ئه‌رێ پێشمه‌رگه‌ و په‌كه‌كه‌ دێ شه‌ڕێ هه‌ڤ كه‌ن؟

ئه‌رێ پێشمه‌رگه‌ و په‌كه‌كه‌ دێ شه‌ڕێ هه‌ڤ كه‌ن؟
  • ھێڤیدار ئەحمەد – رووداو

وەختا کو دبێژن کوردستان ئانكو پارتی و وەختا کو دبێژن پارتی ئانكو کوردستان. ئەڤ ھەڤۆک ھەرگاڤ د ناڤ ئەندام و ئالیگرێن پارتی دا دهێته‌ گۆتن کو ھەر کەسێ ژ بۆ کوردستانێ کار بکەت، ئەم وی/وێ مینا ئەندام و ئالیگرێ پارتی د هه‌ژمێرین، بلا ئەو کەس نە ئەندامێ پارتی ژی بیت. ئەڤه‌ نیشانا باوەرییا بھێزا سەرکرداتییا پارتی و ئەندام و ئالیگرێن وێ یە کو کوردستانێ د سەر ھەر تشته‌كی دا دهێت.

بەرێ و نھا ژی، ھنده‌ك ھێزێن ناڤخۆیی و بیانی کو هێزا وان نە وەک ھێزا پارتی یه‌، وه‌ك رێخستنا په‌كه‌كێ هه‌ول دده‌ن پارتی بكێشنه‌ د ناڤ شەرەکی دا کو تێدا خوینا کوردان ب دەستێ کوردان بهێته‌ رژاندن. پارتی باش دزانیت، چ جاره‌كێ په‌كه‌كه‌ ب قه‌ده‌ر نھا لاواز نه‌بوویه‌ و ئەنجامێن شەران ڤێ یەکێ تەکەز و پشتراست دكه‌ن.

چالاكیێن په‌كه‌كێ ب رێژه‌یا 95% ل باكورێ كوردستانێ كێمبووینه‌ و ل باشوور چیا ب چیا بۆ سوپایێ تركیێ دهێلیت

سەرکردەیەکی بلند گۆتە من: «چالاكیێن په‌كه‌كێ ل باكورێ كوردستانێ ب رێژه‌یا 95% كێمبووینه‌، ل باشوورێ کوردستانێ ژی نە تەنێ بارەگەھێن خوه‌ ژ سوپایێ ترکیێ را دھێلن، لێ بەلێ چیا ب چیا ژی ڤالا دکه‌ن. ڤێ ڤالاکرنێ گومانەکا مەزن ل جه‌م خه‌لكێ ھەرێما کوردستانێ و پارچەیێن دن یێن کوردستانێ چێکرییە. ئەو دپرسن گەلۆ بۆچی ھێزەکا وه‌ك په‌كه‌كێ وان ناڤچەیان ب ھێسانی رادەستی سوپایێ ترکیێ دکەت؟

نھا سوپایێ ترکیێ شەرێ ˈکلاسیکˈ دگه‌ل په‌كه‌كێ ناکەت. ئەو ھەمی شەرێ خوە ب رێیا چەکێن پێشکەتی، فرۆکەیێن درۆن و تەکنۆلۆژیا عه‌سكه‌ری دکەت. ل 5/6/2021ێ وەختێ کو 5 پێشمەرگەیێن ھەرێما کوردستانێ ب دەستێ چه‌كدارێن په‌كه‌كێ ل چیایێ مەتینایێ ھاتن شەھیدکرن و ئەو چەکێن کو پێشمەرگە پێ ھاتینه‌ شەھیدکرن ژ جورێ «كۆرنێت» یێن دژی تانکان بوون و پاشمایا وان چەکان ل جهێ ئێریشێ مایە و ژ ئالیێ ھێزێن پێشمەرگەی ڤە ھاتییە دۆکیۆمەنت کرن.

نێچیرڤان بارزانی چ نامه‌ بۆ قه‌ندیلی هنارتبوو و په‌كه‌كێ چه‌وا به‌رسڤ دا؟

بۆچی په‌كه‌كێ مووشه‌كا كۆرنێت ل دژی پێشمه‌رگه‌ی بكارئینا و ل دژی سوپایێ تركیێ ب كار نائینیت؟

ل ڤێرێ پرسا سەرەکی ئەڤەیه‌: مادەم کو ئەڤ چەک د دەستێ په‌كه‌كێ دا ھەیە، گەلۆ بۆچی ل ھەمبەر ھاتنا سوپایێ ترکیێ نەھاتییە ب کار ئینان، لێ په‌كه‌كه‌ ڤان چەکان ل ھەمبەر ھێزێن پێشمەرگەی ب کار دئینیت؟ بەری کو ھێزێن پێشمەرگەی پێشرەویێ ژ بۆ چیایێ مەتینی بکه‌ن، ب رێیا که‌نالێن تایبەت ژ په‌كه‌كێ را ھاتە گۆتن کو ھێزێن پێشمەرگەی دهێنه‌ مەتینی دا سوپایێ ترکیێ ب به‌ھانەیا په‌كه‌كێ وی چیایێ ستراتیژی وەک ناڤچەیێن دی داگیر نەکەت. بەرسڤا په‌كه‌كێ وه‌ھا بوو: ئەم قەبوول ناکه‌ین و ھەکە پێشمەرگە بهێن ئەم دێ ل وان ده‌ین!

د روونشتنەکێ دا، سەرۆکێ ھەرێما کوردستانێ رێزدار نێچیرڤان بارزانی، گۆتە مە: «من گه‌له‌ك هەول دان رەجەب تاییب ئەردۆگان رازی بکم دا پێڤاژۆییا ئاشتیێ ل ترکیێ بهێته‌ دەست پێ کرن، ل دوماهیێ ئاردۆگان گۆت ئەز دێ ب وی شەرتی رازی بم کو ھوون ژی ˈسەرۆکێ ھەرێما کوردستانێˈ د ناڤ پێڤاژۆیێ دا بن. ئەز رازی بووم و ڤەگەریام ھەرێما کوردستانێ. من نامە بۆ قەندیلێ هنارت كو خوە ژ بۆ دەستپێکرنا پێڤاژۆیا ئاشتیێ و بێدەنگکرنا تڤه‌نگان ئامادە بکه‌ن. لێ هه‌فتییه‌ك نەچوو، ل باژارێ ھەولێرێ دیپلۆماتکارەکێ کۆنسولخانەیا ترکیێ کوشتن و نھا ژی پێشمەرگەیان شەھید دکه‌ن. ئەڤه‌ بەرسڤا په‌كه‌كێ بوو ژ بۆ ھەولدانێن ھەرێما کوردستانێ!

د ناڤا سێ رۆژان دا 6 پێشمەرگە ل سەر دەستێ په‌كه‌كێ شەھید بوون. پێشمەرگەیێ دوماهیێ «رزوان سندی» بوو کو په‌كه‌كێ 3 زارۆکێن وی بێ باب هێلان. خەلک دپرسن بۆچی حکوومەتا ھەرێما کوردستانێ جابا ڤان دەستدرێژیێن په‌كه‌كێ نادەت؟ هنده‌ك دبێژن گەلۆ بۆچی سەرۆکێ ھەرێما کوردستانێ فەرمانێ نادەت ھێزێن پێشمەرگەی دا په‌كه‌كێ ژ ناڤ ئاخا باشوورێ کوردستانێ دەربێخن؟

هه‌گه‌ر شه‌رێ پارتی و په‌كه‌كێ روو بده‌ت، هوون دزانن دێ چ چێبیت؟

یا راست پارتی باش دزانیت د ناڤا په‌كه‌كێ دا ژ كووڤه‌ بریار دهێنه‌ دان دا کو ئەڤ شەره‌ بقەومیت. ئەو په‌كه‌كێ وەک کارتەکێ ب کار دئینن دا پاشی بێژن، پارتی شەرێ براکوژیێ دکەت و پارتی دار و دەستکێ ڤێ دەولەتێ و ڤان دەولەتانە! لێ ئێدی پارتی ناکەڤیتە داڤ و خەفکێن وه‌ها. باوەرییا پارتی ئەوە کو ھێزێن پێشمەرگەی تەنێ ژ بۆ پاراستنا کوردستانێ و سەرئێخستنا کوردان ل هه‌ر جهێ هه‌بن ئاڤا بوویە، نە ژ بۆ شەرێ «براکوژیێ». کو دەمەکە ئەڤ شەرێ «براکوژیێ» ژ ئالیێ سەرۆک بارزانی ڤه‌ ھاتییە «حەرام» کرن، لێ ئەڤه‌ ناهێته‌ واتایا کو په‌كه‌كه‌ و ھێزێن دی ڤێ باوەرییا سەرۆک بارزانی خراب ب کار بینن.

وەک دهێته‌ گوھێ مە، دبێژن ھەکە پارتی و ھێزا خوە بکەڤنە د شەرێ د گه‌ل په‌كه‌كێ دا، نزانم چ و چ دێ هێته‌ سه‌رێ وێ رێخستنێ؟ پارتی و ھێزێن پێشمەرگەیێن کوردستانێ ل جۆتمەھا 2017ێ ب تەنێ مان، لێ د ھەردوو داستانێن «پردێ و سحێلا» دا ل ھەمبەر ھێز و چەکێن چەند دەولەتان راوەستییان و ئەو تێک شکاندن. سوپایێ ئیراقێ، حەشدا شەعبی و ھەڤکارییا دەولەتێن دی یێن ناڤچەیێ و ناڤدەولەتی و چەکێن ئامەریکی، نه‌شیان زۆرا ھێزێن کوردستانێ و پارتی ژ ناڤ ببه‌ن. پارتی نھا ژی مەزن هزر دكه‌ت. چاڤێ وێ لێ یە کورد ل باکور، رۆژھلات و رۆژئاڤا خوەش بژین، ل شوونا تڤه‌نگان، بلا دیالۆگ و ئاشتی زمانێ خەباتا وان بیت، ھەر ئەڤ ژی دبیته‌ خالا سەرکەتنێ.

ژێده‌ر: www.rudaw.net

پوستێن ھەمان بەش