نووچەیەک د ANF گرێدایێ پەکەکێ  دا ھاتە وەشاندن. د ڤێ نووچەیێ دا ھنەک کەس کو خوە ھوونەرمەند ددەنە ناساندن، ژ پەدەکێ دخوازن ئەو ژ قادا گەریلا دەرکەڤن. ڤان ھوونەرمەندا کراسێن ھوونەرمەندیێ ل بەرخوە ئێخستن و کراسێن لایەنەکێ سیاسێ، کراسێ پەکەکێ ل بەرخوە کرن.

نووچەیا ANF دا دەرکەتی ب تەمامی ب ڤی ئاوایی یە:

“ھونەرمەند و رەوشەنبیرێن ل باژارێ کۆلنێ ئەلمانیایێ ھاتنە با ھەڤ، داخویانیەک ھەڤپار دان، ھشیاری دا پەدەکێ یا تەڤلی ئێریشێن داگرکەریا دەولەتا ترک بوویە. ل سەر ناڤێ ھونەرمەندێن کورد د داخویانیا ھاتیە دایین دا ھاتە گۆتن کو کورد د پێڤاژۆیەکا دیرۆکی کو روو ب روویێ مەترسیێن مەزن را نە دەرباس دبیت، ئەڤ ھاتە گۆتن: “دەولەتا ترکا داگیکەر ل باشوورێ کوردستانێ نێزیکی 3 مەھانە ل بەر چاڤێ دنیایێ، سووچێن دژی مرۆڤاھیێ دکەت، ل دژی گەریلا و گەلێ کورد قرکرنێ پێک تینیت. دەولەتا ترکا فاشیست و قرکەر ھندەک دخوازیت دەردۆرێن کورد ب تایبەت ژی پەدەکێ ژ بۆ ئارمانجێن خوە بکار بینیت، دخوازیت بکشینیتە شەرێ براکوژیێ.”

کەسێن تەڤلی داخویانیێ بوونە:

ئۆزان سەییدخان، گانی نار، ئۆزان جۆمەرد ، جەواد مەرڤانی، ھۆزان شەمدین، پەیوان ئارژین، حەکیم سەفقان، دەنیز دەمان، تولای شاھماران، زۆزان زودەم، بنەڤش رۆژ، ئەرسین چەلیک، موستافا شاھین، بەسەر شاھین، بولەنت توران، سۆسن، کاکشار ئۆرەمار، سەرحەد مەد، مەمۆ گول، ئالی ئیکیزەر، نەلبەست ئابدولـلاھ، ئامەلە، شیرین، پێری، ئالی زولفیکار…“

نھا گەرەک مرۆڤ پیچەک بەحسا ھەلوەستا خوەدیێ ڤێ داخوویانیێ بکەت و راستیا وان بینیتە بیرا وان..

ل ئالمانیا باژارێ کۆلنێ ھندەک کەس کو ناڤێ ھونەرمەندیێ ل خوە دکەن دەرکەتنە بەر مەدیایێ و داخوویانیەک دان. ھەلوەستا ڤان کەسان بەشەکە ژ شانۆیا کۆمێدی کو پەکەکێ سەناریۆیا وێ نڤیسییە. ئەڤ کەس دبێژن: دڤێ پەدەکە رۆژەکێ زووتر ژ دەڤەرێن گەریلا دەرکەڤیت.

 ئەڤ نەتشتە چ دبێژن؟ واتەیا داخوویانیا وان ئەوە کو دبێژن، بلا پێشمەرگەیێن کوردستانێ ژ خاکا ئازادا کوردستانێ دەرکەڤن.

ئەڤ کەسێن کو خوە ھونەرمەند ددەنە ناساندن دووڤکێ سیاسەتا قرێژ یا پەکەکێ نە، بلا ناڤەک دی ل خوە بکەن.

بێ گومان ھەر کەسەک رەوشەنبیر، ھونەرمەند، سیاسەتمەدار و ھەر کوردەک مافێ وییە د دەربارێ بوویەران دا دیتنا خوە بێژیت. لێ دڤێت بەحسا راستیا ھەیی بکەت. ئەگەر ب راستی ھوون شەر ناخوازن و بەحسا یەکیتیەک نەتەوی دکەن. گەلەک رێ ھەنە.

باش بالا خوە بدنێ؛

باشوورێ  کوردستانێ خوەدییێ ستاتویەک فەرمی و ناڤنەتەویە. ل گۆرا قانوونا بنگەھینا ئیراقێ ھەرێما کوردستانێ ئازادە و خوەدیێ دەزگەھێن خوە یە. سەرۆکاتیا ھەرێمێ، پارلەمەنتۆیا ھەرێما کوردستانێ و حکوومەتا کوردستانێ ل گۆرا قانونا بنگەھین ئاڤا بوونە و خوەدیێ ستاتویەک ناڤدەولەتیە.

پەکەکە ستاتویا باشوورێ کوردستانێ ناس ناکەت. ل ھمبەر سەروەریا کوردستانێ ل گەل دەولەتێن داگیرکەر و ھندەک گروپێن کو دخوازن کوردستانێ تێکببەن ھەڤکاریێ دکەت. ژ ئالیەک دی ڤە دڤێت ھوون کەسێن کو خوە ھوونەرمەند ددەنە ناساندن، دڤێ ھوون بزانبن، پرسگرێک نە د ناڤبەرا پەکەکێ و پەدەکێ دایە. پرسگرێک ناڤبەرا پەکەکێ و دەستھلاتداریا ھەرێما کوردستانێ دایە. پەکەکە ژ ژبەرکو سەروەریا کوردستانێ ناس ناکەت ڤێ یەکێ وەک دلێ خوە دنرخینیت.

ھوون دەنگبێژ بن، ھون سترانا ببێژن، ھوون شانۆیا دا بلەیزن کارێ وەیە. لێ ھوونەرمەندی خوەدی کەسایەتیەکە و ل سەر سیاسەتان رایە. ھوون دکارن بەرژەوەندیێن نەتەوی بپارێزن و نەبنە رەبەنێ بەر دەریێ پارتیان دا کو زکێ خوە تێر بکەن ، یان ژی دەرکەڤن ل سەر شاشا کانالەکێ تەلەڤزیۆنا لایەنەکێ سیاسی.

ئەگەر ھوون سیاسەتێ بکەن ب مەژیەک ئازاد ل گۆرا بیر و باوەریا خوە بکەڤن ناڤ پارتیان دا.

ئەگەر ھوون راست و درستبن. یەکتیا نەتەوی ژ بۆ دەولەتبوونا کوردستانێ بپارێزن. ئەو سیاسەتا کو وە ئیرادا خوە رادەست کری، ل دژی دەولەتبوونا کوردایە. ھوون ب کارێن خوەڤە مژوولبن، نەبنە لەییزتۆکێن لایەنێن سیاسی کو وە ب کار تینن. مخابن ھندەک ژ ڤان ھوونەرمەندان ھێژتا نانێ کوردستانا ئازاد دخوەن.

ئەگەر ھوون دخوازن ھێزێن بیانی ژ خاکا ئازادا کوردستانێ دەرکەڤن، ل ھمبەر حەشدا شەعبی، ل ھمبەر میلیشیایێن ئیرانێ و ل ھمبەر ئارتەشا ترک خوەدی ھەلوەستبن. ئەگەر زەحمەت نەبیت ھوون دکارن ژ پەکەکێ ژی بخوازن ڤەگەرنە باکورێ کوردستانێ چ دکەن بلا بکەن.

د قۆناغا کو ئەم تێرا دەرباس دبین ئەرکێ ھەر کوردەک نشتمانپەروەرە کو خاکا ئازادا کوردستانێ بپارێزیت.

رۆژەڤا کورد