ل ڤێ یارییا فێلبازانه‌ بنێره‌!!

  • حامید گه‌وهه‌ری

قارا‌یلان دبێژیت‌: «من دخواست سه‌رۆك بارزانی ببینم و تشته‌كێ‌ ڤه‌شارتی بێژمێ»، هه‌روه‌‌ها دبێژیت: «ئاردۆگان خواست ل باكورێ كوردستانێ ئاگربه‌ستێ راگه‌هینین و شه‌رێ پارتی بكه‌ین».

بۆ زانیاریێن زێده‌تر هه‌ڤالان و خوانده‌ڤانێن برێزێن ڤێ گۆتارا من، په‌كه‌كه‌ و شه‌خسێ قارایلان ژ به‌ری گه‌هشتنا ئاردۆگان بۆ ده‌ستهلاتێ، ژ سالا 1987ێ وه‌ره‌ یێ شه‌رێ كوردان ل باشوورێ كوردستانێ دكه‌ن ب تایبه‌تی شه‌رێ پارتییا ده‌مۆكرات و هێشتا ئه‌ڤ شه‌رێ وان به‌رده‌وامه‌.

ل سالا 1982ێ، عه‌بدوللا ئۆجالان ب ده‌ستوورا پارتی، به‌شه‌كا گه‌ریلایێن په‌كه‌كێ ژ بۆ ئه‌نیێن دژی رژێما تركیێ ڤه‌گوهاستن باشوورێ كوردستنێ و ل سنۆرێ نێڤبه‌را باشوور و باكور ب جهـ كرن، ل دوماهییا مه‌ها ئادارا 1983ێ، عه‌لی حه‌یده‌ر قه‌یتان ژ سووریێ گه‌هشته‌ ته‌هرانێ و ژ وێرێ به‌ر ب راژانێ ب رێ كه‌ت، پاش ڤێ «دیدارێ»، گه‌ریلایێن په‌كه‌كێ گرووپ گرووپ گه‌هشتن باشوورێ كوردستانێ، ل رۆژا 15/4/1984ێ یه‌كه‌م شه‌رێ چه‌كداری یێ په‌كه‌كێ ل دژی سوپایێ تركیێ چێبوو، د ڤی شه‌ری دا، دربه‌كێ مه‌زن ب گه‌ریلایێن په‌كه‌كێ كه‌ت.

رێككه‌فتنا ل گه‌ل رژێما سه‌دام ل 1987ێ ل دژی باشوورێ كوردستانێ

ل سالا 1987ێ، په‌كه‌كه‌ و رژێما سه‌دامی ل دژی باشوورێ كوردستانێ رێككه‌فتن، په‌كه‌كێ 7 پێشمه‌رگه‌یێن پارتی د ده‌ما گۆتوبێژان دا گرتن و هه‌تا رۆژا مه‌ یا ئه‌ڤرۆ ژی نه‌خو‌یایه‌ كانێ ئه‌ڤه‌ پێشمه‌رگه‌ هاتینه‌ شه‌هید كرن، یان ژی ب په‌كه‌كێ ته‌سلیمی رژێما سه‌دامی كرینه‌.

دامه‌زراندنا پاكێ و دژاتییا په‌رله‌مانێ كوردستانێ ژ سالا 1992ێ

ل سالا 1991ێ، پاش سه‌رهلدانا گه‌لێ باشوور ل دژی رژێما سه‌دام، په‌كه‌كێ خوه‌ وه‌ك ئالترناتیڤا رێخستنێن باشوورێ كوردستانێ ناساند و راگه‌هاند كو ل باشوور چ گوهۆرین بێی په‌كه‌كێ ناهێنه‌ ئه‌نجام دان و ژ بۆ ڤێ مه‌به‌ستێ رێخستنه‌ك ب ناڤێ پارتی ئازادی PAK دامه‌زراند و ل ده‌مێ به‌ره‌یێ كوردستانی ل مه‌ها گولانا سالا 1992ێ بریارا یه‌كه‌مین هه‌لبژارتنێ دای و په‌رله‌مانێ كوردستانێ دامه‌زراندی، په‌كه‌كێ گۆت: «نابیت گه‌ل گرنگیێ ب یاسایێن په‌رله‌مانێ كوردستانێ بدت»‌!.

ئاپۆ: دێ سوپایێ تركیێ كێشی باشوور كه‌ین و دێ باشوور لێ كه‌ینه‌ ڤیه‌تنام!

هه‌ر د ڤێ سالێ دا‌، ئۆجالان ره‌وشا باشوورێ كوردستانێ و ڤیه‌تنامێ دانان به‌ر هه‌ڤ و راگه‌هاند: «ئه‌م دێ سوپایێ تركیێ كێشی باشوور كه‌ین و دێ باشوور ل وان كه‌ینه‌ ڤیه‌تنام».

حكوومه‌تا شه‌ری و په‌رله‌مانێ نه‌ته‌وه‌ی

د ڤێ ناڤبه‌رێ دا‌ په‌كه‌كێ تیۆرییا «حكوومه‌تا شه‌ر و په‌رله‌مانێ نه‌ته‌وی» به‌لاڤ كر و ل رۆژا 14/4/1995ێ، په‌رله‌مانه‌ك ل ئه‌ورۆپایێ چێكر و ب په‌رله‌مانێ نه‌ته‌وی ناڤ كر، پاش په‌رله‌مانتارێن خوه‌ یێن خه‌یالی ڤه‌گوها‌ستن باشوورێ كوردستانێ و گۆت: «ئه‌ڤ په‌رله‌مانه‌ دێ پێشیێ ل ئه‌مه‌ریكا و تركیێ گریت و دێ خه‌ته‌ریێ ژ پارتیێن سیاسی یێن باشوورێ كوردستانێ دوور كه‌ت».

داگیركرنا گوندێن باشوورێ كوردستانێ

قاریلان و په‌كه‌كه‌ ل وێ باوه‌رێ بوون كو پرانییا گه‌لێ باشوور دگه‌ل پارتییا ئازادی PAK یه‌، شه‌ر ل كوردستانێ چێكر، سوپایێ تركیێ كێشی باشوور كر، لێ به‌لێ راستی شكه‌ستنێ هاتن، پاش راگه‌هاند ئه‌م رێزێ ل په‌رله‌مانێ كوردستانێ دگرین، لێ به‌لێ پاش نه‌مانا رژێما سه‌دام، ب پرۆژیا ده‌وله‌تا فاشێستا تركیێ، سیاسه‌تا خوه‌ به‌رده‌وام كر، پتری 500 گوندێن دهۆكێ، ئامێدیێ، ئاكرێ، سیده‌كان و زنجیره‌یا چیایێ قه‌ندیلێ داگیر كرن، پاش هێدی هێدی ئه‌ڤ ناڤچه‌ ژ بۆ سوپایێ تركیێ هێلان.

رێككه‌فتنا ل گه‌ل حه‌شدا شه‌عبی

ل گه‌ل حه‌شدا شه‌عبی به‌رژه‌وه‌ندیێن كۆمارا ئیسلامی یا ئیرانێ پاراستن‌، ل كه‌ركووكێ، مه‌خموور و شنگالێ ل دژی كوردان و حكوومه‌تا باشوورێ كوردستانێ ملێ خوه‌ دان ملێ حه‌شدا شه‌عبی، ل جهێن داگیركری یێن باشوورێ كوردستانێ هه‌رێمێن پاراستنا میدیا دامه‌زراندن و ژیان ل وان گوندان و لڤ و ته‌ڤگه‌را پێشمه‌رگه‌یێن كوردستانێ ئاسته‌نگ كرن، ب ئاوایه‌كی كو چ كه‌س نه‌دشیا نه‌ چاندنێ بكه‌ت و نه‌ژی ئێمناهییا باشوور ل وان ناڤچه‌یان بپارێزیت.

بۆچی پارتیێن سیاسی یێن باشوور هزر ل وێ یه‌كێ ناكه‌ن كو په‌كه‌كه‌ یا ب وه‌كاله‌ت پێش رژێمێن داگیركه‌ر ڤه‌ شه‌رێ كوردستانێ دكه‌ت!.

هه‌تا رۆژا مه‌ یا ئه‌ڤرۆ ژی ل سه‌ر رێیا پێشمه‌رگه‌هان مینان دچینیت، مووشه‌كێن كۆرنێت كو ئه‌مه‌ریكایێ ژ بۆ شه‌رێ ته‌رۆرا داعشێ ب یه‌په‌گێ داینه،‌ ل پێشمه‌رگه‌هان دده‌ت.

ل رۆژا 5/6/2021ان ل ئامێدیێ په‌كه‌كێ مووشه‌كا كۆرنێت ل ترومبێلا پێشمه‌رگه‌یان دا، 6 پێشمه‌رگه‌ شه‌هید كرن و 5 ژی بریندار كرن، سه‌یره‌ به‌شه‌كێ پارتیێن سیاسی یێن باشوورێ كوردستانێ ل همبه‌ری ڤان ده‌ستدرێژیێن په‌كه‌كێ بێده‌نگن یان ژی ب ئانالیزێن شاش ڤێ كریارا ته‌رۆریستی یا په‌كه‌كێ ل باشوورێ كوردستانێ ب دژی پارتی و ژبۆ به‌رژه‌وندییا خوه‌ دزانن و بیر ل وێ یه‌كێ ناكه‌ن كو قاریلان و ئه‌ندامێن كۆنسه‌یا سه‌رۆكاتییا په‌كه‌كێ بێی جوداهی یێ ب وه‌كاله‌ت پێش رژێمێن داگیركه‌ر ڤه‌ شه‌رێ كوردستانێ دكه‌ن!.

پوستێن ھەمان بەش