دژمن کییە، کاراسوو ؟

رێڤەبەرێ پەکەکێ مستەفا کاراسوو بەشداری بەرنامەیەکێ «مەدیا خابەر تیڤی» یا پەکەکێ بوو و ھندەک نرخاندن کرن، ب راستی، گەلەک جاران، مرۆڤ دفکریت گەلۆ پێویست دکەت کو بەرسڤا کاراسوو بهێتە دایین یان نا؟ لێ بەلێ، ژ بەر دوو سەدەمان ئەم مەجبوور دبین کو بەرسڤا وی بدەین.

پەکەکە ب بەردەوامی راستیێن دیرۆکا ھەیی، بەروڤاژی دکەت، مخابن، هەرچەند کو مرۆڤ بەرسڤا ڤان کەسان نەدەت ئەو، پێتر بێعار دبن، راستییان پێتر بەروڤاژی دکەن، کەسێن ژ ڤان درەوێن وان باوەر دکەن ژی ھەنە، ژ بەر ڤێ سەدەمێ، دڤێت وەلاتپارێز و رەوشەنبیرێن کورد بەرسڤا ھەر رێزکێ ژ ڤان درەوێن پەکەکێ بدەن.

پەکەکە وە دزانیت کو د کوردستانێ دا کەس دیرۆکزان نینە، ژ بلی وان کەسەک دیرۆکێ نزانیت، ھەموو زانست و زانیارییان د بن سەروەرییا خوە دا دبینن، لەوما ژی ھەر دەم راستییان بەروڤاژی دکەن، گاڤا کو بەرسڤ نەهێتە دایین، ئەو دبێژن ئەم کی دەرێ بخوازین ئەم دێ ھەسپێ خوە هاژۆینە وێ دەرێ.

میناک، مستەفا کاراسوو کەسەکە کو نەشیت راست و چەپێن خوە ژ ھەڤ جودا بکەت، ئەو ب تەنێ خوە نەشێت تاسەکێ ئاڤێ ڤەخوەت، لێ دەما کو ئەو دچیتە سەر ئەکرانا تیڤیێ، ئەو خوە وە ددەتە خوەیا کرن کویێ وی ناس نەکەت دێ بێژیت کاراسوویێ گێژ «ئەڤ چییایێن بچووک ئاڤا کرنە»! ژبەرکو ئەو حەتا ڤی رادەی پووزبلند و بێعار د ئاخڤیت.

کەربا کاراسوویا ل دژی پەدەکێ د راستیێ دا کەربا دژی خەتا کوردستانی یە.

مستەفا کاراسوو د ڤێ ئاخفتنا خوە یا داویێ دا، فۆکسا خوە خستیە سەر پەدەکێ، د راستیێ دا دژمناتیا خوە یا ل دژی خەتا ئازادیخواز، سەربخوە و نەتەوەیی یا کوردان د بن ناڤێ پەدەکێ دا ئاشکەرا کر، دژمناتیا پەکەکێ یا ل دژی حکوومەتا ھەرێما کوردستانێ د راستی دا دژمناھیا خەتا خوە برێڤەبرنا گەلێ کوردە.

حکوومەتا ھەرێما کوردستانێ، ژ بۆ کوردان ھێڤی و پێشەنگا ژییانا ئازاد و سەربخوەیە، سەرەرای ھندەک کێماسی و زەحمەتییێن کو هەیی، حکوومەتا ھەرێما کوردستانێ، کو ناسنامەیا کوردی ڤەژاند، ل گۆری یاسایێن ناڤنەتەوەیی د 2005ێ دا ب فەرمی ھاتە قەبوول کرن.

پەکەکە خورتکرنا ڤێ خەتا نەتەوەیی ژ بۆ خوە سەدەما بچووک بوونێ دبینیت، ژ بەر ڤێ سەدەمێ ژی، ئەو ژی وەکو ھەمی داگیرکەران، ھەبوونا حکوومەتا ھەرێما کوردستانێ وەکی گەف ژ بۆ خوە دبینیت و د باسکێ داگیرکەران دا ڤیهـ دگریت.

کاراسوو و رێڤەبەرێن پەکەکێ یێن دی ژ بۆ ڤێ دژمناھیا خوە ھەر سال پەردەیەکێ نوو چێدکەن، میناک دووبارە دبێژن «پەشمەرگە ئەڤە دوو سالن د گەل دەولەتا ترک مە دۆرپێچ دکەن» و ڤێ درەوێ وەکی سەدەما ئالۆزیێ بەرچاڤ دکەت، لێبەلێ، ئەڤە 16 سالە کو ستاتۆیا حکوومەتا ھەرێما کوردستانێ د ناڤا سیستەما ئیراقێ داە ب فەرمی ھاتییە ناسکرن، پەکەکە ئەڤە 16 سالن ئاساییشا حکووماتا ھەرێما کوردستانێ وەکو ئاساییشا پەدەکێ ب ناڤ دکەت، پەکەکە ب تایبەت سەرۆکێ وێ مستەفا کاراسوو، د بن ھەر شەرت و مەرجەکێ دا دژمناتیا ئالا کوردستانێ دکەت، مستەفا کاراسوو ژ ئالا ترکان یا ل خواکوورکێ، لێلکان، خانتوور و ھتد… ھاتینە راکرن عاجز نابیت، لێ ئەو ل قەندیلێ، بەھدینان و دەڤەرێن دی بلندکرنا ئالایێ کوردستانێ وەکی ئێرشەکا ل دژی خەتا پەکەکێ دبینیت و ھار دبیت.

بلند کرنا ئالایێ ترکان وەکو دەمۆکراتک بوونا ترکیا و براتییا گەلان دبینت، لێ بۆچی کاراسوو ب دیتنا ئالایێ کوردستانێ دینوهار دبیت؟ بۆچی ھوون ژ ئالایێ ترکیێ عاجز نابن، لێ ئالایێ کوردستانێ هندە هەوە عاجز دکەت؟

گەلۆ کاراسوو دشێت ب تلیێن دەستا بژمێریت کا ل کوردستانێ چەند دەولەتێن داگیرکەر ھەنە؟

بێلۆمە لێ، کاراسوو نەشیابوو کەلەجانا خوە کێم بکەت و ھەول دا کو کوردایەتییێ فێری پەدەکێ بکەت، کاراسوو پیچەکا دی پێشڤە چوو و گۆت کو «ژ بۆ کو ل چەند باژاران سەروەر بن چێنابیت ھەموو کوردستان بهێتە قوربان کرن«.

گەر کاراسوو بخوازیت ل سەر سیاسەتا کوردستانێ نێرینەکێ بدەت، پێوسیتە ئەو ب تلیێن خوە بژمێریت کا ل کوردستانێ چەند داگیرکەر ھەنە، میناک، ئەو دێ ببێژیت: یەک ئیران، دوو ترکیا، سێ ئیراق، چار سووریا و پشترا ئەو ب داخویانییەکێ دێ بێژیت: «کا ئەز چەند ژ ڤان دەولەتان وەکو داگیرکەر دبینم»، پەکەکە و کاراسوو د ھلبژارتنا دژمنان دا وەکو کوردان هزر ناکەن.

یەکەم: ژ بۆ مستەفا کاراسوو، ئیران نە دەولەتەکا داگیرکەرە، کاراسوو دبێژیت کو کوردستان ژ بۆ چەند باژاران ناهێتە قوربانی کرن، لێ بەلێ ئەو و پارتیا وی ژ بۆ بەرژەوەندییێن خوە، ئانکو ژ بۆ ئەولەکرنا دو-سێ رێڤەبەرێن خوە، ھاتن و چوونا ئەورۆپا و ھتد… ژ سالا 1980یێ ڤە، ئیرادەیا گەلێ رۆژھلاتێ کوردستانێ ژ بۆ بەرژەوەندییێن حیزبا خوە ژناڤبریە و ناھێلیت ئەو گاڤەکێ ژی باڤێژن.

دەولەتا ئیرانێ د سەردەما خوە یا ھەری دژوار دا دژیت، د وارێ ئابۆری دا زەحمەتیێن مەزن ھەنە، دەولەتا ئیرانێ ژ ناڤخوە ڤە د گەل تەقینەکا مەزن روو ب روویە، لێ پەکەکە، ل گۆری پەیمانا د گەل ئیرانێ دا هەیی، ناھێلیت گەلێ رۆژھلاتێ کوردستانێ خوە بلڤینیت.

ئەو ژبلی خوە ناھێلیت کو حیزبەکا ب تەنێ یا رۆژھلاتێ کوردستانێ نێزیکێ سنۆران ببیت، ئەو د وەشانێن خوە دا یەک گۆتن ل دژی دەولەتا ئیرانێ ناکەن، پەژاک و باسکێ وێ یێ لەشکەری یەرەکە، د دەربارێ ئیرانێ دا داخویانیێن وەھا ددەن کو مرۆڤ هزر دکەت کو ئەو پارتیەکا فەرمی یا ئیرانێ نە، و ل ئیرانێ تەنێ پرسگرێکێن دەمۆکراتیکبوونێ یێن پچووک ھەنە، پەکەکە نە ژ بۆ سێ ئان پێنج باژاران، لێ ژ بۆ ژیانا یەک-دوو رێڤەبەرێن خوە، وەکی جەمیل بایک و تیما وی، مستەفا کاراسوو، ل سەرانسەرێ رۆژھلاتێ کوردستانێ بوونە پاساوانێن ئیرانێ و سنۆرێ وان دپارێزیت.

هیچ  کەسەک گەریلا دۆرپێچ ناکەت، یا راست حکوومەتا ھەرێما کوردستانێ ھاتییە دۆرپێچکرن

یەک ژ تلیێن د دەستێ کاراسوو دا مای ژی ئیراقە، ئەو ھەمان تشتی راستەراست د گەل دەولەتا ئیراقێ و حەشدا شەعبی دا دکەت، پەکەکە ل گەل ئیراقێ و حەشدا شەعبی ھەرێما کوردستانێ دۆرپێچ دکەت، دڤێت کەسێن بەرپرسیار دەرکەڤن و ببێژنە ڤی گەلی کو یێن دۆرپێچکری نە گەریلانە، یێن ھاتیە دۆرپێچ کرن ھەولێر و پێشمەرگە و ھەرێما کوردستانێ نە.

پەکەکێ ل شنگالێ خیانەت ل حکوومەتا ھەرێما کوردستانێ کر و ژ بۆ مووچەیەکێ بوو ھەڤکارا حەشدا شەعبی، پەکەکە تەنێ ژ بۆ بەرژەوەندیێ خوە یێن پارتیێ خەباتێ دکەت کو شنگالێ ب ئیراقێ ڤە گرێ بدەت، هیچ خیانەتەک ژ ڤێ مەزنتر نینە.

ب سالان، پەکەکێ ھێزێن پێشمەرگە ل بەر دەریێ کەمپا مەخموورێ قەبوول نەکرن، لێ ئەو چوون پۆلیسێن ئیراقێ ئانین و ل بەر دەرییێ کامپا مەخموور قەرەقۆلەک ژ بۆی وان ئاڤا کر، کاراسوو دبێژیت: «گەر پێشمەرگە بهێتە چەمجی، دێ شەر چێبیت»، بۆچی کاراسوو، ما د ژیانا خوە دا تە چ چیایەکێ کوردستانێ دەرباس نەکریە، ما نە شوونا کو تو ببێژی ئەم دێ ل چەمجی شەرێ پێشمەرگە کەین دڤیا تە گۆتبا گەر حەشدا شەعبی بهێتە شنگالێ ئەم دێ قییامەتێ راکەین؟ کوردستانی بوون ئەڤەیە؟، کوردستانی بوون ئەڤەیە کو مرۆڤ بکاریت ببێژیتە داگیرکەری تو داگیرکەری، حیزبا وە ب فەرمی و ئاشکەرا جل و بەرگێن حەشدا شەعبی یا دژمنێ کوردستانێ دکەتە بر گەنجێن کورد و ئیراقێ وەکی دۆست و ئیرانێ ژی وەکی ھەڤال دبینیت.

پەکەکە ژ سالا 2013ێ ڤە دەستێن خوە دپەرەخینیت و ل بەندێ یە، کو گەر ھەرێما کوردستانێ بکەڤیت دێ پارچەیەک گەهیتە وان ژی، لێ ھوون دێ ب وێ خەیالی مرن.

تلیا سێیەمینا کاراسوو، سووریا یە: پەکەکە ب راستی ژی نابێژیتە سووریێ کۆلۆنیالیست، ژ بەر کو پەکەکە د بن سەیوانا حافز ئەل ئەسەد دا مەزن بوویە، ھەمان دەم ژ بەر دۆستانییا ئیرانێ ژی، بەشار ئەسەد وەکو ھەڤرێ دبینیت، تشتێ عەجیب ئەوە کو جەمیل بایک یەکەم کەس بوو کو دگۆت پێویستە یەپەگە پەترۆلێ نەفرۆشیت و دژی دەرکەفت، ئانکو پەکەکە دۆستا سووریێ یە ژی و نە دژمنا وێ یە.

ل ترکیا پەکەکە دژمناتیا کێ دکەت؟

ئەو چار داگیرکەرێن کاراسوو ب تلیێن خوە ھژمارتی سێ ژ وان، ئانکو ئیراق، ئیران و سووریا، مل ب ملێ پەکەکێ نە، ئەو نە داگیرکەرن، لێ گەلۆ ژ بۆ کاراسوو کی داگیرکەرە؟ ل گۆری کاراسوو ترکیا ژی نە داگیرکەرە، کاراسوو د ئاخافتنا خوە دا دبێژیت: «نھا گەلێ کورد و گەلێن ترکیا د تەکۆشینا ترکیا یا دەمۆکراسییێ دا بوونە یەک»، لێ ئەم دپرسین هەگەر ئەوا کاراسوو دبەژیت راست بیت، وی دەمی پرسگرێکا کوردان ل ترکیا تەنێ ھلبژارتن و تێکۆشینا دەمۆکراسی یە، وی دەمی ھوون بۆچی بەحسا شەرێ چەکداری و فیدایی دکەن؟ گەلۆ دەولەت و گەلێ ترک کیژان راستیا کۆمکۆژیا کوردان قەبوول کرییە کو ھوون بەرێ گەلێ کورد ددەنە ترکان کو وان ناڤا ترک بوونێ دا بھێلن؟.

ب راستی کاراسوو، د تەڤایا ئاخافتنا خوە دا، ژ بۆ جەهەپێ پەیاما دشینیت و دبێژیت کو ب ھەڤ را ئەم دکارین ڤێ حکوومەتێ ھلوەشینن، دییار دبیت کو د نێرینا کاراسوو دا دەولەتا ترکیا ژی نە داگیرکەرە تەنێ کێشەیێن حیزبا دەستھلادارە، ئانکو کێشە نە دیرۆکی و نەتەویی یە کێشە ھلبژارتن و ئیدارا دەمکی یە.

د دەستێ کاراسوو دا چ تلی نەمان، ئانکو، ئیراق دۆستێ پەکەکێ یە، ئیران دۆستێ پەکەکێ یە، سووریا دۆستێ پەکەکێ یە، باشە کاراسوو کی دژمنێ مەیە؟

ئەساسەن کەس دژمنێ پەکەکێ نینە، پەکەکە د گەل تەڤاھیا داگیرکەران د ناڤ پەیوەندیاین دایە، ئەڤ پەیوەندی ژی نە ل سەر ئەساسێ چارەسەرییا پرسگیرەکا کوردە، ھەگەر ووسا بیت ئەم دێ چەپکا لەدین، لێ بەلێ ئەڤ پەیوەندی ل سەر بەرژەوەندییا حیزبی و ل سەر ژییانا رێڤەبەرێن پەکەکێ یە.

د بنەرەت دا کەس دژمنێ پەکەکێ نینە، پەکەکە تەنێ ژ بەر زندی گرتنا کادرێن خوە هەر دەم دوژمنێن خەیالی و هێڤییێن خەیالی چێدکەت. پەکەکە دبێژیت ناتۆ، ئەمەریکا؛ ئیسرایل، یەکیتییا ئەورۆپایێ، هێزێن ھەرێمی ھەرکەس ئێریشی مە دکەت و دخوازن مە ژناڤ ببەن. نها ھەگەر ئەڤە هێزە نەبان پەکەکە نەدکاری یەک رۆژا ب تەنێ ژی خوە ل سەر لنگێن خوە بگریت. ھەگەر ئەمەریکا نەبیت پەکەکە ل رۆژئاڤا نەشێت بمینیت، ھەگەر ئیسرایل وەک حەماس چەکی دژی پەکەکێ ب کار بیینیت پەکەکە دا د سێ رۆژان دا ژناڤ چیت. یەکیتیا ئەورۆپا یەک رۆژ کارێ پەکەکێ ئاستەنگ نە کرییە. لی ناڤەندا یەکیتیا ئەورۆپا، بەلچیکا نوونەراتیێن پەکەکێ ھەنە ب ناڤێن دی. زاتەن پەکەکە ئیران، ترکیا، ئیراق و سوریایێ ب دژمنێ خوە نابینیت، تەنێ دخوازیت ڤان ولاتا دەمۆکراتیک بکەت، باشە ئەڤ چەکە، ئەڤ کوشتنە ئەڤ توفانە ژ بۆی چیە؟ راستی ئەم ژ کاراسو دپرسین دژمنێ هەوە کییە.

پوستێن ھەمان بەش