رەژێما ئیرانێ ل کرمانشانێ شەرێ تایفی ساز دکەت

رەژێما ئیرانێ ل کرمانشانێ شەرێ تایفی ساز دکەت

ل گۆر زانیاریێن د سۆسیال مەدیایێ دا هاتیە پارڤەکرن، دەما چەند رۆژانە کو ژ ئەنجاما پیلانێن رەژێما ئیرانێ، پرسگرێک د ناڤبەرا دو تایفێن “کویک و قەلخانی” ل ناڤچەیا “داڵەهۆ” یا سەر ب پارێزگەها “کرمانشان” یا رۆژهلاتێ کوردستانێ چێبوونە و هەر ژ بەر ڤێ سەدەمێ 5 کەس هاتنە کوشتن و ب دەهان کەسێن دن ژی بریندار بوونە.

ناڤچەیا داڵەهۆ یا سەر ب باژارێ کرماشانێ، جیهێ کوردانە و ژ ئۆل و تایفەیێن جودا وەکو شیعە، سۆننە و یارسان “کاکەیی” پێک تێ و ب سەدان سالانە بێی هەبوونا هیچ پرسگرێکەکێ ب هەڤرا دژین.

تەڤی کو ووسا هاتیە بەرچاڤکرن کو ئەڤ پرسگرکە ب سەدەما ناکۆکیێن ل سەر ئەردێن چاندنیێ دروست بوویە، لێ بەلێ رەژێما ئیرانێ ب رێیا کرێگرتیێن خوە ڤێ پرسگرێکێ گور دکەت و شەری مەزنتر دکەت.

پاش کو شەر مەزن بووی، سەیید نەسرەدین حەیدەری، رێبەرێ یارسانیان “کاکەییان” ل رۆژهلاتێ کوردستانێ ب داخویانیەکێ بانگ ل هەر دو ئالیان کر داویێ ب شەری بینن و ناکۆکیێن د ناڤبەرا خوە دا چارەسەر بکەن. رێبەرێن تایفا “کویک” ژی داخوازا ئارام بوونا رەوشێ دکەن.

هەڤدەم پارتیێن رۆژهلاتێ کوردستانێ و چالاکڤانێن سیاسی و مەدەنی ل ناڤچەیێ داخوازا راگرتنا شەری و پووچکرنا ڤێ پیلانا رەژێما ئیرانێ دکەن، لێ بەلێ ل گۆر داوی ئاگاهیان، رەژێما ئیرانێ هندەک ژ کرێگرتیێن خوە ل ناڤچەیێن دن ئانینە ڤێ ناڤچەیێ و دخوازیت ناکۆکیێن د نێڤبەرا کوردان دا ل ڤێ ناڤچەیێ کوور بکەت و پرسگرێکێ مەزنتر و ئالۆزتر بکەت.

هێژایی گۆتنێ یە، تەڤی نێزیکبوونا هەلبژارتنێن ئیرانێ و ب تایبەت هەلبژارتنێن ئەنجوومەنێن باژار و گوندان، پر جاران د ناڤبەرا تایفە و هۆزێن کورد دا ناکۆکی چێدبن.

پوستێن ھەمان بەش