پارتیا سۆسیالیستا کوردستانێ ئێرێشا چەکدارێن پەکەکێ ل سەر پێشمەرگەیێن کوردستانێ کو تێدا 5 پێشمەرگە شەهید و 6 پێشمەرگەیێن دن ژی بریندار بوون پرۆتەستۆ کر و راگهاند، رێتنا خوینا پێشمەرگە خیانەتە.
داخویانیا پارتیا سۆسیالیستا کوردستانێ وهایە:
رێتنا خوینا پەشمەرگە خیانەتە
دوهـ ل ھەرێما کوردستانێ ل دەردۆرا ئامێدیێ ل سەر ئێریشا پەکەکێ پێنج پەشمەرگەیان شەهید بوون و ئەوقاس کەس ژی بریندار بوون. ئەم ڤێ ئێریشا ل سەر پەشمەرگە ب توندی شەرمەزار دکین و ژ بۆ یێن بریندار ژی شیفایێ دخوازین.
هەلبەت کریارێن ئیستیفزازی یێن پەکەکێ ل ھەرێما کوردستانێ نوو نینن. ئەڤ ئێریشا داوی ژی نشان ددەت کو ئێدی پەکەکە ژ بۆ ھەرێما کوردستانێ بوویە مەترسیەک مەزن. پەکەکە ب ڤێ سیاسەتا خوە دەستکەفتیێن ھەرێما کوردستانێ دئێخیتە بن تالووکێ، زیانێ ددەتە ستاتویا فەدەرالا 30 سالی و ئارامییێ ل ھەرێمێ تێک ددەت. ئەشکەرەیە کو ئەڤ سیاسەتا ب ڤێ ئاوایی بەرییا ھەر تشتی خزمەتا ھێزێن داگیرکەر دکەت کو ژ بۆ فەتساندنا گەلێ کورد کەمین داناینە.
دڤێت پەکەکە دەڤ ژ گەفخوارنا تێکبرنا ئازادییا کوردستانێ و دەستکەفتییێن نەتەوەیی بەردەت.
پێویستە بهێتە زانین کو کوشتنا پەشمەرگە خییانەتەکا ھەری مەزنە. و ڤێ یەکێ نە مفا ژ بۆی پەکەکێ و نە ژی ژ بۆی گەلێ کورد نینە. ئیرۆ ئەگەر پەکەکە دکاریت ل ھەرێما کوردستانێ خوە پاریزیت، ئەڤە ب سایا دەستکەفتییێن باشوور و کەدا ب دەھ ھەزاران پەشمەرگایە. پێدڤیە ھەر کوردەک و هەر دۆستەکێ کوردان بەریا ھەر تشتی ریزێ ژ کەدا پێسمەرگەیان بگریت، ئازادی و سەروەرییا ھەرێما کوردستانێ بپارێزن و خوەدی ل دەزگەیێن گەلێ کورد دەرکەڤن.
ئەم جارەکا دن بانگ ل پەکەکێ دکین؛
ڤێ سیاسەتا دژمنانەیا کو د خزمەتا نەیاران دایە تەرک بکەن، کو ئەڤ سیاسەتا هەوە بۆ کوردان دێ بیتە سەدەما کارەسات و مالوێرانیێ.
ھەر وەسا ئەم داخوازێ ژ گەلێ خوەیێ عەقل دروست ژی دکین؛
ل ھمبەر ڤێ سیاسەتا مەترسیدار ھەلوەستەکێ خورت نیشان بدەن. ب دەنگەکێ بلندتر ل ھەمبەری ئێریش و پلانێن ل دژێ گەلێ مە دەرکەڤن.
وەرن ئەم دەک و دۆلابێن دوژمنێن خوە یێن قلێر و تاری پووچ بکین.
سەرکەفتن دێ یا مە بیت، ئەم دێ ئازادییا خوە ب دەست ئێخین.
6/6/2021
پارتیا سۆسیالیستا کوردستان
پەسەکە
