کوردەک دی ژ بۆ “دەمۆقراسییا” ترکیێ بوو قوربان

کوردەک دی ژ بۆ"دەمۆقراسییا" ترکیێ بوو قوربان
  • عەزیز دیلان

بەرێ گاڤا ترکان ناڤێ کوردان دبھیست، ژ ترسان ب خوە دا دمیزت و ب لەز درەڤییان. ترکەکێ نەژادپەرەست یان نەتەوپەرەست نەدوێریان گاڤا خوە باڤێژیتە کوردستانێ. سیاسەتمەدارێن پارتییێن ترک نەوێریابوون ل کوردستانێ سیاسەتێ بکەن. وی دەمی کورد ھەبوون، کوردایەتی ھەبوو، روح و گیانی مللی و نەتەوی ھەبوو، ھەست و ھەلوەستەک کوردستانی ھەبوو. لێ پەکەکێ میزتە ب ڤان نرخێن نەتەوی ڤە، کورد ژ روح و گیانێ نەتەوی دوور خستن، ھەست و ھەلوەستەک کوردستانی بۆ کوردان نەھێلا و کوردستان ژ  بۆ گورگ و چەقەلێن ترک کرە قادا لۆتک و زیترکێن ترکایەتییێ.

ترکێن کو بەرێ نەدوێریان خوە نیشانی کوردان بدەن و خوە ژ کوردان دپاراست، ئیرۆ بێ ترس ئێریشی سەر مال و دەزگەھێن کوردان دکەن، بێ ترس دەست داڤێژن نامووس و خیرەتا وان و ل بەر چاڤێ دنیا و عالەمێ کوردان دکوژن. سەدەما ڤێ یەکێ سیاسەتا شاشا پەکەکێ و ھەدەپێ یە، سیاسەتا دەمۆکراسییا پووچ و ڤالا و چیرۆکا براتییا گەلانە. ژ بەر کو پەکەکێ و ھەدەپێ روحا نەتەوی د کوردان دا نەھشت و کورد کرنە قوربانا ترکییایەک دەمۆکراتیک، کورد ژ مێرانیێ کەتن، بوونە ترسۆنەک و نەوێرن دەنگێ خوە ژ ترکان را بکەن. ئەڤ ژی دبیتە سەدەما کوشتنا کەچ و خۆرتێن کورد و ل سەر خوینا وان کەچ و خۆرتێن کورد سیاسەتەکا قرێژ، سیاسەتەک ل دژی ماف و حەق و حقووقێن کوردان دهێتە مەشاندن. ژ بەر کو رێڤەبری و سەرکێشییا ڤێ سیاسەتا ترکایەتییێ د دەستێن ترک، ئەرمەن و عەرەبان دایە، کوشتنا کەچ و خۆرتێن کورد ل حەسابا ھەردو ئالییان دهێت و ھەردو ئالی ژی ل سەر ژناڤ برنا کوردان دچەرن.

ھەری داوی د شەرێ خەندەکان دا دەولەتا ترک و پەکەکێ و ھەدەپێ 10 ھەزار خۆرت و کەچێن کورد دانە کوشتن، باژار رووخاندن، وێران کرن و زێدەتری ملیۆنەک کورد کۆچبەری باژارێن ترکیا کرن. ژ خوە ئاسیمیلەکرنا کوردان پرسگرێکەک ب سەرێ خوەیە.

ئیرۆ ژ ئالییەکی حکوومەت و شریکێن حکوومەتا ئاکەپێ دخوازن ھەدەپێ بدنە گرتن و ژ سیاسەتێ دوور بێخن. ژ ئالییێ دن زرت و گەفێن رۆژنامەڤانێن نیژادپەرەستێن ترک بەردەوامن و ب بەهانەیا ھەدەپێ ئێریشی کوردان دکەن. د 17ێ ڤێ مەھا خزیرانێ دا، نیژادپەرەستێ ترک ئۆنور گەنجەر ئێریشی بارەگەھا ھەدەپێ یا ئزمیرێ کر و کەچا کورد دەنیز پۆیراز ب شەش گولەیان قەتل کر. ڤیدیۆ و موکرھاتنێن سەرۆکێ مافیایێن ترکیێ سەدات پەکەر ژ خوە فشارا خوینێ یا حکوومەت و جڤاکێ بلندتر کریە. ژ ئالییێ دی ژ بۆ ھلبژارتنا سالەک دو مانە. ل گۆر داتا و لێپرسینان خەلک ژ سیاسەت، دزی و گەندەلییێن ئاکەپێ و مەھەپێ عاجزن و د ھلبژارتنێ دا تێکچوونا ئاکەپێ دهێتە تەخمینکرن. وە خویایە حەتا ھلبژارتنا دێ گەلەک ئالۆزی و ئاریشە هێنە دروستکرن، دا کو ئاکەپە و مەھەپە عەیب و عارێن خوە ڤەشێرن و رۆژەڤێ بگوھرن.

گەلەک کەس باوەر دکەن کو پارتییێن دەستھلاتدار ژ بۆ کورد دیسا ب ھەدەپێ ڤە بێنە گرێدان، ئێریشی ھەدەپێ دکەن. ژ بۆ کوردێن باکور ژ بن کۆنترۆلا پەکەکێ و ھەدەپێ دەرنەکەڤن دێ ئێریشی کوردان کەن، وان کوژن یان بدەنە کوشتن، یاریا ب ھەستێن وان کەن و کوردان دیسا دەرئێخنە تاخ و کۆلانان. داخویانییا ھەڤسەرۆکێ ھەدەپێ میتحات سانجار ڤێ یەکێ ئاشکەرا دکەت. پشتی کوشتنا دەنیز پۆیراز، میتحات سانجار داخویاند و گۆت: “ئیرۆ دێ جڤینا مە ل ئزمیرێ هێتە لدارخستن و دێ 40 رێڤەبرێن مە بەشداری جڤینێ ببن. لێ ژ بەر ھندەک سەدەمێن لەزگین مە جڤین پاش خست”. د گۆتنێن سانجار دا خویایە کو ئاگاھداری و ئێخباری ژ دەزگەھێن دەولەتێ گرتنە و جڤین ل پاش ئێخستیە. بێھنا گەنی ژ گۆتنێن سانجار دفرە و پرسا “گەلۆ دەنیز پۆیراز ب زانەتی کرە قوربان” د سەرێ مرۆڤی دا چێدکەت.

وەلحاسل، کەچا کورد دەنیز پۆیراز نەیا یەکەمە و نە ژی یا داویێ یە، یێن تێنە کوشتن کوردن، یێ وندا و ھەلاک دبن دیسا کوردن.

و ژ بۆ چ؟

ژ بۆ “دەمۆقراسییا” ترکیا و چیرۆکا براتییا گەلان..

بلا روحێ دەنیز پۆیراز شاد بیت، سەرێ مللەتێ کورد ساخ بیت…

ئەنقەرە

پوستێن ھەمان بەش