ئه‌ڤە دبیته نڤیسینا من یا سیێ کو ل سه‌ر لۆزانا د سالا 2023ێ دا دێ توخیب و سنۆرێن ده‌وله‌تان ژ نووڤه وێنە کەت، دنڤیسینم.
ل گۆر من ئه‌ڤە مژاره‌کا گه‌له‌ک گرنگه کو دڤێت حیزب و ڕێخستنێن دبێژنە خوە ئه‌م کورد و کوردستانی نه، ڕانه‌وه‌ستن و د حه‌قێ وێ دا بنڤیسینن، سمینار و پانه‌لان ئاماده بکەن دا کو وه‌ک مله‌ت ئه‌م ل هه‌مبه‌ر لۆزانا نوو شیار بن، ئاگاهدار بن دا کو ئه‌م بکاربن مافێ خوه یێن ڕه‌وا ب ده‌ست بێخین…
دڤێت ئه‌م باش بفکرین و ببینین كا داگیرکه‌رێن مه د چ ده‌می دا حازریا ڤێ لۆزانا نوو کرینه و دکەن. لێ ئه‌م هێشتا ژی هشیار نه‌بوونه، لەورا ژی حیزب و ڕێخستنێن مه د حه‌قێ ڤێ دا بێده‌نگن.
بێده‌نگیا وان، ل گۆر من، ده‌ما ژ بۆ لۆزانا نوو چه‌ند ڕۆژەک بمینن، دێ خلاس بیت و وی ده‌می ژی دێ هه‌ر تشت ب دوماهی هاتی بیت.
حیزب و ڕێخستنێن مه دێ دەستا ل چۆكێن خوە دەن، لێ ھنگی ئێدی چ مفا تێدا نینە. ژ به‌ر کو حه‌تا وی ده‌می داگیرکه‌رێن مه، ب چالاکیێن خوه، ب به‌رتیلێن خوه، ب قووه‌ت و هێزا گه‌ل و کرێگرتیێن خوه دێ چ یاریان کەن، ژ نها دا دیاره، لێ ئه‌م هێشتا ژی تێنه‌گهشتینه وێ باوەریێ.
داگیرکه‌رێن مه پەكەكە ژ بۆنا چ ده‌رخستن؟ ب پا‌ره و چه‌کێن خوه چما ئه‌و ب هێز کرن؟
د ده‌ما ده‌رخستنا پەكەكێ دا دبیت کو گه‌له‌ک کوردان ئاگەھ ژ خوە نەبووبیت. ژ به‌ر کو دوژمنێ مه بێ کو هایا مه ژێ هه‌بیت ئه‌م خستبوونە ناڤا ئاگره‌کێ کو هه‌ر ڕۆژ ئه‌م و وه‌لاتێ مه دشه‌وتاندین. هه‌ر مه ژی به‌رخوه ددا دا کو ژ ناڤا ڤی ئاگری ده‌رکڤین، لەورا ئه‌م ل ڕێیێن خلاسیێ دگه‌ریان.
ئه‌و ڕێیێن خلاسیێ ژی، وی ده‌می ب سایا شه‌رێ پەكەكێ کو، ب ده‌ست و هاریکاریا داگیرکه‌رێن مه هاتبوو دامه‌زراندن، نیشا مه دان. پەكەكە ب درووشمێن وه‌ها مه‌زن ده‌رکه‌تن ئانکو ده‌رخستن کو هه‌ما بێژن هه‌رکه‌سەک ژێ باوه‌ر بکەن. ژ به‌ر ڤێ گه‌له‌ک کوردان ب مال و جانێ خوه هاریکاریا وێ کرن.
لێ پەكەكە ب پلان و پرۆژه بوو. ئارمانج و هه‌ده‌فا وێ ئه‌و بوو کو د لۆزانا نوو دا وه‌ک نوونه‌رێ کوردان به‌شداری وێ جڤینێ بکەن و بێژن: :”ئه‌م جودابوونێ ناخوازین، ئه‌م و ترک وه‌ک دو برایان دکارین ل هه‌ڤ بکەین. ئه‌ڤ پرۆبلێما مه و یا ترکانه کو دڤێت ئه‌م ب خوه ڤێ چارە بکەین، لەورا ئه‌م موداخه‌له‌یێنن کو ژ ده‌رڤه دھێن قه‌بوول ناکەین”.
لەورا ترکان ژ سالێن 70یێ حازریا لۆزانا نوو کر و خواست وه‌کاە لۆزانا یەكەم ل سه‌ر ناڤێ کوردان کو تشته‌کێ ناخوازن، ب ده‌ڤێ کوردێن کو نوونه‌رتیان کوردان دکەن(!)، بدەنە گۆتنێ.
مه‌سه‌لا ده‌رخستنا پەكەكێ و ب داخوازێن مه‌زن برنە سه‌رێ چییان و ب شه‌ر دگەل وان ده‌ستپێکرن کو کورد باوه‌ریێ پێ بینن و پشتگریا وێ بکەن، ئه‌ڤە بوو. حه‌تا کو پەكەكە بوو ده‌ستهلات، کوردێن باکورێ کوردستانێ خه‌ساندن، جۆگرافیا باکور و ڕۆژهەلاتێ کوردستانێ تێک برن. دووڤ را ژی گۆت ئه‌م ده‌وله‌تێ ناخوازین. خوا‌ستنا ده‌وله‌تێ خواسته‌که‌کا پاشڤه‌روو یه.
ئه‌ڤ داخوازە پشتی سالێن 2000ێ کو عه‌ڤدلا ئۆجەلان ل مالا خوه، ل خوه‌دی و خالانێن خوه ڤه‌گه‌ریا، ده‌ستپێ کر. هێدی هێدی ب ئه‌ندام و لایەنگرێن خوه دا قه‌بوولکرنێ.
ده‌وله‌تا داگیرکه‌ر ب ڤێ خوا‌ستن؛ وێ پەكەكە یا کو ده‌وله‌تا کوردی ناخوازیت و ده‌ستهلاتا کوردان و کوردستانێ یه، د لۆزانا دویەم دا بکەنە نوونه‌رێن کوردان و ل سه‌ر ده‌ڤێ وان دێ داخوازێن خوه دەنە قه‌بوولکرنێ.
داگیرکه‌رێن مه تم پلان و پرۆژه‌یێن خوه ژ بۆنا ده‌مێن دوور و درێژ داتینن دا کو بکارن سه‌ربکه‌ڤن. لێ ئه‌م کورد نکارین دوور و درێژ بفکرین لەورا ژی مه تم وه‌ندا کری یه.
لێ ڤێ جارێ ئه‌م د لۆزانا نوو دا کو دێ د سالا 2023ێ دا پێک هێت، وه‌ندا ناکەین، ژ به‌ر کو ل باشوورێ کوردستانێ حکەومه‌ته‌کا مه یا ب ده‌نگێ گه‌لێ خوه هاتیه هەلبژارتن هه‌یه. ئاقلمه‌ندێ مه وه‌ک ڕێزدار سه‌رۆک مه‌سعوود بارزانی هه‌یه. دیپلۆماتێن مه وه‌ک ڕێزدار نێچیرڤان بارزانی و سه‌رۆکوه‌زیره‌کێ مه یێ کو ل گۆر داخوازا گه‌لێ خوه کار دکەت هه‌نه.
ب هه‌بوون، دانوسته‌ندنێن وان یێن ناڤنه‌ته‌وه‌یی ئه‌م دێ د لۆزانا دویەم دا وه‌ک کورد ب قازانجا ده‌وله‌ته‌ک سه‌ربخوه ده‌رکه‌ڤین.
نها به‌رژه‌وه‌ندیا مه و ده‌وله‌تێن مه‌زن بوویه یه‌ک. لەورا پلان و پرۆژه‌یێن ده‌وله‌تێن مه‌زن یێن جیهانێ و ته‌ڤگه‌رێن مه، ب سایا به‌رژه‌وندیێن گونجاو ئه‌م دێ ل باشوورێ کوردستانێ قازانج کەین و ده‌وله‌تا خوه یا سه‌ربخوه ڕاگەهینین…
داگیرکه‌ر و پەكەكە دێ وه‌ندا بکەن. پشتی لۆزانا دویەم ئێدی پەكەكە ژی نامینیت، ژ به‌ر کو کار و ئه‌رکێ وێ حه‌تا لۆزانا دویەمە.
