لەوما ژی ھەر دەستپێکەکێ دوماهی ئانینا وێ ھەیە. ئیجار ئەو دوماهی ئانین دێ چاوا بیت، ب چ رەنگ و ئاوایی برێڤەچیت گرێدایی جڤاکی یە.
دیسا ئەم بووینە شاھدێ وێ یەکێ کو ھلوەشاندنا سیستەمێ دیکتاتۆران ژ ناڤا خوە دا دەست پێ دکەت و داوی لێ ھاتیە و دهێت. باوەریا من ئەوە کو دێ داوی ئانینا پەکە(ک)ێ ژی وەھا بیت. لەوما من گۆت ئەڤە دەستپێکەکە…
دیکتاتۆری نە حەتا حەتایێ یە. رۆژا وان ژی دهێت و وەکو تو نۆکا ل کەڤری بدەی، پارچە پارچە دبن. ئەو پارچەبوون د گەل خوە دا نووژەنیەکێ و یەکیتیەکا خورت، ل سەر پاراستن و ئازادیا وەلاتی دروست دکەت.
ھەر وەھا ھەر پارتی و رێخستنا دیکتاتۆر ژی نە حەتا حەتایی یە. ئەو پرانی ب دەستێ سەردەستێن خوەدیێ خوە تێنە دامەزراندن دا کو ل گۆر بەرژەوەندیا وان کار و خەباتێ بکەن. حەتا نھا پەکە(ک)ێ ژی ئەو کرییە.
ل گۆر ڤێ ژی داگیرکەرێن مە هەردەم لێ خەبتینە دا کو ھێز و قاوەتەکا خورت یا کوردان چێنەبیت. ژ بۆنا ڤێ ژی هەردەم کار کرنە و د گەلەک واران دا ب سەر ژی کەتینە. لێ وەکو مە گۆت ھەر تشت چ جاران نە حەتا حەتایێ یە.
دەما داگیرکەران دیتین کو تەڤگەرا وەلاتپارێزان ل باکور کوردستانێ رۆژ ب رۆژ خورت دبیت، ب ھێز دبیت و دبیتە خوەدی هێزەکا بێ ھەمپا. ئاھا وی دەمی، ئەو ژ نوو دا فکرین و فکرین کو چاوا ڤێ تێک ببەن.
لەورا ژی ئەڤە نەھاتە حەسابا داگیرکەرێن ترک وەکو باڤ و کالێن خوە کرن و رێخستنەک ژ کوردان و ل سەر ناڤێ وان دامەزراندن دا کو ب رێیا وێ پێشی ل تەڤگەرا ئازادیخواز بگرن. ھەر وەھا ژی کرن و د گەلەک واران دا ب سەر ژی کەتن.
لەوما د وێ کەلا کەلا گەرما تەڤگەرێن وەلاتپارێز کو گەش و خورت دبوون (1960-1980). کاربدەستێن ترکان ژی د ناڤا وێ کەلە کەلێ دا پەکە(ک)ە دامەزراندن، دا کو وێ پێلا وەلاتپارێزیێ بشکێنیت. ھەر وەھا ژی بوو. لێ نە ب گشتی.
مە گەلەک جاران ئەڤ مژارە نڤیسییە و گۆتیە. لەوما پێدڤی ناکەت ئەم دیسا ل تشتێن بەرێ ڤەگەرین. لەوما من خواست بێژم کو ژ پەکە(ک)ێ ڤەقەتاندنا بەرپرسێ گەورە ئۆزگۆر ژیاندا ل گۆر من دەستپێکا ھلوەشاندن و داوی ئانینا پەکە(ک)ێ یە.
حەتا نھا نە د ناڤا پەکە(ک)ێ دا و نە ژی ژ دەرڤی وان چەند کار و خەبات ھاتبیتە کرن ژی مە نکاری بوو، وێ ھلوەشینن و روویێ وێ یێ راست کو خزمەتکارێ داگیرکەرانە دەرخینە ھۆلێ.
ژ بەر کو د دەما شەر و پەڤچوونان دا تو نکاری راستیێ بێژی، تە گۆت ژی ناهێتە دیتن و خواندن. لەورا ئەو راستیا د ناڤا گوڵەیێن ژ بۆنا تونەکرنا کوردان دھاتنە تەقاندن دا، زەحمەت بوو کو تو راستیێ ب نەزانان بدەیە زانین و قەبوولکرن.
نەزان دبێژم، ژ بەر کو ھندەک ئیستیسنا تیدا نەبن، پترین تەڤگەرێن دیکتاتۆر ژ کەسێن نەزان، بەرژەوەندیپارێز خێرنەخوازێن گەلێ خوە تێنە پەیدا کرن ئانکو ئامادە کرن…
ترکان رەوشا خورتبوونا تەڤگەرا کورد ل باکورێ کوردستانێ باش فێمکربوو لەوما وان ئەڤ زانەبوونا خوە، ژ بۆنا رێخستنا خوەیا ب ناڤێ پەکە(ک)ە باش ب کار ئانین. نەھشتن و مەجال نەدان ئەندامێن پەکە(ک)ێ دا کو بکارن بفکرن و راستیێ ببینن.
لێ چ دبیت بلا ببیت، داوی ئانینا دەولەت، پارتی و کەسێن خوەدی قاوەت و یێن دیکتاتۆر ژی ب دەستپێکا ژ ھەڤکەتنا د ناڤا خوە دا دەست پێ دکەت.
ئیرۆ ئەم پر ب رحەتی دکارین ئێدی ڤێ د ناڤا پەکە(ک)ێ دا ژی ببینن. لەوما ڤەقەتاندن و ئاشکەرە کرنا بوویەر و کریارێن پەکە(ک)ێ ئێدی تێنە قەبوولکرن و دیتن.
ژ بەر ڤێ ئەز دبێژم؛ ڤەقەتاندنا ئۆزگۆر ژیاندا ژ پەکە(ک)ێ دێ بیتە دەستپێکەک دا کو ئێدی ئەم ببینن دێ چاوا ئەڤ رێخستنا دیکتاتۆر ویا ل سەر دەستێ داگیرکەران، ژ بۆنا تونەکرنا کوردان ھاتبوو دامەزراندنێ، تێک چیت.
ئێدی داویا پەکە(ک)ێ دهێتە دیتن. ژ بەر کو ھلوەشاندنا ئاڤاھیەکێ ب کشاندنا کەڤرەکی ژ بنیاتێ وێ دا دەسپێ دکەت. ئێدی پەکە(ک) چ شەرێ بکەت نەمایە. یا دێ ئێریشی باشوورێ کوردستانێ کەت و پێشمێرگەیێن قەھرەمان شەهید کەت یان دێ ژ نوودا ل کوشتنا ناڤا خوە دا ڤەگەریت و دەستپێ کەت.
ژ بۆنا زارۆکێن مە یێن د ناڤا پەکە(ک)ێ دا نەیێن کوشتن، دڤێت مالباتێن زارۆکێن وان گەریلایان، دەست ب خوەپێشاندانان بکەن، سمینار و کۆنفەرانسان ل دار بخن دا کو بکاربن زارۆکێن خوە ژ ناڤا وی ئاشێ کوردان دھێریت، خلاس بکەن.
دڤێت ئەو گەریلایێن دروست کو ژ بۆنا ئازادیا ملەتێ خوە تەڤلی وێ رێخستنا کورد کوژ بووی، هەر دەما مەجال دیت ژێ برەڤن و بکەڤنە ناڤا ھێزێن پێشمێرگەیان. ھەگەر ڤێ نەکەن دێ گەلەک ژ وان هێنە کوشتن. تالیا تالی ژی دێ ئەوێن ل قاندلێ (ترکیا و ئیرانێ) روونشتینە ب ئۆپەراسیۆنەکێ دێ چنە ترکیا جەم خوەدان و خالانێن خوە.
دڤێت مەدیایا کوردی ب گشتی وەکو کامپانیەکێ دەست ب ئاشکەراکرنا کریار، بوویەر و خەرابوونێن پەکە(ک)ێ ژ بۆ خەلکی بکەن.
د ڤێ دەرحەقێ دا ئەرشیڤەکا مەزن د دەستێ پارتی و رێڤەبرێن باشوورێ کوردستانێ دا ھەیە دڤێت ئەو ژی ئێدی دەستپێ بکەن وانا ژ بۆ رایا گشتی ئاشکەرا بکەن دا کو گەریلا و خەلک ژی ئێدی راستیێ ب چاڤێن خوە ببینن و ب گوھێن خوە ببھیزن…
ل گۆری من ژ پەکە(ک)ێ جەودابوونا ئۆزگۆر ژیاندا دەستپێکا ھلوەشاندنا وێ ب خوەیە. ئەم دێ گوھدار بین و بشۆپینن…
