رۆژھلاتا ناڤین ئیرۆ د ناڤ ئاگرەکی دژوار دە دەرباس دبە و ئۆپەراسیۆنا کو ئیسرایل و ئامەریکایێ ل دژی ئیرانێ دایە دەستپێکرن، مەھەک ل پەی خوە ھشت. د ڤی شەرێ کو ھینا داویا وێ نە دیارە دە، ھەر دو ئالی ژی پلانێن نوو پێش دخن دا کو ئەنیێن خوە بەرفرەھ بکن، لێ د ناڤەندا پلانا ئیرانێ دە ئیراق و کورد ھەنە.
دەما ئەم ل دیرۆکا نێزیک دنێرن، ئەم دبینن کو ئیرانێ د دەما بھارا عەرەبی دە ب زانەبوون داعش بەردا سەر کوردان دا کو رێ ل بەر سەرکەفتنێن وان بگرە. ھن دەردۆر دبێژن قەی ئیران ل دژی داعشێ بوو، لێ راستی بەرەڤاژی ڤێیە؛ داعش ل ئیراقێ خوەدی تێکلیێن راستەراست و نەراستەراست لگەل ئیرانێ بوو و ژ شیعەیان پتر، ب ھۆڤیتی ئێریشی کوردستانێ کر.
ئیرۆ ژی ھەمان سەناریۆ ب ناڤەکی دن ل دارە. ئیران دخوازە ب ئێریشکرنا حەشدا شەعبی ل سەر کوردان، وان ب شەر و ئالۆزیان مژوول بکە و د ھەمان دەمێ دە سیستەما فەدەرالا ئیراقێ ب تەمامی ھلوەشینە. حەشدا شەعبی ئێدی نە تەنێ ھێزەکە وەکیلە، ئەو ب تەمامی ڤەگوھەریە بەشەک ژ ئارتێشا پاسدارێن ئیرانێ و ئیرۆ دەولەتا ئیراقێ نە ژ بەغدایێ، لێ ژ ئالیێ ڤان ملیسان ڤە تێ برێڤەبرن.
ژ بۆ پێکانینا ڤێ پلانا وێرانکەر، ئیران ئێریشێن ئیستیفزازی ل دژی ھەرێما کوردستانێ دژوارتر دکە. ئارمانجکرنا بارەگەھا لێڤەگەرێ نەتەوەیا کورد و سازوومانکارێ ئاشتیێ سەرۆک بارزانی ژ ئالیێ حەشدا شەعبی ڤە، و ھەر وھا ئارمانجکرنا مالا سەرۆکێ ھەرێما کوردستانێ نێچیرڤان بارزانی، پارچەیەک ژ ڤێ پرۆڤۆکاسیۆنا مەزنە.
چاوا کو دوھ داعشێ زێدەتری ھەر کەسی ئێریشی کوردان کر، ئیرۆ ژی حەشدا شەعبی ب ھنجەتا ھەبوونا ئامەریکایێ، ژ بەغدایێ زێدەتر ھەولێرێ بۆمبەباران دکە. ئارمانج پر ئەشکەرەیە: بێھێزکرنا ستوونا تێکۆشینا نەتەوەیییا کورد، ئانگۆ رێبازا بارزانی. ئەو دخوازن ھەولێرا کو ئیرۆ ھەرێما ھەری ئەولە و گەشا رۆژھلاتا ناڤینە، ڤەگوھەرینن قادا شەرێن مەزھەبی و کۆلۆنیال.
د ڤێ قۆناغا مەترسیدار دە، کورد تەنێ ب ھەڤگرتنەکە نەتەوەیی دکارن پێشیا ڤان مەترسیان بگرن. لێ بەلێ، د ڤێ مژارێ دە د ناڤ تەڤگەرێن سەرەکەیێن کورد دە لاوازیەک و بێدەنگیەک خەمگین ھەیە. تەڤگەرا بارزانی د بن ڤان ئێریشێن گران دە ب تەنێ ھاتیە ھشتن.
یەنەکە ژ ترسا بەرتەکا گەلێ کورد ئێدی ھەڤکاریا خوەیا ب حەشدا شەعبی رە ب ئەشکەرە نیشان نادە، لێ بەلێ ئەو ھین ژی ل بەندا لاوازبوونا پەدەکێ نە دا کو ب پشتگریا ملیسان خوە بکن ھێزا سەرەکە و کورسیێن بەغدایێ مسۆگەر بکن. ھەیا نھا ژی ڤان ھێزان ب وێرەکی نەگۆتیە کو حەشدا شەعبی ئێریشی ئاخا کوردستانێ دکە.
ل ئالیێ دن، پەکەکە د دەما کو کورد د سەردەمەکە وسا ھەستیار رە دەرباس دبن، ب رۆژەڤێن دەرەوێن مینا ئازادیا ئۆجالان و پیرۆزباھیێن رۆژبوونا وی، ھشێ گەلێ مە مژوول دکە. د بن ناڤێ “بانگا یەکیتیێ” دە لیستکێن سیاسی دمەشینن، لێ د ھەمان دەمێ دە ب پشتگریا حەشدا شەعبی ل شەنگالێ کۆنفەرانسان ل دار دخن. ئەنجاما کۆنفەرانسێن وان نە ئازادی، لێ ئەنتەگرەبوونا ب وێ ئیراقا کو ژ ئالیێ حەشدا شەعبی ڤە تێ برێڤەبرنە.
دڤێت کورد، ب رەوشەنبیر و سیاسەتمەدارێن خوە ڤە، ڤان ھەڤالبەندێن داگیرکەران د ناڤ خوە دە ناس بکن و وان تەشھیر بکن. دڤێت ئەم باش بزانبن کو تەڤگەرا بارزانی، د شەخسێ ھەولێر و حکوومەتا ھەرێما کوردستانێ دە، کەڤرێ بنگەھینێ ھەبوون و ئازادیا مەیە.
د ڤێ سەردەمێ دە، یەکیتیا راستین ئەوە کو ئەم ل دۆرا ھەولێرێ بجڤن و ھەر ئێریشەکا ل سەر بارزانی و پایتەختا مە، وەکی ئێریشەکە ل سەر روومەت و پاشەرۆژا ھەموو کوردان ببینن.
