شه‌رێ د ناڤبه‌را ئارتێشا ترکیا و چه‌کدارێن پەکەکێ دا ل باشوورێ کوردستانێ به‌رده‌وامه. د ڤی شه‌ری دا، گوند و جھ و وارێن باشوورێ کوردستانێ بوونه قادا شه‌ره‌کێ ب ده‌ست چێکری و گه‌له‌ک ئارمانجێن ڤه‌شارتی ل پشت وی شەری ھەنە. ژ ئەنجامێن ڤی شەری ھەری داویی 10 گوندێن دی ژی، ژ بەر ڤی شه‌رێ قرێژ مال و ملکێن خوه ھێلان و ژ ده‌ڤه‌رێ بار کرن. ژ ئالیێ ئابۆری ڤە ژی ژ ئه‌نجامێ بۆمبه‌بارانا ترکیا دارستان دشه‌وتن و زیانه‌ک مه‌زن ب رەز وباخ و بووستانێن وەلاتیێن وان گوندان كەتیە. ئانكو ژیانا خه‌لکێ ده‌ڤه‌رێ گه‌له‌ک زه‌حمه‌ت کەتیە.
پەکەکە گه‌له‌ک ب زانه‌بوونن پلانكری و ئه‌نجامێ پرۆژه‌یه‌کا هه‌ڤبه‌ش به‌رێ ئارتێشا ترکیا ددە‌تە خاکا باشوورێ کوردستانێ. لێ مخابن پرانیا سیاسه‌تمه‌دارا ب ته‌نێ به‌حسا شه‌ری دکەن و به‌حسا ئه‌نجامێن شه‌ری كا كی سه‌ردکه‌ڤیت و کی ل بن دکه‌ڤیت دکەن. ئەگەرێ بنگه‌هین یێ ڤی شه‌ری ب ئاوایەكێ راست و دروست شرۆڤە ناكەن. ژ ئالییه‌کێ ڤه ئه‌ڤ شه‌رە زه‌ره‌ره‌کا مه‌زن ڕۆژانه دده‌تە خه‌لکێ باشوورێ کوردستانێ، و بارێ ده‌ستهلاتا کوردستانێ گران دکه‌ت، د ئالیێ سیاسی دا ژی دبیته ئەگەرێ هنده‌ک ئاسته‌نگێن گران د ڕێیا داخوازێن کوردا یێن نه‌ته‌وەیی دا.
ئیرۆ قادا شه‌رێ ناڤبه‌را پەکەکێ و ئارتێشا ترکیا سه‌رانسه‌ر ده‌ڤه‌رێن سنۆرێ باشوور و باکورێ کوردستانێ یه. ترکیا گاڤ ب گاڤ ل ڤێ ده‌ڤه‌رێ پێشڤه دچیت و هه‌ر پێشڤه‌چوونێ دا بنگه‌هێن له‌شکه‌ری ئاڤا دکەت. نها پرانیا باره‌گه‌هێن پەکەکێ که‌تنه ده‌ستێ ئارتێشا ترکیێ و ژ بۆ وان بوونه بنگه‌هێن له‌شکه‌ری.
پەکەکە ڕێخستنه‌کا باکورێ کوردستانێ یه، لێ ژ بلی كو جار ب جارهنده‌ک چالاکیێن بچووک ل باکورێ کوردستانێ بکهت، چ شه‌ره‌ک ل سه‌ر ئاخا باکورێ کوردستانێ نه‌مایه. ژ به‌ر کو سیاسه‌تا پەکەکێ ئارمانجا ده‌وله‌تا ترکیا ل باکور ب جھئانیه. به‌رێ ترکیا دایه باشوورێ کوردستانێ و ب ئارمانجه‌ک هه‌ڤبه‌ش ترکیا ل ده‌ڤه‌رێ بجھ دکه‌ت. ژ بەر ڤێ سیاسەت و ھەلوەستا پەكەكێ یە كو تركیا دكەڤیتە ناڤ ئاخا باشوورێ كوردستانێ و بنگەھێن لەشكەری ئاڤا دكەت، ئەگەر نە ژبەر ڤێ ھەلوەستا پەكەكێ بیت تركیا نكاریت ب ڤی ئاوایی باشوور داگیر بكەت.
د ڤێ قۆناغێ دا ده‌ستکه‌فتیا هه‌ری به‌ر ب چاڤ ژ بۆ ھەموو کوردان كیانێ باشوورێ کوردستانێ یه. ل باشوور، تەڤی گه‌له‌ک ئاسته‌نگان، خەبات دهێتە كرن کو ڤی به‌شێ کوردستانێ به‌ر ب ده‌وله‌تبوونێ ڤه ببەت. ئانكو د ڕۆژا مه دا ئه‌گه‌ر هیڤیه‌ک ژ بۆ ده‌وله‌تبوونا کوردان هه‌بیت، ئه‌و ژی باشوورێ کوردستانێ یه. حه‌تا کورد نه‌بنە ده‌وله‌ت و ده‌وله‌تا خوه ئاڤا نه‌کەن، چ گارانتیا پاراستنا کوردا ل چ ده‌ڤه‌ره‌کێ نینە. تشتا کو بهێلیت کورد بگەهن مافێن خوه یێن ڕه‌وا ده‌وله‌تبوونه.
گه‌لۆ کی ل دژی ده‌وله‌تبوونا کوردایه؟ ژ بۆ چ کورد نابنە ده‌وله‌ت و مافێن خوه یێن نه‌ته‌وەیی مسۆگه‌ر ناکەن؟ ئه‌گه‌ر به‌رسڤا ڤان هه‌ردو پرسیاران ب زه‌لالی بهێتە دایین، دێ ئەگەرێ شه‌رێ ترکیا و پەکەکێ ژی باش هێتە فام کرن.
گه‌له‌ک ڤه‌کری ئیران، ترکیا و ئیراق و سووریا ناخوازن کورد ببنە ده‌وله‌ت. ئه‌ڤە نه گرێدایێ وێ یەكێ یە كا کی یان ژی کیژان ئالی ل ڤان وه‌لاتان سه‌ر ده‌ستهلاتێ یه. ئه‌ڤ یه‌ک سیاسه‌تا ڤان وه‌لاتان یا ب سه‌دان سالانه. ژ خوه ڤان ده‌وله‌تا کوردستان داگیر کریه و حه‌تا ژ وان بھێت ناهێلن کورد ژ بن زلم و زۆرداریا وان ده‌رکه‌ڤن.
باشه، ژ بلی داگیرکه‌ران کی ناخوازیت کورد ببنە ده‌وله‌ت، ئانكو ژ پارتی و ئالیێن سیاسی یێن کوردان کیژان ڕێخستن ل دژی ده‌وله‌تبوونا کوردان شه‌ری دکەن؟ پەکەکە و هه‌موو ده‌ردۆرا پەکەکێ ڕێخستن و ده‌زگه‌هێن پەکەکێ ڤه گرێدایی ناخوازن کورد ببنە ده‌وله‌ت. ڕۆژانه به‌رپرسێن پەکەکێ د ڤێ ده‌ربارێ دا داخوویانیا ددەن و ل هەمبه‌ر ده‌وله‌تبوونا کوردان ل ته‌نشت ده‌وله‌تن داگیرکه‌ر دسه‌کنن و شه‌رێ کوردان دکەن. حه‌تا کورد ڤێ یه‌کێ ڤه‌کری نه‌بینن و چاڤێن خوه ڤه‌نه‌کن، چ جارا ناگەهنە مافێن خوه یێن ڕه‌وا.
خوە تێنەگەھاندنا ڤێ یه‌کێ چاڤێ سیاسه‌تێ کور دکه‌ت و دهێلیت کو مرۆڤ ل دژی به‌رژه‌وه‌ندیێن خوه شه‌ری بکهت. پەکەکە پرۆژه‌یه‌کا ده‌وله‌تا ترکیا یه. حه‌تا ئه‌ڤ یه‌کە نه‌ھێتە دیتن، دێ ل باشوور ژی و ل باکور ژی گوند و باژێر خراب ببن، ده‌وله‌تێن داگیرکه‌ر ل سه‌ر ئاخ و وارێن کوردا ب هێزتر ببن و ناهێلن کورد نه‌فه‌سێ بستینن.
سبەهی
