Skip to contentسوپاس كاراسو!!
ب راستى روونشتن ل دیوانا مسته‌فا كاراسو پڕ خۆ‌شه، مرۆڤ هه‌ر دخوازیت ل دیوانا وى روونیت، ب تنێ گوهدارییا وى بكه‌ت و سه‌رێ خۆ ب هه‌ژینیت و جار و بارا ژى مینا روونشتنا ل دیوانا سترانبێژان ل شوونا ته‌ویكان بێژیت: بژیت بژیت: بكار بینیت.
گه‌ر ب خوازى یێ سه‌ركه‌تى بی ل روونشتنا ل ده‌ڤ سه‌ركرده‌یێن په‌كه‌كێ، پێدڤییه ل سه‌ر ته تو پره‌نسیپێن رێكخستنا وان ب جهـ بینى، پره‌نسپێن وان ب تنێ سێ خالان ب خۆڤه دگریت:
ژگوهداران بی.
ب تنێ پرسان بكه‌ى.
گۆتنا ته موی د به‌را ناچیت.
مه د به‌شێ ئێكێ یێ گۆتارا خۆ دا ل سه‌ر گۆتنا كاراسۆ ئه‌وا دبێژیت: «ل ئیمرالیێ سیاسه‌تا قڕكرن و ژناڤبرنا كوردان نه‌خشه بۆ دهێته دانان» كو ل رۆژا 24/4/2021 ل بۆقێن وان یێن راگه‌هاندنێ هاتییه به‌لاڤ كرن .
ب راستى جاره‌ك دى سوپاسییا كاراسۆ دكه‌م كو ب وێره‌كانه و دویر ژ پره‌نسیپێن رێكخستنا په‌كه‌كێ، ئه‌ڤ داخویانییه دایه به‌رچاڤ كرن، جارا ئێكێ یه راستییه‌كێ به‌رچاڤ بكه‌ت.
لێ باش دزانم ویژى وه‌ك سه‌رۆكێ خۆ دڤییا ب زمانه‌كێ فه‌لسه‌فى باخڤیت، لێ جهێ داخێ یه هه‌مى چویچك نه‌یێن هژیر خارنێ نه.
راسته كاك كاراسۆ ل ئیمرالیێ سیاسه‌تا قڕكرن و ژ ناڤ برنا كوردان دهێته نه‌خشه‌كێشان و ل قه‌ندیلى ئه‌و سیاسه‌ت دهێته ب جهـ ئینان، چه‌وا؟ تو دزانى ئه‌ڤه نێزیكى 20 سالانه عه‌بدوللا ئۆجالان د زیندانێن ده‌وله‌تا تركیێ دایه، د ڤان 20 سالان دا ده‌وله‌تا توركى شیایه سه‌قایه‌كێ بۆ ئۆجالان دروست بكه‌ت كو ئه‌نجامێن دروست كرنا وى سه‌قاى بكه‌ڤیته د خزمه‌تا ده‌وله‌تا تركیێ دا.
باوه‌رم تو و كه‌سێن دگه‌ل ته چیرۆكا شكه‌فتێ و مانا چه‌ند كه‌سان ل وێ شكه‌فتێ ڤه دزانى یاكو ئه‌فلاتۆنى نڤیساى، گه‌ر هوون نه‌زانن؟ دێ ب ئه‌رك بینم وه‌ك كورده‌ك دوباره ب كورتى و پوختی بو هه‌وه بێژم.
پوختێ چیرۆكا شكه‌فتێ:
چه‌ند مرۆڤه‌ك بۆ ماوه‌یه‌كێ گه‌له‌ك درێژ هێلابوونه شكه‌فته‌كێ ڤه و چ ئاگه‌هى ژ دونیا ده‌رڤه نه‌دزانى، چونكى ده‌رگه‌هێ شكه‌فتێ هاتبوونه گرتن مینا تۆنێلێن هوین ل چیا دروست دكه‌ن، ل وێ شكه‌فتنێ ب تنێ كونه‌كا بچووك هێلابوو ژ بۆ هاتنا رۆناهیێ، هنده‌ك چه‌قێن دارا دانابوونه به‌ر وێ كونێ، ده‌مێ سپێده‌هییان رۆناهیێ ل وان چه‌قا ددا، سیتافكا وان چه‌قان ل دیوارێ وێ شكه‌فتێ دهاته دیتن، ده‌مێ بای ل وان چه‌قان ددا سیتافكا وان چه‌قان ل سه‌ر دیوارێ وێ شكه‌فتێ د لڤی، بۆ وان مرۆڤێن د شكه‌فتێ ڤه ئه‌و سیتافك وه‌ك مرۆڤان دهاته وێنه كرن، ژبه‌ر هندێ سپێدێ تاكو ئیڤارى دانوستاندن د ناڤ وان مرۆڤێن شكه‌فتێ دهاته كرن ل سه‌ر ژماره و جورێن مرۆڤان ئه‌وێن وێنێ وان یێ ئاشۆپى دهاته دیار كرن ل سه‌ر دیوارێ شكه‌فتێ.
واته ئه‌و ب خۆ چ مرۆڤ ل ده‌رڤه نه‌بوون، لێ دانوستاندنا دژوار دهاته كرن و وه‌سا هزر دكه‌ن ئه‌وا ئه‌و دبینن راستییه و مرۆڤێن دروستن ل ده‌رڤه.
ره‌وشا عبدوللا ئوجالان ژى مینا مرۆڤێن ل ناڤا شكه‌فتێ یه و راستییا رویدانێن كوردساتنێ ژى بۆعه‌بدوللا ئوجالان مینا سیبه‌را وان چه‌قێن دارێ یه، ئه‌وا ل دیوارێن شكه‌فتێ دهێته وێنه كرن.
ئه‌و وینێ ئاشۆپى بۆ عه‌بدوللا ئۆجالان دیار دبیت، ل سه‌ر كوردستانێ دبیته بنگه‌هێ ڤه‌كۆلینێن وى ل سه‌ر ره‌وشا كوردستانێ، ژ به‌ر هندێ گه‌ر ب هویرێ به‌رێخو بده‌ینه ئه‌و پرتۆكێن وى ل زیندانێ نڤێسیاین و بریارێن ئه‌و ژ بۆ هه‌وه دهنێریت، راستییا گۆتنا مه دیار دكه‌ت، چونكى ناڤه‌رۆكا په‌رتۆكێن وى و بریارێن وى ئاشۆپینه بۆ ره‌وشا كوردستانێ و راستینه ل ده‌ڤ وى.
هزرمه‌ندێن ده‌وله‌تا توركى زۆر ب ئاقلانه ڤێ مژارێ برێڤه دبه‌ن
ل ئه‌نجام ده‌وله‌تا تركیێ نه‌خشه‌ى ددانیت و عه‌بدوللا ئۆجالان وى نه‌خشه‌ى ب زمانێ خۆ یێ نه‌تركی و نه‌كوردى بۆ هه‌وه دهنێریت و هوون ژى ب كۆره‌كی ب جهـ دئینن.
واته راسته بنه‌كۆكا قڕكرن و ژناڤ برنا كوردان ژ ده‌وله‌تا تركیێ ده‌ردكه‌ڤیت و عبدوللا ئوجالان دبیته بێژه‌رێ به‌رچاڤ كرنا وى نه‌خشه‌ى و هوون دبنه جێبه‌جێكارێن وى نه‌خشه‌ى و حكوومه‌تا باشوورێ كورستانێ و خه‌لكێ سڤیل و گه‌ریلا دبنه قوربانیێن وێ نه‌خشه‌یێ قرێژ.
