رێخستنا په‌كه‌كێ بریار گرتییه كو شه‌ره‌كێ دژوار ل دژی یه‌كێتییا نشتیمانییا كوردستانێ بده مه‌شاندن، ئه‌ڤ یێك د جڤینا داوین یا رێڤه‌به‌رییا په‌كه‌كێ دا هاتییه نیقاش كرن، نه‌خشه‌یا شه‌ر و ته‌علیمات هاتنه ده‌ست نیشان كرن و بریار هاتییه گرتن.
چاڤكانیێن پێگه‌ها داركا مازی ل باشوورێ كوردستانێ ئه‌شكه‌ره كر، ل رۆژ 27/6/2021ێ، رێڤه‌به‌رێن په‌كه‌كێ جه‌میل باییك، دوران كالكان و مسته‌فا كاراسوو ل قه‌ندیلێ جڤیانه، د وێ جڤینێ دا، نرخاندن ژ بۆ رۆژه‌ڤێ پیلانێن رێخستنێ یێن ناڤا باشوورێ كوردستانێ هات كرن، په‌یوه‌ندیێن په‌كه‌كێ و یه‌نه‌كێ ته‌وه‌را سه‌ره‌كی یا جڤینێ بوو.
ل گۆری ئاگاهیێن كو ژ چاڤكانیێن تا‌یبه‌ت یێن پێگه‌ها مه هاتنه، ب فه‌رمانا راسته راست یا رێڤه‌به‌رێن په‌كه‌كێ، یه‌نه‌كه بوویه یێك ژ هه‌ده‌فێن رێخستنێ، ژ به‌ر كو یه‌نه‌كه ب ته‌ڤاهی نه‌كه‌تییه ژێر باندۆرا رێخستنێ و ته‌علیماتێن په‌كه‌كێ جی ب جی ناكه‌ت.
په‌كه‌كێ كو بریارا شه‌ری ل دژی یه‌نه‌كێ داییه، د قووناغا یه‌كه‌م دا، مه‌دیایا خوه ل دژی رێڤه‌به‌رێن یه‌نه‌كێ، هه‌ر یێك ژ «لاهور شێخ جه‌نگی، باڤێل تاله‌بانی، قوباد تاله‌بانی و به‌رهه‌م سالح» سێرڤس كرییه، د پێگه‌ها ته‌ڤدا پرێسێ دا ئه‌ڤ یێك ب كریار ده‌ست پێ كرییه.
هێژای گۆتنێ یه، ته‌ڤدا پرێس پلاتفۆرمه‌كا مه‌دیایی یا گرێدای په‌كه‌كێ یه، كه‌سێ كو ل ور قڕێژا په‌كه‌كێ د وه‌شینیت ب مه‌كی ئامێدی تێ ناس كرن كو هه‌ر چ گۆتنه‌كا نه‌شرین و قرێژ هه‌یه دبێژیت، ئه‌و ب ئاوایه‌كی پڕ بێ ئه‌خلاقی په‌یاما رێڤه‌به‌رێن خوه یێن قه‌ندیلێ دبێژیت.
رێخستنا په‌كه‌كێ هه‌روه‌ها د جڤینا خوه دا، نرخاندن ژ بۆی په‌یوه‌ندیێن ل گه‌ل یه‌نه‌كێ كرییه و بڕیار گرتییه كو پێداچوونێ د وان په‌یوه‌ندییان دا بكه‌ت، ب كورتاسی بڕیار گرتییه گوهێ رێڤه‌به‌رێ یه‌نه‌كێ لاهۆر جه‌نگی و باسكێ لاهۆر یێ د ناڤا یه‌نه‌كێ دا بكێشیت.
هێژای گۆتنێ یه، ئه‌ڤ نه‌جارا یه‌كه‌مینه كو په‌كه‌كه شه‌ری ل دژی لاهۆر جه‌نگی و یه‌نه‌كێ رادگه‌هینیت، ل دیسامبه‌را سالا رابووری 2020ێ و پاش كو لاهۆر ته‌ڤلی هه‌ولێن بێده‌نگكرنا خوه‌پێشاندنێن په‌كه‌كێ بووی یێن كو ژ بۆ تێكدانا باشوورێ كوردستانێ ده‌ست پێ كربوون، په‌كه‌كێ گه‌ف لێ خوار و د ته‌ڤدا پرێسێ دا ب ئاوایه‌كی هه‌ری قرێژ ئێریشا لاهۆر كر.
په‌كه‌كه هه‌ر ده‌ما لاهۆر ژ خه‌تا وێ ده‌ربكه‌ڤیت ده‌ست ب گوهـ كێشانا وی دكه‌ت، ئەڤ یەک ژی ددەته دیار کرن کو پەکەکە ژ بۆ کەسێ نابیته مال، هەر کەس چەند خزمەتێ ژ بۆی پەکەکێ بکەت، لێ هەر دەما کو پێنگاڤەک بچووک ژی ل دژی وێ هاڤێت دێ كه‌ڤیته بەر ئێریشێن پەکەکێ، ئەڤجا چ ئێریشا ب چەكان بیت یان ژی ئێریشا ب سەرێن قەلەمێن تووژکری، وه‌سا دیار دبیت کو نە لاهۆر جەنگی پەکەکە ب تەمامی ناسکرییە، نە ژی پەکەکێ لاهۆر ب تەمامی ناسکرییە.
