ئەندامێ سەرکردایەتییا یەنەکێ دبێژیت: «چەکدارێن پەکەکێ مژوولی کارێن قاچاغن و ئەو یێن بووینە سەدەمێ ئێش و ژانان، ھەروھا دبێژیت پەکەکە پاسدارێن ئیرانێ دکوژیت و بەھانەیان بۆ وان چێدکەت، کو ئیران ژی وان ناڤچەیێن سنۆری یێن ھەرێما کوردستانێ تۆپباران بکەت». لێ بەلێ هەر ئەڤ مەحموود سەنگاوییە ژ بۆی ڤێ پەکەکێ کو بەھانەیان بۆ ترکیێ چێدکەت داكو بەھدینان بکەتە قادا شەری، حەتا نھا ھیچ تشتەک نەگۆتییە و بێ هەلویست بوویە.
ئەندامێ سەرکردایەتییا یەنەکێ مەحموود سەنگاوی د ھەڤپەیڤینەکێ دا ل گەل کەنالێ NRT دا راگەھاند، چەکدارێن پەکەکێ ل سەر سنۆرێ د ناڤبەرا هەرێما کوردستانێ و ئیرانێ دا بووینە سەدەمێ ئێش و ژانان و قاچاغچیتیێ دکەن و ل زالگەھان ژی ناراوەستن.
ھەروھا گۆت: «ل گەل وێ ژی چەکدارێن پەکەکێ ھندەک جاران ئێریشی ھێزێن پاسدارێن ئیرانێ دکەن و بەھانەیان ددەنە دەست ئیرانێ ژ بۆ کو گەفا تۆپبارانکرنا ناڤچەیێن سنۆری ل ھەرێما کوردستانێ بکەت».
سەنگاوی ئاماژە ب وێ یەکێ ژی کر کو ئەو ناخوازن ل گەل پەکەکێ شەرێ براکوژیێ ئەنجام بدەن و گۆت: «مە گۆتییە پەکەکێ کو بچن ل جھەکێ دی خەباتێ بکەن و داخوازا مافێن خوە بکه‌ن».
مەحموود سەنگاوی کو ب کەسەکێ تومەتبار ب قاچاغچیتییا ل سەر سنۆرێ ئیرانێ دهێتە ناسکرن، ل ڤان دەمێن داویێ هەردەم داخویانییان ددەت و پشتگرییا پەکەکێ دکەت، تایبەت ژی ڤان دەمێن داویێ راگه‌ھاندنا پەکەکێ گەلەک جاران ئەو ل سەر مەدیایێن خوە نیشان ددا، لێ بەلێ دەما کو پەکەکە کریارێن بچووک ل جھێ کو بەرژەوەندیێن یەنەکێ هه‌نه، نەرازیبوونێ نیشان ددەت، واتە مەحموود سەنگاوی، پەکەکێ کو مەتینا، حەفتەنین، زاپ و ئاڤاشین کرییە مەیدانا شەری، ژ بەر ڤی شەری ژی ھەر رۆژ گوند ڤالا دبن نابینیت و ل جەم وی ئەڤ چەندە نە تشتەکە، لێ بەلێ تۆپەک ل سنۆرێ جھێ وان بکەڤیت تشتەکێ مەزنه.
د بنەرەت دا ئاخافتنا سەنگاوی ڤێ راستیێ نیشان ددەت کو ئارمانجا بالەکێ یەنەکێ چیە، یەکەم جار لاھۆر جەنگی و ھندەک کەسێن دی دخوازن پەکەکێ وەکو ئاموورەکێ گڤاشتن و گەفێ ل سەر حکوومەتا ھەرێما کوردستانێ بکار بینن، دەما پەکەکە ل گۆر بەرژەوەندییا وان کار بکەت ھەگەر ھەر رۆژ 5 پێشمەرگەیان ژی شەھید بکەت ژ بۆی وان نەخەمە، لێ بەلێ ھەگەر ل دژی ئیرانێ تشتەکێ ئەنجام بدەت، ئێکەتی پەکەکێ خائین ب ناڤ دکەت.
