لەیستۆکێن جەوهەر ئاغایێ هەرکی و لاهۆر ئاغایێ تالەبانی!

لەیستۆکێن جەوهەر ئاغایێ هەرکی و لاهۆر ئاغایێ تالەبانی!

ئەڤە دەما چەند رۆژانە د سۆسیال مەدیایا “بەرەی مقاومە” یا ئیرانێ ل باشوورێ کوردستانێ، کو پێک تێت ژ مەدیایا “پەکەکێ، یەنەکێ و حەشدا شەعبی”، جەوهەر ئاغای هەرکی بۆیە مژارا هەری گەرم. چاپەمەنیا ل ژێر دەستێ یەنەکێ ب گشتی و مەدیایا د بن باندۆرا لاهۆرێ شێخ جەنگی ب تایبەتی و هندەک ژ سازیێن مەدیایی یێن پەکەکێ وەکو تەڤدا پرێس کو ژ لایێ هندەک کوردێن باشوورێ کوردستانێ یێن نیزیکی جەمیل بایک و لاهۆر شێخ جەنگی ڤە دهێتە سەرپەرشتیکرن، نووچەیێن سەختە ب سیناریۆیەکا گەلەک لاواز هاتیە چێکرن. د ڤان نووچەیان دا کو هەر کەس دزانیت هەموو ژ یەک جیهـ و ب یەک تەعلیمات تێنە ئاراستەکرن دا، هاتە گۆتن کو ئاژانسا پاراستنا هەرێما کوردستانێ ب رێیا چایچیەکێ خواستیە جەوهەر ئاغایێ هەرکی بکوژن، ژ بۆی ئیسبات کرنا ئاخافتنا خوە ژی نووچە ل پەی نووچەیێ و درەو ل پەی درەوێ رێز کرن، ب رەنگەکێ کو سۆسیال مەدیا ژ نووچەیێن وان یێن درەو تژی بوو، هەلبەت ئەڤ ب هەڤرا کارکرنە ژ بۆی جێبەجێکرنا یەک ئارمانج هاتە ئەنجامدایین، ئەڤ هیزە دخوازن ژ لایەکێ نوونەرا ئیرانێ ل باشوورێ کوردستانێ بکاریت ب ڤێ یەکێ د هلبژارتنێن ئیراقێ دا دەنگێ هندەک ئەندامێن عەشیرەتا هەرکی ب دەست بێخیت داکو بکاریت بەرژەوەندیێن ئیرانێ ل باشوور بپاریزیت، ژ لایەکێ دی دخوازن نەئارامیێ ل دەڤەرا بادینان دروست بکەن و عەشیرەتا هەرکی ل دژی سازیێن ئەولەهیا باشوور بکار بینن، لێ ئەڤ خواستەکا وان هەر د زوو دا کەشف بوو و بوو بلقا سەر ئاڤێ!

 گەلۆ عەشیرەتا هەرکی و جەوهەر ئاغای هەرکی کینە و لاهۆرێ شێخ جەنگی ب رێیا وی دخوازیت چ بکەت؟!

جەوهەر محیەدین جهانگیر حاجی ئاغایێ هەرکی، یەک ژ وان کەسانە کو ل سەردەما رەژێما سەدام حوسێن وەکو سەرۆکجاش هاتبوو دەستنیشانکرن، ئەو ب یەک ژ وان کەسان دهێتە ناسکرن کو پتر ژ هەر سەرۆکجاشەک دی تێهنیێ پارە و خوینا پێشمەرگە و ولاتپارێزێن کوردە، سەدام حوسێن ئەو وەکو سەرۆکێ فەوجا 8 یا جاشێن کورد دەستنیشان کربوو. د ژیانا خوە دا ب تایبەتی پێش سالا 2003یێ دا وی نە ب تەنێ د گەل مخابراتا ئیراقێ بەلکو ژ بۆی مسۆگەرکرنا کار و بازرگانیا خوە و ب دەستخستنا پارە پەیوەندی د گەل سازیێن ئیستخباراتی یێن ترکیا، سووریا و ئیرانێ ژی دانیبوون. پشتی ژناڤچوونا رەژیما سەدام حوسێن ل ئیراقێ، ئانکو پشتی سالا 2003ییێ و ئازادبوونا ئیراقێ ئەو باز ددەت و خوە دڤەشێریت، پشترا ژ بۆی پاراستنا ژیانا خوە دچیت و داخازا لێخوەشبوونێ ژ بارزانی و مالباتا وی دکەت، ژبەرکو مالباتا بارزانی ژی مالباتەکە کو هەر کەس بچیت و داخوازا لێبۆرینێ ژ وان بکەت، گەر هەر تاوانەک ژی ئەنجام دابیت وی عەفوو دکەن، ب وێ مەخسەدێ کو دبیت پووشمان ببیت و ب تاوانێن خوە حەسیابیت و ل ڤێرە هێڤە خزمەتا دۆزا کورد و کوردستانێ بکەت وی ژی عەفوو دکەن.

بابێ جەوهەر ئاغا، ئانکو محیەدین ئاغا کەسەک گەلەک بەرێز و خوەدی باندۆر بوو د ناڤ ڤێ عەشیرەتێ دا، هەرکی رێزەکا هەری مەزن ل وی دگرن، ژ بەرکو ژ بۆی عەشیرەت و ولاتێ خوە کار دکر و کەسەک پاقژ و نەتەوەپەروەر بوو، لێ جەوهەر ئاغا تەمامەن بەرەڤاژی بابێ خوە، کەسەک دژە نەتەوە بوو و هیچ گرنگی ب عەشیرەتا خوە نەددا و ب بازرگانیێ ڤە مژوول بوو، ژ بەر ڤێ یەکێ ئەو رێزا ژ بابێ وی دهاتە گرتن ژ وی را نەدهاتە گرتن، لێ تەڤی ڤێ یەکێ، ژ بۆی نیشاندانا نیەتپاکیا خوە ل دهۆکێ و ل تاخا مالتایێ ژ لایێ مالباتا بارزانی ڤە، خانیەک ژ بۆی وی دهێتە بەرهەڤکرن و خزمەتا وی دهێتە کرن، هەر وها بارزانی د هلبژارتنێن سالا 2004ێ دا یێن پارلەمەنتۆیا ئیراقێ، جەوهەر ئاغا وەکو نامزەدێ پەدەکێ دەستنیشان دکەت، لێ جەوهەر ئاغا دەنگێن پێویست ب دەست نائینیت و د هلبژارتنان دا دەرناچیت، ئەڤە ژی باشترین بەلگەیە کو هەرکی نە د گەل ویدانە. هەر وەها ژبەرکو داخوازێن نە مەعقوول ژ حکوومەتێ و پەدەکێ دکەت و حکوومەت داخوازیێن وی ب جیهـ نائینیت جارەکا دی وەکو کارێ خوە یێ هەرجار خیانەتێ دکەت و دچیتە سووریێ و ل وێد ەرێ ژنەک دی ژ بۆی خوە دئینیت. پاش ڤێ یەکێ ژ هێرس بوونا خوە ب هاریکاریا کەڤنە بەعسیان ل ولاتێ سووریێ و ترکیا کۆمەلەیەک ب ناڤێ “تجمع عراقی الشمال” ل گەل ئەرشەد ئەحمەد زێباری پێک ئانی، پاش کو د ڤێ هەولا خوە دە ژی سەرکەتن نەئانی، پارتیەک ب ناڤێ پارتیا ئازادی و دادپەروەریا کوردستانێ دامەزراند و خوە وەکو سەرۆکێ ڤێ پارتیێ راگهاند. لێ بەلێ دیسان د ڤی کارێ خوە دا ژی سەرکەفتی نابیت و ل 6/7/2012ێ دا جارەکا دی ڤەدگەریتە د ناڤا رێزێن پەدەکێ دا.

لاهۆرێ شێخ جەنگی ب رێیا جەوهەر ئاغا دخازیت چ بکەت؟!

هەر وەک دهێتە زانین و دیتن، عەشیرەتا هەرکی بەشەک ژ کۆنفەدراسیۆنا بارزانە کو ژ 7 عەشیرەتان پێک دهێت و ل سەر دەما شێخ عەبدولسەلامێ بارزانی پەیمان دایە کو ل سەر رێبازا بارزان بەردەوام بن و ژ بۆی کوردستانێ کار بکەن. عەشیرەتا هەرکی ب یەک ژ عەشیرەتێن هەری مەزن ل کوردستانێ دهێتە ناسکرن و ژ بۆی کوردستانێ قوربانیێن هەری مەزن دانە، ب تایبەتی د شەرێ ل دژی داعشێ دا ئەڤ چەندە ب زەلالی هاتە دیتن.

پاش محیەدین ئاغا، هەریکیا ژ بەر بابێ جەوهەر ئاغا، رێز ژ وی ژی دگرت، لێ بەلێ ب چ رەنگا نەکەتنە بن باندۆر و فەرمانێن وی دا، ژبەرکو جەوهەر ئاغا رێیا راست بەرزە کریە و هەر دەمەکێ ل جیهەکێ یە و ل شوونا گرنگیێ ب عەشیرەتا خوە و ولاتێ خوە بدەت، مژوولی خوە دەولەمەندکرنێ و پەیوەندیێن د گەل سازیێن ئیستیخباراتی یێن دەولەتێن داگرکەرێن کوردستانێ دا یە. ئەو د بازرگانیێ دا ژی سەرکەفتی نابیت، نکاریت پارە و دەستکەفتێن سیاسی و جڤاکی ب دەست بێخیت، لەورا ناچار دبیت ڤێ جارێ بەرێ خوە بدەتە د ناڤا رێزێن یەنەکێ دا. د ناڤا یەنەکێ دا ژی ب تایبەتی پشتی کو لاهۆر شێخ جەنگی وەکو هەڤسەرۆک هاتیە دەستنیشاندکرن، جەوهەر ئاغا داخوازیێن هەری مەزن ژ یەنەکێ کرن، لێ لاهۆر جەنگی یەکەم جار رازی نابیت، ژبەرکو لاهۆر باشتر ژ هەر کەسەک دی سەنگ و باندۆرا جەوهەر ئاغا دزانیت، لاهۆر دزانیت کو جەوهەر ئاغا ژبەرکو نها وەکو ئاغا د ناڤ پرانیا هەرکیان دا ناهێتە دیتن نکاریت هاریکاریا یەنەکێ بکەت و ب ڤێ رێکێ هەژمارا دەنگێن خوە ب تایبەتی ل بادینان زێدە بکەت، ب ناچاری و ب فەرمانا لاهۆرێ جەنگی مەدیایا یەنەکێ دەست ب دروستکرنا ڤێ سەناریۆیا ساختە دکەن و وەسا ددەنە خوەیا کرن کو ئاژانسا پاراستنا هەرێما کوردستانێ خواستیە جەوهەر ئاغا بکوژن، مەبەستا لاهۆرێ شیخ جەنگی ژ ڤێ سەناریۆیێ ئەڤەیە کو بکاریت باندۆرێ ل هەرکیان بکەت و هەژمارا دەنگێن خوە ل ڤێ دەڤەرێ زێدە بکەت، لێ دیسا ئەڤ سیناریۆیە هەر د زۆ دا هاتە کەشف کرن و هەرکیان ب ئاوایێن جودا جودا د سۆسیال مەدیایێ دا بەرسڤ دا.

ل گۆر زانیاریان بەرا دروستکرنا ڤێ سیناریۆیا ساختە، لاهۆر جەنگی و جەوهەر ئاغا ل سلێمانیێ جڤینەک ئەنجام دایە، د ڤێ جڤینێ دا جەوهەر ئاغا گەلەک داخوازیان ژ لاهۆر دکەت، ژ وی دخوازیت کو پارە و پلەیێن حیزبی و حکوومی ب وی و مالباتا وی بهێنە دایین، لاهۆر جەنگی ژی ژبەرکو سەنگا جەوهەر ئاغا د ناڤا هەرکیان دا باش دزانیت ب داخوازێن وی رازی نابیت لێ بەلێ جەوهەر ئاغا ریجایێ ژ لاهۆر دکەت کو خواستەکێن وی بجیهـ بینیت، د ئەنجام دا ل سەر ڤێ یەکێ ل هەڤ دکەن کو ژ بۆی راکێشانا سۆزا هەرکیا سیناریۆیەکێ دروست بکەن و پێشوەخت هەر تشت ئامادە کر، سیناریۆ ژی ئەڤە بوو کو د مەدیایێ دا باس ل هەولا تەرۆرکرنا جەوهەر ئاغا ژ ئالیێ ئاژانسا پاراستنێ ڤە بهێتە کرن، ژ بۆی ڤێ یەکێ چایچیێ جەوهەر ئاغا بکارینا و ب زۆری ڤیدیۆیەک ب وی دا دروستکرن کو تێدا ب تەلەفۆنێ د گەل کەسەکێ دپەیڤیت و وسا خویا دکەن کو ئەو کەس سەر ب ئاژانسا پاراستنا هەرێما کوردستانێ یە، لێ تشتا عەجێب ئەڤەیە کو پاش ڤێ ڤیدیۆیێ هاتە راگهاندن چایچی ژ ئالیێ پاراستنێ ڤە هاتیە رەڤاندن، ئەڤە د دەمەکی دا بوو کو بەرا ڤێ یەکێ ڤیدیۆ ب وی دابوو دروستکرن!

ئەم ب تەنێ ڤێ پرسێ دکەین، گەلۆ قەی د دیرۆکێ دا چێبوویە کو چایچی بخوازیت ئاغایێ خوە بکوژیت و پشتی کو دهێتە کەشفکرن و دەستەسەرکرن ئەو چایچی بکاریت ژ دەستێن ئاغایێ خوە باز بدە و ژ زیندانێ دا ب رەڤیت و پاشان جارەکا دی ژ وی کەسێ کو فەرمان دایە وی ب رەڤیت؟!

پوستێن ھەمان بەش