حەسەن لوقمان ئەرتاش
دەمەکە، دیسان “شەرێ براکوژیێ” د رۆژەڤا سیاسییا کوردان دایە. ئەڤ رۆژەڤە ھەردەم ب ئێریشێن پەکەکێ بۆ سەر پێشمەرگە دبیتە رۆژەڤا کوردان و ب رۆژان پەکەکە، ب دەھان رێخستن و کۆمێن خوە ل باکور، باشوور، رۆژئاڤا و رۆژھلات بانگەشەیا براکوژیێ دکەت.
سەرێ مەھا خزیرانێ ل مەتینا و زاخۆیێ ئێریشی سەر پێشمەرگە کرن د ناڤا 4 رۆژان دا 6 پێشمەرگە شەھید کرن و 7 پێشمەرگە ژی بریندار کرن.
پشتی وێ ئێریشا ھۆڤانە و شەھادەتا پێشمەرگەیان ھەری زێدە دەنگ ژ پەکەکێ و کۆمێن وێ دەردکەڤیت و ئەو بانگا “ئاشتیێ” و بداویکرنا شەری دکەن.
ھەری داوی ھەڤسەرۆکێ تەڤگەرا جڤاکا دەمۆکراتیک (تەڤ-دەم) غەریب حسۆ ژ بۆ مەدیایا خوە دبێژیت؛ دەولەتا ترکیێ یا داگیرکەر ھەول ددەت باشوورێ کوردستانێ داگیر بکەت و نرخ و دەستکەفتیێن کوردان تێک ببەت و ترکیا ھەول ددەت پارتیێن کوردی بەشداری ئێرشێن خوە بکەت.
غەریب حسۆ بانگ ل ھێز و پارتیێن کوردی و رێخستنێن جڤاکا سڤیل یێن پارچەیێن کوردستانێ، ب تایبەتێن باشوورێ کوردستانێ کریە کو زەختەکا مەزن ل پەدەکێ بکەن دا کو دەست ژ ھەڤکاریا خوەیا د ئێرشێن داگیرکەریا ترکیێ بەردەت.
ھەروھا حسۆ گۆتیە: “شەرێ ناڤخوەیی ژ ئێرشێن ترکیا مەترسیدارترە و دژمن ھەول ددەت ڤێ سیاسەتێ بدەتە مەشاندن. دڤێت پەدەکە ل کێلەکا دژمنی نە بیت و ژ بۆ یەکتیا کوردی ئامادە بیت.”
بەریا ھەموو کەسی دڤێت رایاگشتی و بەرپرسێن حکوومەتا ھەرێما کوردستانێ بزانبن ئەڤ ئێریشێن پەکەکێ بۆ سەر پێشمەرگەیان نەیا یەکێ و نە ژی یا داویێ یە. زیانێن پەکەکێ ل خەلک و ئاخا ھەرێما کوردستانێ دای رۆژانە د نووچەیان دا دهێنە نڤیسین. ئەو کەسێن مەراق دکەن دکارن ل وان نووچەیان بنێرن.
یێن دبنە سەدەما ڤالاکرنا گوندێن کوردان، شەھیدبوونا پێشمەرگەیان و داگیرکرنا کوردان فەرماندارێن غەریب حسۆ یێن ل قەندیلێ نە کو د ھەمبێزا مەڵایێن ئیرانێ دا روونشتینە.
دژمنێن ھەری مەزن یێن کوردان ئەون یێن ئەڤە 40 سالە 20 ھەزار کەچ و لاوێن کورد ل سەرێ چیایان ژ بۆ، “دەمۆکراسیا ئیران و ترکیا و براتیا گەلان” داینە کوشتن و ئیرۆ ھەموو سەروەت، سامان، ھێز و پیرۆزیێن ھەرێما کوردستانێ دکەنە ئارمانجێن خوە.
خاین و نۆکەرێن ترکیا و ئیرانێ ئەون یێن د ھەر ئێریشەکا بۆریا نەفتێ یا ھەرێما کوردستانێ دا نێزیکی 100 ملیۆن دۆلاران زیانێ دگھینینە خەزینەیا ھەرێما کوردستانێ.
خوینمێژ ئەون یێن بووینە سەدەما وێرانکرنا شرنەخ، سوور، نسێبین، جزیر، گەڤەر، فارقین، لجەیا باکورێ کوردستانێ و د ناڤا 3 مەھان دا 10 ھەزار لاو و کەچێن کورد کرنە قوربانیێن سیاسەتا خەندەکان و نامووسا کوردان پێشکێشی ئارتێشا داگیرکەران کریە.
دڤێت ئێدی حکوومەتا ھەرێما کوردستانێ بزانیت. روویێ رەشێ پەکەکێ و کۆمێن وێ زەلالە و ئاشکەرایە دێ ئەو ئێریشێن پەکەکێ ھەر بەردەوام بن و ب بەردەوامی ژی پرۆپاگاندایا خوە ژی دێ کەن.
ھەرێما کوردستانێ ھەڤپەیمانێ ناتۆیێ و یەکیتیا ئەورۆپایێ یە و ناتۆ و یەکیتیا ئەورۆپایێ ژی پەکەکێ وەکو تەرۆریست ناس دکەن. د دەمەکێ ووسا دا ژ بۆ ژناڤبرنا پەکەکێ و ب داویکرنا ئێریشێن پەکەکێ ھەرێما کوردستانێ دڤێت ب لەز لگەل وان ھەڤپەیمانێن خوە بکەڤیتە د پەیوەندیان دا و تەدبیرێن پێویست وەربگریت.
سەرۆکوەزیرێ ھەرێما کوردستانێ مەسروور بارزانی، سەرۆکێ ھەرێما کوردستانێ نێچیرڤان بارزانی دڤێت ئێدی رازی نەبن پەکەکە ببیتە بەھانە و رێ ژ بۆ داگیرکەریا ترکیا ل باشوورێ کوردستانێ خوەش بکەت. ھەموو حزبێن باشوورێ کوردستانێ دڤێت بزانن ھەگەر ئیرۆ ل بەرامبەر پەکەکێ نەسەکنن یا ب سەرێ عەفرین، سەرێکانیێ، گرێ سپی دا ھاتی دێ ب سەرێ زاخۆ، ئامێدی، دێرالووکێ، قەلادزێ، کانی ماسێ، ماوەتێ ژی دا هێت و ئەو باژار و ناڤچەیێن کوردستانێ ژی کەڤنە بن سەروەریا ترکیا.
رۆژ بەریا رۆژەکێ دڤێت پارلەمەنتۆیا کوردستانێ ل سەر ئێریشێن پەکەکێ و داگیرکەریا ترکیا ل ھەرێما کوردستانێ جڤینەکا ئاوارتە ساز بکەت و تەدبیرێن پێویست بستینیت.
