ئەو ئێرشا پەکەکێ یا ل ھەرێما مەتینا، کو د ئەنجامێ دە 5 پێشمەرگە شەھید ب بوون، ژ لایێ رایا گشتی یا ناڤخوەیی و بیانی ڤە راستی بەرتەکێن مەزن ھات. پەکەکێ پشتی ڤێ ئێرشا نەیاری دیت کو گەر ئەو ب فەرمی قەبوول بکەن دێ ژ بۆ وان گەلەک نەباش بیت لەوما ژی ژ ڤێ بریارا خوە ژ نیشکەکێ ڤە د نیڤا رێکێ دا زڤری.
کەسێن پەکەکێ وەکو مستەفا قەراسوویێ کو دخوازیت شەرێ پێشمەرگە بکەت ژی، د بێژیت “مە ل پێشمەرگە نەخستییە.” ئەو ئیدیعا دکەن کو زریپووشا پێشمەرگە ژ ھەوا ڤە ب فروکێن F16 ھاتییە لێدان. لێبەلێ، د ڤەکۆلینێن ل سەر ترۆمبێلێ ھاتیە کرن دا، دیار بوو کو هیچ شۆپا گولەیەیان د ترۆمبێلێ دا نە ھاتە دیتن. دییار بوو کو ئێریش ب مۆشەکا تیپا کۆرنەت ھاتیە کرن. سەرەرای ڤێ یەکێ، ژ بۆ کو کارڤەدانێن رایا گشتی یا کوردان بدەنە سەکناندن پەکەکە ب داخویانیێن وەکی “ترۆمبێل ژ ئاسمانی ڤە ھاتیە لیدان، مە لێ نەدایە” ب ڤی رەنگی خواست سەرێ کوردان تەڤلیھەڤ بکەت. ژ بۆ کو ڤێ سیناریۆیێ ل سەر مالپەرێن مەدیایی بکار بینیت “سەنەمێن مژارێ” بکار ئینان. ئەڤ کەسە وەکی پسپۆرێن مژارێ هاتنە دەستنیشان کرن و ئەرکێن خەیالی ژ بۆ وان هاتنە دایین. گەلەک جاران، کەسێن کو مەدیایا پەکەکێ وەکی ھونەرمەندێن باشوورێ کوردستانێ دەرتێخنە پێش چاڤ ئەو کەسن کو د جڤاکا باشوور دا کەس وان ناس ناکەت. یەک ژ وان کەسان ژی ئەوە یێ کو مەدیایا پەکەکێ وی وەکو “فەرماندارێ پێشمەرگە قادر خۆرانی” پێناسە کری. خۆرانی ژی داخویانیەک بەلاڤ کر و گۆت، “ئەڤ ترۆمبێلە ب چەکێ F35 ھاتییە لێدان”
قادر خۆرانی کییە؟
قادر خۆرانی ئەندامەکێ ئاستا ژێرین یێ سازییا ئیستاخباراتا ئێکەتیێ یا ب ناڤێ زانیاری یە. لێبەلێ، ژ بۆ کو ناسنامەیا خوەیا ئیستیخباراتێ ڤەشێریت، ئەو ژی بەشداری ھێزێن لەشکەری یێن گرێدایی پۆلات جەنگی دبیت. قادر خۆرانی دەما کو پۆلات شێخ جەنگی چوویی سەردانا کۆبانێ وەکو پاساوان د گەل وی دا چوو بوو. ئەو د ھەمان دەمێ دا بەشداری دانووستاندنێن ئاستا ژێرییێن تەکنیکی، د ناڤبەرا پەکەکێ و ئیستخباراتا یەنەکێ زانیاری دا ژی دبیت.
ئانکو، خۆرانی نە پسپۆرەکێ شەری و ئاموورێن شەری یە، لێ پەکەکێ ئەو ژ بۆ ڤێ مژارێ وەکو لەیستکڤان بکار ئینا. خۆرانی نە پسپۆرێ چەکێن شەری یە و نە ژی ل وێ دەڤەرا بوویەر لێ روودای بوو. پەکەکێ ژ بوو ڤێ مژارا ب ڤی رادەی گرنگ ئەڤ دۆستێ خوە یێ ئەندامێ زانیاری وەکی چاڤدێرێ لەشکەر بکار ئینا. گۆتنەک ھەیە دبێژیت “شاھدێ رووڤی، کوریا وی یە.”
پەکەکە بۆچی نەچار ما کو د نیڤا رێکێ دا بزڤریتەڤە؟
بەریا ھەر تشتی، پەکەکە ژ کارڤەدانێن جڤاکی و سیاسی گەلەک ترسییا. لێ یەک ژ سەدەمێن کو پەکەکێ گاڤەک پاشڤە هاڤێتی داخویانیا سەرۆک بارزانی بوو. پەکەکێ ب خوە ژی دزانیت کو ھەکە ئیرۆ ئەو ل چیایێن بەھدینان پاریەکی نانی دخوون، ئەڤە ژ بەر ھەلوەست و تەحەموولا سەرۆک بارزانییە. هەرچەند کو مەسعوود بارزانی سەرۆکێ پارتی بیت ژی، لێبەلێ ئەو وەکو “برایێ مەزن و ستارگەھەکێ کو ھەموو کورد خوە دسپێرنێ” ئەرکدار دبیت. ھەموو ئیستیفزاز و یاریێن پەکەکێ ب ڤێ ھەلوەستا خوەیا دێرین ڤالا دەرتێخیت. گەر پەکەکێ ھەیا نها ل باشوور ب رحەتی دگەریت و کار دکەت، ئەڤە ژ بەر رۆلا سەرۆک بارزانی یە وەکی “برایێ مەزنێ کو حەتا پەکەکێ ژی خوە سپارتییێ’ یێن کو ڤێ راستییێ باش دزانن پەکەکە و موراد قەرەیلان بخوە نە. لێ پەکەکێ ژ بۆ کو ڤێ راستییێ بڤەشێریت ب بەردەوامی بۆردومانا دەزەنفۆرماسیۆنێ ” زانیاریێن نەراست یێن کو تێنە بەلاڤکرن داکو مرۆڤ پێ بێتە خاپاندن یان وەک پرۆپاگاندا بێتە بکارئانین” د مەدیایێ دا بکار تینیت.
ھەڤکارییا باسکێ لاھۆر جەنگی ژ بۆ دەزەنفۆرماسیۆنا پەکەکێ
ژ بەر ڤێ یەکێ، یەنەکێ و پەکەکێ د ناڤا پارڤەکرنەکا دەزەنفۆرماسیۆنێ دا نە. یەنەکێ ژ بۆ پەکەکێ سەنەمێن مژارێ پەیدا دکەت. ئانکو، یەنەکە کەسێن کو د بەرژەوەندییێن پەکەکێ دا داخویانیان ددەت بەرچاڤ دکەت. ھەر وەھا، یەنەکە د چاپەمەنیا خوە دا ژ بۆ کو مەدیایا پەکەکێ بکار بینیت نووچەیا چێدکەت و خوە وەکی چاڤکانی نشان ددەت.
میناک، د ناڤبەرا مەدیا پەکەکێ و یەنەکێ دا پارڤەکرنەک ژ بۆ مژارا برینا دارستانێن سنۆری ژی گەلەک ب زەلالی دیار دبوو. د راگەھاندنا پەکەکێ دا نووچەیەک وەکی “سەرقۆنسۆلێ ترکیایێ ل ھەولێرێ، هاکان قاراچای، دا خویا کرن کو وان دەڤەرێن تێدا دارێن دارستانێ برینە ژ پەدەکێ کرینە”. ل گۆری نووچەیێ، نێچیرڤان بارزانی ئەردێن ل سەر سنۆرێ باکور و باشوور فرۆتبنە ترکیا. ژبەر ڤێ یەکێ ژی ترکان رێک ل ڤان دەڤەران چێکرن. پەکەکێ ئەڤ نووچەیا درەو ژ مەدیایا لاھۆر شێخ جەنگی وەرگرت. ئانکو پەکەکێ ئەڤ نووچە وەک چاڤکانی ژ رادیۆیەکا ب ناڤێ پۆلەتک پرێس وەرگرت. ناڤەندا وەشانا رادیۆیێ ل سلێمانیێ یە و لاھۆر پشتەڤانیا وێ دکە. بنگەھا نووچەیێ تونە. لێ ل باشوور، رادیۆیەک کو % ١ مرۆڤ ژی لێ گوھداری ناکن نووچەیێن دەزەنفۆرماسیۆنێ بەلاڤ دکەت. چاپەمەنیا پەکەکێ ژی ڤان نووچەیا مەزنتر دکەت و دکەتە رۆژەڤا ھەموو کوردان، و ب ڤی رەنگی دژمناھیا ل دژی باشوورێ کوردستانێ دئافرینیت.
ووسا دیارە کو ل دژی باشوورێ کوردستانێ خەباتێن دەزەنفۆرماسیۆنێ گەلەک پێتر د ناڤبەرا دەزگەھێن راگەھاندنا پەکەکێ و لاھۆر جەنگی دا دێ هێنە کرن و مەشاندن.
