گەلۆ گوندێ کێستە ژ بۆ دەمۆکراتیکبوونا ترکیا ھاتە قوربانی کرن؟

گەلۆ گوندێ کێستە ژ بۆ دەمۆکراتیکبوونا ترکیا ھاتە قوربانی کرن؟

پەڤچوونێن د ناڤبەرا TSK و PKKێ ل ھەرێما بەرواری بالا  بەردەوامن. د 10 رۆژێن بۆری دا ژ ھەر دو ئالیان ژی کوشتی و بریندار چێببوون. گوند ھاتنە بۆمبەباران کرن، گوندی نەچار مان کو دەست ژ وارێ باب و کالێن خوە بەردن.

دەڤەرا ئەڤ شەرە لێ تێتە کرن ئانکو بەرواری بالا،  یەک ژ جوگرافیا ھەری جوان یا کوردستانێ یە. ئەو ب ئاڤ، گوند، رووبار، کەڤر و زۆزانێن خوە ڤە بحەشتا سەر دوونیایێ یە. ھوون ژ کیلۆمەترەیەکێ دوور دکارن بێھنا سێڤا، بەیبوون و گولێن بەرواری بالا بێھن بکەن. دەڤەرا بەرواری بالا پارچەیەک ژ بحەشتێ یە. بەرواری بالا حەوشا ئامەدییێ و رەوشا دوھۆکێ یە. بەرواری بالا، ئەو دەڤەرە کو بەھدینان دکەتە بەھدینان. لێ ئەڤ پارچەیا بحەشتێ نھا د ناڤا زڤرۆکا شەری دا بەر ب خەندقاندنێ ڤە دچیت. گەلۆ بۆچی ئەڤ شەرە دهێتە مەشاندن؟ ناڤێ ڤی شەری چیە؟

پێویستە گەلێ کورد گەلەک باش ناڤەکێ ل ڤی شەرێ د ناڤبەرا پەکەکێ و ئارتێشا ترکان دا دهێتە کرن، بکەت. ب  راستی ما ئەڤ شەرە، شەرێ کوردانە؟ ما شەرێ ئارتێشا ترک و پەکەکێ شەرەکێ رزگاریا نەتەوەیی یا کوردستانێ یە؟ چ بەرسڤێن مە ھەنە ژ بۆ ڤان پرسیاران؟ ژ بەر کو ئەگەر ئیرۆ ھێزێن چەکدارێن ترکیا و پەکەکێ ل بەرواری بالا ل مەتینا شەرێ رزگارییا کوردستانێ دکەن، ئەم هەموو دێ چین تەڤلی ڤی شەری بین، لێ کو شەرێ نەتەوی نەبیت، دڤێت ئەو شەر ژ ئاخا مەیا پیرۆز، دەرکەڤیت. دەما کو ئەم ل چاپەمەنیێ دنێرین، ئەم دبینن کو ھندەک ناڤێن نێزیکێ پەکەکێ، تایبەتی رێڤەبەریا پەکەکێ، بانگ ل رایا گشتی دکەن، دبێژنە گەلێ کورد ل دژی ڤێ ئۆپەراسیۆنێ شەری بکەن. وەکو ، سەرۆکێ کۆنسەیا رێڤەبەرا کەجەکێ جەمیل بایک دوھ داخویانیەک دا و ژ رایا گشتی خواست کو “سەرھلدانەکێ ژ بۆ پاراستنا زارۆکێن خوە” چێبکەن. بایک ھەر وھا گۆت، “ئەڤ ئێرش نە تەنێ ل دژی گەریلا و پەکەکێ یە.”

دڤێت گەلێ مە ئارمانجا ڤان ئۆپەراسیۆنان ببینیت و ھەلوەستەکێ نیشان بدەت. جەمیل بایک بانگی مە کر، و دڤێت ئەم ژی بانگی جەمیل بایک بکەین.

بەریا ھەر تشتی، دڤێت بهێتە گۆتن کو کەس ناخوازیت گەنجێن کورد بمرن. خەلەتیێن پەکەکێ ل جیھەکێ، جوانێن کو د مرن ژی ل جیھەکێ دی نە. وەکی دی، خوە فەداکرنا وان گەنجا ب ڤێ رامانێ ناهێت کو پەکەکە، ل سەر خەتا راستە. ژ بەر ڤێ سەدەمێ ژی، بانگێن ھەستیاری یێن کو جەمیل بایک و پەکەکە ل سەر خوینا گەنجا ل مە دکەن، گەلەک بێ رامانن. تشتێ کو ئەم رەخنە دکەین سیاسەتا پەکەکێ و پەکەکە ب خوەیە. د سەری دا پەکەکێ خیانەت، ل وان گەنجێن کو د ڤی شەری دا ژییانا خوە ژدەست دایی، کر. گەلێ کورد قەبولناکەت پەکەکە ڤێ سییاسەتا خوەیا خەلەت ب جەنازەیێن گەنجا ڤەشێریت.

کورد دزانن کو دەولەتا ترک چەند دوژمنەکێ غەدارە ژ بۆ کوردان. یا کو گەل نزانیت و دخوازیت بزانیت ژی، ئەڤە یە کو تشتێ پەکەکە دخوازیت بکەت چییە. د ڤی بابەتی دا مە دو پرسیارێن گرینگ ھەنە. بۆچی پەکەکە و ئەرتێشا ترک ل بەحرا رەش، ئیجە، و مارمارایێ حەتا باکوورێ کوردستانێ دا یەک گولـلە ژی بەرنادەنە ھەڤدو، لێ  باشوورێ کوردستانێ د کەنە گۆرەپانا شەرێ خوە؟ بۆچی پەکەکێ شەر دەرباسی باشورێ کوردستانێ کر؟ دڤێت پەکەکە بەرسڤا ڤان پرسیاران ب جددی بدەت. میناک، کاروانێ لەشکەری ژ ناڤەندەکا لەشکەری یا گرنگ ژ بۆلو، دکەڤیتە رێ و ب کامیۆن و تانکا 1529 کم رێکێ دھێت حەتا دگەهیتە ھەکاریێ، چالاکیەک تەنێ ژی ھەمبەر ڤی کاروانێ لەشکەری ناھێتە کرن دهێتە جۆلەمێرگێ، ئەو دهێن و ل ھەلیکۆپتەرا سوار دبن، نەقلی زنارێ کێستە و مزووری ژۆری دبن. ل وێ دەرێ، کو سێ گەریلا دکارن خوە ل جیھەکێ ڤەشێرن و چەند گوڵەیان بەردەنە ڤی دوژمنی، لێ ناکەن. ل ترکیا ھەر تشت د جیھ دایە، ترک قوونا خوە ژ جیھ راناکەن، لێ ھەژارێن گوندێ کێستە د بن گولەیێن بالافران دا ب چاڤێن ب گری ڤە ھەول ددەن کو حەیوانێن خوە ژ بەر ڤی شەری خلاس بکەن. گەر پەکەکە دورست بایە، ئەو دا ڤی شەری نە ل باشوورێ کوردستانێ کەت بەلکو دا  ل باژێرێن مەزن یێن ترکیایێ کەت.

جەمیل بایک د ئاخافتنا خوە دا، قالا ئاخافتنا جیھازی یا مراد قەرایلان ژی دکەت و دبێژیت “ئەڤ شەرێ کوردستانێ یە”. لێبەلێ، بەردەوامییا ئاخفتنا خوە دا ئەو ژی مینا قەرایلان، دبێژی ئەڤ شەرە شەرێ گەلانە، ئەو شەرێ مرۆڤاھیێ یە. قەرایلان پێتر پێ دا چوو و گۆت کو ئەڤ شەرە شەرێ دەمۆکراسی بوونا ترکیایێ یە. قەرایلان د ئاخافتنا خوە دا بانگ ل ھێزێن ترک یێن کو ل باشورێ کوردستانێ نە ژی کر و گۆت بلا ل جیھێ خوە حەرەکەتێ نەکەن. نھا ئەم دخوازین ژ جەمیل بایک و مراد قەرایلان بپرسین: ما ھوون شەرێ بەرواری بالا، شەرێ کێستە، شەرێ ئاڤاشین ژ بۆ دەمۆکراتیکبوونا ترکیا دکەن؟ ژ بەر کو قەرایلان وھا گۆت بوو. ب راستی، یا راست ئەڤەیە کو شەرێ پەکەکێ نە ژ بۆ ھەلوەشاندنا دەولەتا ترک و مافێ کوردانە. یا راستی گەر ئەم بخوازین ببێژین، پەکەکێ قەد و قەد ئارمانجەکا سیاسی نینە. پەکەکە ڤی شەری تەنێ ژ بۆی کو دەستێ خوە بهێز بکەت، پێڤە مژوول ببیت و وەختی دەست خوەڤە بێخیت، دکەت. قەرایلان ب تایبەتی پەیامەکێ ژ بۆی ناڤەندەکێ فرێدکەت و دبێژیت، “ھندەک ژ وان د دەستپێکێ دا فام نەکر بوو، لێ نھا فام دکەن کو ئەڤ شەرە شەرێ دەمۆکراتیککرنا ترکیایێ یە”. قەرایلان ئەڤ پەیامە ژ بۆ ئەرگەنەکۆنێ، فەتحۆلاچییا و کەمالیستێن دلمایی، شاند. ئەو پێشنیار دکەت کو دەستھلاتدارییا ئاکەپێ ھلوەشیت و حکوومەتەکا نوو د گەل ڤان کەمالیستان ئاڤا بکەت. گەلۆ ما جیھێ ڤی پرۆژەی  بەرواری بالایە؟ ما ژ بۆ دەمۆکراتیزەکرنا ترکیا پێویست بوو خەلکێ کێستە بهێتە بێ مال و بێ وار کرن. وەختا کو گوندیێن کێستە ژ مرنێ د رەڤیان، موختارێ گوندی دگۆت: ل ناڤا گوندی تەرمێن پێنج گەریلایان ھەبوون. ما ڤان پێنج گەنجا ژ بۆ دەمۆکراتیکبوونا ترکیایێ د ناڤا کێستە دا ژییانا خوە ژدەست دا؟ نە، یا کو ئەم دبێژینێ خیانەت ئاھا ئەڤەیە. پەکەکە ل سەر لاشێ گەنجا رانتا سییاسی بدەست خوە ڤە تینیت.

پێنج ئەندامێن پەکەکێ یێن سەرەکی ھەموو پرۆژەیا ل گۆری ئەجیندایێن خوە یێن سییاسی برێڤە دبەن و پشترا ژی دبێژن یێن ھاریکارییا من نەکری خائینن. ھێژان ژ سالا پار دییار بوو کو دوژمن دێ ئەڤ سالە ئێرشی بەرواری بالا و زنارێ کێستە کەت. پەکەکێ ژ بۆ زنارێ کێستە هیچ پلان و ئامادەکاریەک نەکر و ھەمان دەم نەهێلا پێشمەرگە ژی بچن و ل وێ دەرێ ب جیھ ببن. پشتی دوژمن ھاتی ھەموو دەڤەر گرتی ڤێ جارێ گازی گەلێ کورد دکەت و دبێژیت بلا سەرھلدانێ بکەن و بۆچی حکوومەتا هەرێمێ ھاریکاریا مە ناکەت.

نە ئارتێشا ترک و نە ژی پەکەکە رەحمێ ل فەقیر و ژارێن کورد، نابەن. پەکەکە دخوازیت کو سڤیل بمرن، گوند بهێنە بۆمبەباران کرن، و خانی بهێنە ھەلوەشاندن. ژ بەرکو، سەدەما کو پەکەکێ خورت دکەت ھۆڤیتیا دەولەتا ترکا ل ھەمبەر گەلێ کوردە.

ژ بەر کو دەولەتا ترک ب غەداری ئێریشێ دکەتە سەر نرخ و پیرۆزی یێن کورد و کوردستانێ. ھەمبەر ڤێ کو ئالتەرناتیفەک نینە، گەل ژی ل دۆرا پەکەکێ کۆم دبیت. ئانکو فاشیزما دەولەتا ترک دبیتە سەدەم کو پەکەکە روویێ خوە یێ قرێژی بڤەشێریت. بەرەڤاژی ڤێ یەکێ ژی ھەبوونا پەکەکێ ئێریشا دەولەتا ترکا ل سەر کوردان رەوا دکەت.

ئانکو، پەکەکە و دەولەتا ترک مینا گۆشت و نەینووکێ نە. ھەر دو ژی ژ ھەڤ ناهینە ڤەقەتاندن. ھەر دو ژی پالێ خوە ددەنە ھەڤ و دژین.

ئەڤە ب سالانە کو ھەمان چەرخ دزڤریت. پەکەکە دەردکەڤیتە پێش و دبێژیت ئەز مرۆڤان دپارێزم، دەولەت ئێریشی گەل دکەت پاشان دبێژیت ئەز ئێریشی پەکەکێ دکەم، و د ئەنجامێ دا، ئەو کەسێن کو مالێن وان وێران دبن و ژیانا وان تێک دچیت ھەر گەلێ کوردە.

پەکەکە ژ بۆ کو خەونا ترکیا یا میساقا مللی پێک بینیت، رۆلا کاتالیزاتۆر دگێریت. پەکەکە سنۆرێن خوە بەرفرەھ دکەت و پرۆپاگاندایا سەرفرازیێ دکەت. لێ بەلێ گەلێ کوردستانێ د ناڤا ڤێ قەرقەشێ دا د پەرچقیت.

ژ بەر ڤێ یەکێ، یا کو د ڤی شەری دا دڤێت چێ ببیت ئەڤەیە: دڤێت کورد ھەم ژ بۆ داگیرکەرییا ترکا و هەم ژی ژ بۆ داگیرکەرییا پەکەکێ یا ل سەر ئیرادەیا سیاسی یا گەلێ کورد بێژیت ئێدی بەسە.

پوستێن ھەمان بەش