ژ قەندیلێ ترکیا ناهێتە گوهرین…

ژ قەندیلێ ترکیا ناهێتە گوهرین…

ئاکادەمیسیەن در. کەیوان ئازاد دەربارێ ھەبوونا پەکەکێ ل ھەرێما کوردستانێ و فشارا وێ ژ بۆ ھێز و سازیێن حکوومەتا ھەرێما کوردستانێ ئاخڤی و راگھاند نە پەکەکە نە ژی ھێزەکا دی یا کوردی نابیت ل سەر خاکا ھەرێما کوردستانێ ئێریشی وەلاتەکێ جیران بکەت.

دیرۆکناس و شارەزایێ سیاسەتێ در. کەیوان ئازاد دەربارێ ئێریشێن پەکەکێ بۆ سەر دەزگەھێن ھەرێما کوردستانێ و بنپێکرنا سەروەریا یاسایێن ھەرێما کوردستانێ ژ بۆ باس نیوزێ ئاخڤی و گۆت:

پەکەکە ژ قەندیلێ نەشێت ترکیا بگوهریت. پشتی راپەرینێ و دورستبوونا پارلەمەنتۆیا ھەرێما کوردستانێ ھێزێن چەکدارێن رۆژھلاتێ کوردستانێ، باکورێ کوردستانێ دڤێت رێزێ ل سەروەریا ھەرێما کوردستانێ بگرن کو وەکو ھەرێمەکا فەدەرال ژ ئالیێ جیھانی ڤە دهێتە ناسین. ھەموو وەلاتێن جیران کۆنسۆلخانە ل ھەولێرێ ڤەکرنە. دڤێت ئەو ھێزێن چەکدارێ پارچەیێن دی ێن کوردستانێ بزانبن کو ژ ئالیێ سیاسی و یاسایی نابیت ئەو ل سەر ھەرێما کوردستانێ ئێریشی وەلاتێن جیران بکەن.

ھەگەر ھەبوونا پەکەکێ ژ بۆ خەلک و خاکا ھەرێما کوردستانێ ببیتە کێشە و پەکەکە خوە وەکو ھێزەکا کوردی بزانیت دڤێت ژ قەندیلێ دەربکەڤیت، پەکەکە دڤێت بزانیت ترکیا وەلاتەکی مەزنە و ئەندامێ ناتۆیێ یێ سەربازییە. دەولەتا ترکیێ ب چەکێن پەکەکێ ژناڤ ناچیت و ھەرێما کوردستانێ ژی نەشێت بەرگریا شەرێ ترکیا بەرامبەر پەکەکێ دا بکەت.  پەکەکە دخوازیت ژ قەندیلێ ترکیا بگوھریت ئەو تشتەکێ عاقلانە نینە و وەلاتەکێ وەکو ترکیا مەزن ب ھێزەکا ژ دووری وێ چەک بەرامبەری وێ گرتیە ناهێتە گوهرین.

ھەروھا در. کەیوان ئازاد ئاماژە ب وێ یەکێ دکەت کو نابیت ھەبوونا پەکەکێ ببیتە بەھانە ژ بۆ کو ترکیا بهێتە خاکا ھەرێما کوردستانێ داگیر بکەت و دڤێت پەکەکە ژ وان ھەرێمێن سنۆری یێن ھەرێما کوردستانێ داگیر کری دەرکەڤیت و ب رێکەفتنێ رادەستی پێشمەرگەیان بکەت. نە کو رێ ژ بوو ترکیا خوەش بکەت و ترکیا بهێت ل وان ھەرێمێن سنۆری یێن ھەرێما کوردستانێ ب جیهـ ببیت.

د بەردەوامیێ ژی دا در. کەیوان ئازاد بانگ ل ھندەک ئالیێن سیاسی یێن کوردی ل ھەرێما کوردستانێ ژی کر و گۆت: ” ئەو ئالیێن بانگەشەیێ ژ بۆ پەکەکێ دکەن و ووسا دزانن پەکەکە پاراستنا ھەرێما کوردستانێ دکەت گەلۆ ئەو حەتا نھا ل کو بوون؟ ئەو چاوا پەیدا بوون؟ ما نە پێشمەرگە بوو یێ پاراستنا ھەرێما کوردستانێ کری و ھەرێما کوردستانێ ژ بن داگیرکەریێ رزگار کری. دڤێت ئالیێن سیاسی یێن باشوورێ کوردستانێ بزانن نابیت ئەو پاراستنا پەکەکێ بکەن، بەلکو پێدڤیە پەکەکە ژ بۆ پاراستنا باشوورێ کوردستانێ ژ ھەرێما کوردستانێ دەربکەڤیت و خەباتا خوە ببەتە باکورێ کوردستانێ.