ژی ژ بەر ترسا جینۆسایدەکا نوو، جھ و مالێن خوە ھشتن و مەجبوور مان رەڤیان لایێ سنۆرێن باکور و رۆژھلاتێ کوردستانێ کو د بن داگرکەرییا دەولەتا ترکیێ و ئیرانێ دا نە. د رۆژا 27ێ ئادارێ دا کەرکووک د 31ێ ئادارێ دا ژی ھەولێر جارەکا دی ھاتنە داگیرکرن.”
پاکێ ب بیر خست کو فەرەنسا د دەستپێکا نیسانا 1991ێ دا پرۆژە بریارەک پێشکێشی ئەنجوومەنا ئاسایشێ یا نەتەوێن یەکگرتی کر و تێ دا داخواز کر کو کۆمکوژیا ئراقێ یا ل دژی گەلێ کورد شەرمەزار بکەت و رێکێ ل بەر بگریت و راگھاند: “ئەمریکا و بریتانیایێ ژی پشتگریا فرانسایێ کرن و ب پرانیا ئەندامێن نەتەوەیێن یەکبوویی، د رۆژا 5ێ ئادارا 1991ێ دا بریارا 688 ژ ئالیێ ئەنجوومەنا ئاسایشێ یا نەتەوێن یەکگرتی ڤە ھاتە دان. ل گۆری ڤێ بریارێ، فرینێن ھێزێن ئاسمانی یێن ئراقێ یێن ل باکورێ خەتا 36 ھاتە قەدەغەکرن و ئەڤ ھەرێمە وەک “ھەرێما ئەولەھییێ” ھاتە راگەهاندن. رووسیا و چینێ دگۆتن “نابیت کو ب تو ئاوایی دەستوەردان د کارووبارێن ئراقێ یێن ناڤخوەیی دا بهێتە کرن” و ل دژی بریارا ھەژمارا 688 یا ئەنجوومەنا ئاسایشێ یا نەتەوێن یەکگرتی دەرکەتن.”
د بەشەکا دی یا پەیاما خوە دا پاک دەستنیشان دکەت ئاشکەرایە کو د پارچەبوون، داگیرکرن و بێ ستاتو ھشتنا کوردستانێ دا و د پشتگیری و چاڤلێگرتنا ل داگیرکەران دا ھندەک دەولەتێن مەزن وەک کاراکتەرێن ناڤنەتەوەیی رۆلەکێ ئەساسی گێرا و دبێژیت: “نەتەوێن یەکگرتی ژی ب پاراستنا ستاتویا ھەیی، د بێ ستاتو ھشتنا کوردستانێ دا رۆلەکێ ئەساسی گێرایە. لێ بەلێ، دڤێت ھەول و گاڤێن فەرەنسا، ئەمەریکا و ھندەک دەولەتێن دی یێن کو ژ بۆ هاریکاری و پشتگرییا د سالا 1991ێ دا دانە گەلێ باشوورێ کوردستانێ ژی ئەم ژ بیر نەکەین. بریارا ئەنجوومەنا ئاسایشێ یا نەتەوێن یەکگرتی یا 688ێ د دیرۆکا کوردستانێ دا رووپەلەکا نوو ڤەکرییە و ژ بۆ ملەتێ کورد بریارەکا دیرۆکییە.”
پاک ھەروھا پێشنیار دکەت “دڤێت ئەم ب سسیاسەتەکا مەعقوول، چێکەر و عاقلانە د جیھانێ دا دۆستێن خوە زێدە، دژمنێن خوە کێم بکەین و دڤێت ئەم ب دیپلۆماسیەکا خورت بکارین ئالیکاری و پشتگریا دەولەتێن جیھانێ زێدەتر بکەین” و دبێژیت: “بریارا ئەنجوومەنا ئاسایشێ یا نەتەوێن یەکگرتی یا 688ێ، بوو سەدەما داوی ئانینا داگیرکەرییا دەولەتا ئیراقێ یا ل باژێرێن ھەولێر، سلێمانیێ، دوھۆک و حەلەبچە و بوو بنگەھێ پەرلەمان و حکوومەتا فەدەرال ل ھەرێما کوردستانێ. ب بەرەیا کوردستانی پێکانینا یەکرێزی و تفاقا پارتییێن کوردستانی یێن ل باشوورێ کوردستانێ ژی، د بدەستخستن و پاراستنا دەستکەفتی یێن فەدەرال دا کلیلەکا ئەساسی بوو.
