د نووچەیەکێ دا ئاژانسا نووچەیان یا پەکەکێ یا ب ناڤێ ANFێ نڤیساند کو 180 پێشمەرگەیان ل دھۆکێ دەست ژ کارێ خوە بەردا، ژبەرکو وان نەدخواست ل دژی پەکەکێ شەری بکەن. راستیا ڤێ نووچەیا دو رێزکی، کو چاڤکانییا وێ نەدییار چیە؟
گەلۆ چاپەمەنییە …..؟
مەدیایا پەکەکێ ھەر رۆژ مە عەجێبمایی دکەت. ئەو ھەما هەما رۆژانە نووچەیێن درەو و مەزنکری یێن ل سەر باشوورێ کوردستانێ بەلاڤ دکەت. ھەر دەما ئەم نووچەیێن درەو دخوینین، ئەم دبێژین کو ژ ڤێ درەوێ مەزنتر درەو نابیت. لێ ئەو مە سورپرایز دکەن و جارەکا دی درەوەکا مەزنتر چێدکەن. ب راستی، مەدیایا پەکەکێ، مینا ترۆمبێلەکا ستۆپێ وێ پەقیایی یە، نە دیارە کا دێ راوەستیت و چ کەت. ژ لایەکێ، ب خەباتکار و کارمەندێن خوەیێن راگھاندنێ یێن د مەدیایا جڤاکی دا، ژ لایێ دی ژی، ئەو نووچەیێن درەو ب زمانێن جودا-جودا بەلاڤ دکەن کو تەنێ زیانێ بگەھیننە گەلێ کورد. یا بالکێش ئەوە کو ئەڤ نووچەیێن درەو نە ل دژی داگیرکەران تێنە چێکرن، بەلکو تەنێ ل دژی حکوومەتا ھەرێما کوردستانێ و پارتیێن دی یێن سیاسی یێن کورد تێنە چێکرن. ژ بەر ڤێ یەکێ پەکەکێ بەرێ چەکا خوە نە دایە دژمنێ کوردان بەلکو دایە کوردان ب خوە.
ب تایبەتی پشتی ئێرشا ڤێ داویێ یا پەکەکێ ل سەر ھەرێما کوردستانێ ئەنجامدای، مەدیایا پەکەکێ ب ئاوایێن کو نە ل گۆری ئەخلاق و بنەمایێن مرۆڤی نە، د چاپەمەنیێ دا ئێرشی نرخێن باشوورێ کوردستانێ دکەت. ب گشتی، هەگەر کەسەک د جڤاتێ دا نووچەیێن ووسا درەو و روورەش بەلاڤ بکەت، زەنگلەکێ ب دووڤکێ وی ڤە گرێددەن و وی دناڤا گەلدا ریسوا دکەن. ئەو کەس وەکی فتنەچی و فەساد دهێتە ناساندن. لێ مخابن ئەڤ مەدیایە خوە وەکی کەڤنەشۆپیا چاپەمەنیا ئازاد ژی ددەتە ناساندن.
ل نووچەیێن درەو یێن راگهاندنا ڤرەک یا پەکەکێ بنێرن کو ب تەنێ د ڤێ مەهێ دا بەلاڤ کرینە؛ نێچیرڤان بارزانی ناڤچەیێن سنۆری یێن باشوورێ کوردستانێ فرۆتینە ترکیا، ئیدیعا کر کو میلیشیایێن عەرەب ژ عەفرینێ ئانینە باشوورێ کوردستانێ و وان ل گەل پێشمەرگە پەروەردە دکەن. ئەو حەتتا د دەرەوان دا هندە پێشدا چوون و گۆت؛ سەرەدانا نێچیرڤان بارزانی بۆ ئیماراتێ ژ بۆ داخوازکرنا رادەستکرنا سەرۆکێ مافیێن ترکیا سەدات پەکەر بوو. وان گەریانا مەسروور بارزانی یا ل بەلچیکا و یەونانیستانێ ژی وەکی گەرا پشتگریا ترکیا شرۆڤە کر.
نها ژی، مەدیایا پەکەکێ ھێژتا ژی راگھاندنا دەزەنفۆرماسیۆنا “زانیاریێن نەراست کو دهێنە بەلاڤکرن داکو مرۆڤ پێ بهێتە خاپاندن” ل سەر باشوورێ کوردستانێ ب تووندی بەردەوام دکەت. ژ بۆ ڤێ، پەکەکە دخازیت یەکەمجار نرخێن بنگەھین یێن باشوورێ کوردستانێ پووچ بکەت، بێرێز بکەت و وەکو دژمن دەست نشان دکەت. تشتێ سەیر ڤێ داوییێ چاپەمەنیا پەکەکێ ڤێ یەکێ ئیدیعا دکەت کو پەکەکە پێشەنگا راپەرینا 1991ێ، یا باشوورێ کوردستانێ یە. ل ئالیێ دی دا ژی، تەکۆشینا لەشکەری و سیاسی یا سەدسالی یا باشوور کوردستانێ و پێشمەرگە ئارمانج دگریت.
رەشکرن و بێرێزی کرنا ب پێشمەرگێ کوردستانێ، نە تشتەکێ نوویە
چاپەمەنییا پەکەکێ نھا د وەشانێن خوە دا، راستەراست تێگەھا پێشمەرگە ئارمانج دکەت. ب راستی، ئەڤ ئێرشە دەمەکێ درێژ دهێنە ئەنجامدان. رێڤەبەرێ پەکەکێ جەمیل بایک، د ھەڤپەیڤینەکا خوە دا دگەل رۆژنامەیا ئەلمانی Frankfurter Allgemeine د 22یێ تەباخا 2014ێ دا گۆت، “پێشمەرگە نکاریت شەری بکەت، ھوون وان چەکێن خوە بدەنە مە.” پشتی وێ رۆژێ، مەدیایا پەکەکێ دەست ب سیاسەتەکا وەشانێ یا زراڤ و بێی ناڤبر یا شەرمەزارکرنا پێشمەرگێن کوردستانێ کر. ھاتە ئیدیعا کرن کو لەشکەرێن ترک ھێزێن پێشمەرگە پەروەردە کرنە. دەما کو ئەڤ درەو نەھاتە قەبوولکرن، ئەڤجا ھاتە ئیدیعا کرن کو د ناڤبەرا ھێزا پارامیلیتەرا ئاکەپێ-سادات و پێشمەرگە دا تێکەلیەک ھەیە. پەکەکە ھەولدانێن پێشمەرگە یێن ژ بۆ ئەولەھییا دەڤەرێ وەکو ئێرشا ل سەر خوە قەبوول دکەت و بەردەوام درەوان دکەت.
مراد قەرایلان، د ئاخافتنا خوەیا وێ رۆژا دی دا، د گۆت: “پێشمەرگەیان نەدزانی د چوونە کیڤە” وی خواست تێگەھەکێ “کو پێشمەرگە نەزانە، جاھلە و ئەو کەسن کو ھاتیە خاپاندن”، ب ئافرینیت. وی باس ل وان پێشمەرگەیان دکر کو ژ لایێ پەکەکێ ڤە ھاتیە شەھید کرن. پێشمەرگە خوەدان کەڤنەشۆپیەکا زیدەتری 100 سالا دێرینە، کو ب ھەزاران شەھید دانە، ھەمیان پەروەردەھیا ئاکادەمیک دیتییە و ئەو ب چ شێوا ناھێنە خاپاندن. لێ هەگەر ھوون بێژنە قارایلان؛ کا هەوە چاوا زارۆکێن ژ دایک بوویێن سالا 2007-2008-2009، کو ھێژتا مافێ ھەلبژارتنێ نینە، نەشێن هەلبژارتنا ئایدەۆلۆژیک بکەن، نزانن ئیمزایەکێ ل سەر کاغەزەکێ بکەن… بۆچی دبەنە شەری، قەرەیلان دێ بێژیت “شەھیدێن مە پیرۆزن ئەم رێکێ نادەین کو گوومان ل سەر وان بهێتە چێکرن.” شەرڤانێن بێ رھ و سمبێل ئانکو زارۆک…
ئارمانج کرنا پێشمەرگەیان خیانەتەکە ل ھەمبەر دیرۆکا کوردستانێ
پێشمەرگە ھەلوەستا لەشکەری، سیاسی و چاندی یا گەلێ کوردە ل دژی کۆمکوژی و نیزاما داگیرکەریا سەدسالا 20ێ. پێشمەرگە نە ملکێ حیزبەکێ یە، پێشمەرگە ناڤێ بەرخوەدانا سەدسالی یا تێکۆشینا نەتەوەیی و نەتەوپەروەری یا کوردە. تێکۆشینا پێشمەرگە سەرھلدانا کوردانەیا ل دژی کۆلۆنیالیزما ناڤنەتەوەیی یا سەدسالا 20ێ یە. پێشمەرگە ستارگەها نەتەوەیا کوردە.
دژایەتیکرنا ب ڤی رەنگی یا دیرۆک و پێشمەرگە، دژمناتی و ئارمانجکرنا وان ب رامانا خیانەتا ل ھەمبەری گەلێ کورد و دیرۆکا وی یا سەد سالان دهێت.
بچووککرنا پێشمەرگە خیانەتە ل دیرۆکا کوردا. یا کو پەکەکە دخوازیت بکەت ئەڤەیە کو قەهرەمان و دیرۆکا پێشمەرگە بەرۆڤاژی بکەت و ئەو ب خوە ل سەر ڤان دەستکەتییا روونیت. دێ پەکەکە ڤێ سیاسەتا خوە بەردەوام کەت. سبە یان رۆژەکا دی، ب هاریکاریا ھندەک ئەندامێن یەنەکێ، یەک یان دو کەس دێ دەرکەڤن و بێژن، بنێرن، پێشمەرگە دەست ژ پێشمەرگاتیێ بەردا. ئانکو، دێ ئەڤ فتنە-فەسادی و خەرابی بەردەوام بیت.
ئێرشا پەکەکێ یا ل دژی پێشمەرگە ژی دێ بەردەوام بیت. ژ بەر کو ژ بۆ پەکەکێ، ھەلوەستەکا کوردینی و ناسنامەیا کوردا پێشەنگ گرتن نینە. بەرژەوەندیێن وێ ل سەر ھەر تشتی دانە و دەردکەڤنە پێش.
چەتەگەرییا چاپەمەنییا پەکەکێ
ب راستی، پەکەکە سازیەکا چەتەگەرییە. سەرێ ڤێ سازییا چەتەیان ژی راگەھاندنا پەکەکێ یە. خەلەتیا ھەری مەزنا حکوومەتا ھەرێما کوردستانێ ئەڤەیە کو ئەو ڤان تایبەتمەندیێن پەکەکێ یێن وێرانکەر، تەهدیدکەر و دەستەسەرکەر زوو نابینیت. و تەسبیتێن ل سەر پەکەکێ دکەت ژی وان نەوەکو سازیەکا جاشا بەلکو وەکو حیزبەکێ دبینیت. لێبەلێ، پیدڤیە باشوورێ کوردستانێ زمانێ تێکۆشینا خوە ل گۆری دژبەرێ خوە دیار بکەت. د گەل مافیا و جاشا دا ب رێبازێن دەمۆکراتیک شەر ناهێتە کرن. رێڤەبەریا کوردستانێ د ڤێ مژارێ دا گەلەک نەرم و ڤەدەر د راوەستیت. ب چ رەنگا بەرسڤا وان ب ھەمان زمان و ھشکاتیا پەکەکێ نەدایە.
میناک، پەکەکە دبێژیت 180 پێشمەرگەیان چەک دانا، پێشمەرگە رەڤییان، ئەو نەزانن و هتد… لێبەلێ، ب ھەزاران کەسێن کو ژ پەکەکێ ڤەقەتییایی ل باشوورێ کوردستانێ نە. وێ رۆژێ ئەو جھێ پێشمەرگە لێ شەھید بوویین، چار چەکدارێن پەکەکێ زەلام و ژن، خوە رادەستی پێشمەرگا کرن. ھەر رۆژ ب دەھان چەکدارێن پەکەکێ خوە رادەستی پێشمەرگە دکەن. لێ رێڤەبەریا کوردستانێ ئەڤ راستییە چ جارا نەکرە مادەیەکێ پرۆپاگاندایێ. یێن کو ب دوگیانی قودبوویی، یێن کو ھاتنە ئێشکەنجە کرن و قودبوویی، نەخوەشێن کو ل سەر رێکان ھاتینە جهـ هێلان و هتد… حکوومەتا کوردستانێ چ جارا بەحسا وان نەکرییە. حکوومەتا ھەرێما کوردستانێ و پێشمەرگە ھەر گاڤ ئاستا خوە یا رێزداریێ پاراستییە و خوە نەخستییە ئاستا کەتیبوونا مەدیایا پەکەکێ.
لێبەلێ چاپەمەنیا پەکەکێ ڤێ ھەلوەستا خوە یا ئێرشکەر و بێشەرم بەردەوام دکەت. گەر یێن کو دبێژن ئەم بێ لایەنین، ل سەر ڤێ ھەلوەستا ئێرشکەریا پەکەکێ کەڕن، بلا دەست ژ ڤێ بێ لایەنیا خوە یا کۆمێدی بەردن. یێن کو دزانن پێشمەرگە ئەڤە 100 سالن بارێ تەکۆشینا کوردستانێ دایە سەر ملێن خوە و دمەشینن دڤێت دەرکەڤنە ھۆلێ و بێژنە پکک ئێدی ڤێ وێرانکارییا لسەر کوردستانێ راوەستینە.
