پێغەمبەرەکێ ساختە ل دۆلا بیقاع
سالا 1992ێ، دەما پارلەمانێ کوردستانێ هاتیە ئاڤاکرن، بوو هێڤیەک ژ بۆی کوردێن هەموو جیهانێ. پشتی سەدان سالان ستاتۆیەک ژ بۆ کوردان ل ناڤچەیێ دروست بوو، ئەڤ ستاتۆیە بەرهەما خوین و تەکۆشنا هەزاران رێبەر و پێشمەرگە و شەرڤانێن کورد بوو کو ب درێژاهیا دیرۆکێ ب مێرخاسی ل سەر ئاخا کوردستانێ بەرخوەدان کربوو.
ئەو دەما کو ئاپۆ و هەڤالرێیێن خوە ل دۆلا بیقاع ل بن سیبەرا ئیستخباراتا سووریێ دا فەرمانا مرنا کوردان دەرکری، بەرا هەموو دەولەتێن داگیرکەر ل ناڤچەیێ دا، وەکو یەکمین هێز ل دژی ڤێ ستاتۆیێ دەرکەت و بریارا شەرکرنا ل دژی باشوورێ کوردستانێ دا. ئەڤ بریارە ژی یا نوو نەبوو. ژ بەر کو پەکەکێ ژ دەما دامەزراندنا خوە، بریارا کۆمکوژکرنا کوردان کربوو مانیفەستۆیا سەرەکەی یا خوە. گەر ل دیرۆکا پەکەکێ بنێرین، ژ بلی خوین و کوشتن و تەسفیەکرنێ، چ تشتەک دی نینە. دیرۆکا پەکەکێ، دیرۆکەک ب خوین و قرێژە.
ئۆجالان ل کودەرێ هاتە پەروەردەکرن؟
سالا 1978ێ دەما کو پەکەکێ ل گوندێ فیسێ وەکو پارتیەکا سیاسی خوە راگەهاندی. ئۆجەلان ب تەنێ ئەندامەکێ رێڤەبەر یێ ناڤا گرووپێ دا بوو. مەزلووم دوغان و مەهمەت خەیری دوورمۆش و هندەک کەسێن دی پەکەکە برێڤە دبر. گرووپا ئەنقەرەیێ کو خوینرێژترین گرووپا کوردان بوون و هندەک کەس بوون کو ل بن باندۆرا فکرێن چەپ دا بوون، هەر زوو بوونە شێرپەنجەیا جانێ کوردان و هەر کارەکێ کوشتن و تەرۆریستی د ناڤا پەکەکێ دا هەبایە ، ڤان ئەنجام ددا. ئۆجالان کو د وی دەمی دا د گەل کەچا بەرپرسەکێ میتێ «عەلییەلدرم» ژیانا هەڤژینیێ پێک ئانیبوو، د ناڤا گرووپی دا پێش دکەڤیت و هاریکاریێن مادی و مەعنەوی ژ بۆ گرووپێ پەیدا دکەت. ئۆجالان ب شەڤ و رۆژ ل مالا «کەسیرە یلدرم» دمینیت و ل بن باندۆرا تەئۆریێن بابێ وێ دا، ئۆجالان دهێتە پەروەردەکرن. پشترا دەما کو کەسیرە ژ پەکەکێ جودا دبیت و رێخستنێ بجیهـ دهێلیت، ئاپۆ د داخویانیەکێ دا دبێژیت: “میتا ترکیێ کەسیرە شاندبوو ناڤا مە دا و وێ خیانەت ل پەکەکێ کریە”.
کەسیرە یلدرم ژی د داخویانیەکێ دا بەرسڤا ئۆجالان ددەت و دبێژیت: “راستە ئەو بابێ من بوو لێ چ جاران من حەش وی نەکریە. لێ ئەڤە تو بووی کو شەڤ و رۆژان ل گەل بابێ من دا روودنیشتی و تەعلیمات ژێ وەردگرتن”. واتە ئاپۆ هەر ژ دەستپێکێ بەشەک بوویە ژ پلانا میتا ترکیێ ژ بۆی ژناڤبرنا گەلێ کورد و میتێ ب زانابوون ئەو پەروەردەکریە.
بیقاع، ئەو جەهەنەما کو خوەدێ ژی نەشێت تێدا بژیت
یێن کو شاهرەزایێ دیرۆکا پەکەکێ نە، باش دزانن کو ئەکادمییا پەکەکێ ل دۆلا بیقاع مەزنترین جیهێ کوشتنا کوردان بوو. ئەو سەرکردەیێن ژ پەکەکێ جودا بوویی، هەر یەک ب ئاوایەکی باس ل وێ جەهەنەمێ دکەت کو چەوا ئۆجالان و یالچین کوچوکێ کەمالیست یێ هەڤالرێیێ ئۆجالان ئەو جەهەنەم ژ بۆ کوردان چێکر. ئەڤە ئۆجالان بوو کو ل ئەکادمییا مەعسووم کۆرکماز بووبوو پێغەمبەر و پێویست بوو هەموو شەرڤان و رێڤەبەرێن پەکەکێ ل بن فەرمانا ڤی پێغەمبەری دا بن و ئەو ب خوە ژی د بن فەرمانا یالچین کوچوک و سازیا ئیستخباراتا ترکیێ و سووریێ دا بوو.
ئەو جیهێن کوشتنێ یێن کو هیتلەر ل ئالمانیایێ ژ بۆ جوهیان چێکربوون، ئۆجالان ژی ئەو سیناریۆیا هیتلەر دوبارەکر و ل دۆلا بیقاع ب هەزاران کورد تەسفیە و بن ئاخکرن. نها ژی خوینا «شاهین بالیچ» و ب سەدان کادر و رێڤەبەرێن دی یێن پەکەکێ ل دۆلا بیقاع وەکە رووباری دحەرکیت. ئۆجالان تەنێ ب کوشتن و تەسفیەکرنا ڤان کادر و رێڤەبەرێن پەکەکێ ئارام نەبوو، بەلکو ل سەر جەنازەیێن وان تەقەیا خوەشی و سەرکەفتنێ دکر و گۆڤەند گێرا. وەکو چەوا ل همبەر جەنازەیێ «مەهمەت شەنەر و دلاوەر یلدرم» ئەڤ ئەنجام دایی.
لایەنەکێ دی یێ رەش ل جەم ئۆجالان سڤکاتیکرن ب ژنێ و وەکو کۆلە دیتنا وێ بوو. ئۆجالان ژنێن د ناڤا رێزێن پەکەکێ دا هەردەم ل دەردۆرا خوە کوم دکرن و دخواست وەکو پێغەمبەرەکێ ساختە یێ سەردەما مسریێن کەڤن وان بکەتە بن باندۆر و فەرمانا خوە. پەرتووکا «ژنبوون د ناڤا پەکەکێ دا» یا نڤیسکار «نەژدەت بۆلدان» مەزنترین بەلگەیە ژ بۆی ڤێ یەکێ کو ئۆجالان سڤکاتی ب ژنا کورد کرینە و هەر کارەک قرێژ دەرحەق وان دا کریە.
مەهمەت شەنەر چەوا هاتە شەهیدکرن؟
دەما د کۆنگرەیا چارەمینا پەکەکێ دا، مەهمەد شەنەر دبیتە ئەندامێ کۆنسەیا رێڤەبرا پەکەکێ و «ساری باران»ژی دبیتە سەرلەشکەرێ ئارگەکێ، ئۆجالان حەیری دمینیت و ئەڤ چەندە ژ بۆی وی نەخوەش دبیت و نکاریت ڤێ یەکێ قەبوول بکەت و دانپیدانێ ب شکەستنا خوە بکەت. ژبەرکو مەهمەت شەنەر د ناڤا خەلک و جڤاکا کوردی دا گەلەک دهاتە حەزکرن. مرۆڤەک نەتەوی و شەرڤانەک نیشتیمانی بوو. ل جەم خەلکێ دهاتە حەزکرن و چ جاران ل دژی داخواز و حەزا مللەتێ خوە کار نەکر. بەلکو د رێیا ئازادی و سەرخوەبوونا کوردستانێ دا هەردەم وەکو پێشمەرگەیەک لەهەنگ حازر و ئامادە بوو. کەلەجانا گەل ژ بۆی شەنەر هەر کو دچوو زێدەتر ئۆجالان عاجز دکر. ژبەر ڤێ یەکێ شەنەر جیهێ ئۆجالان لەرزۆک کر و ئەو ب خوە بوو کەسێ یەکێ د ناڤا پەکەکێ دا. ل ئەورۆپا و باکورێ کوردستانێ هەژمارەکا هەری زێدە یا خەلکی ل گەل شەنەر دا بوون و پرانیا گەریلایێن پەکەکێ ژی ل گەل ویدا بوون. پشتی کو ئۆجالان و گرووپا وی بەر ب لاوازبوونێ دچن هەست ب مەترسیێ دکەن! ئۆجالان ب رێیا ئیستخباراتا سووریێ و چەکدارەکێ خوە ب ناڤێ «مەحموودێ رەش» ل رۆژا 1/11/1991ێ، ب ئاوایەکێ هۆڤانە ل باژارێ قامشلۆ شەنەر تەرۆر دکەن. پشترا ئۆجالان و زلامێن خوە تەقەیا خوەشیێ ل سەر جەنازەیێ وی دکەن و گۆڤەندێ دگێرن. وی دەمی ساکینا جانسز «سارا» کو هەڤژینا شەنەر بوو، ب بێدەنگی ل کونجیکەکێ رۆندک دباراندن و ژ ترسا جانێ خوە هیچ کارڤەدانەک نیشان نەدا. ل ڤێرە پێغەمبەرەکێ ساختە ل بیقاع ژ دایک دبیت و ناڤێ خوە دکەتە سەرۆک ئاپۆ.
پێغەمبەرێ ساختە ل بیقاع و کۆمکوژییا کوردان
پشتی کو ئۆجالان شەخسیەتەکا وەکو پێغەمبەران چێدکەت و زەلامێن دەردۆرا وی تەڤر ب دەست دکەڤنە د خزمەتا وی دا، خوین چاڤێن وی دگریت و دەست ب تەسفیەکرنا دژبەرێن خوە دکەت.
تەرۆرکرنا مەهمەت شەنەر رێ ژ بۆی ئاپۆ خوەشکر ببیتە خوەدێ ل سەر سەرێ دەردۆرا خوە. ئاپۆ پەیوەندیەکا بهێز ل گەل حافز ئەسەد و ئیستخباراتا سووریێ دا هەبوو. ب ئاوایەکێ کو خوە عاسف شەوکەتێ بەرپرسێ ئیستخباراتا سووریێ، یەک ژ نیزیکترین هەڤالێن ئۆجالان بوو.
ل بیقاع هیچ کەسەک نەدکاری ل همبەر سیستەمێ ئۆجالان راوەستیت و رەخنێ لێ بگریت. ئەو کەسێ پەکەکە و سیستەما ئاپۆ پیچەکێ رەخنە کربا ب لەز دهاتە تەسفیەکرن و کوشتن.
سەلیم چروک کایا و ئایسەل چروککایا یا هەڤژینا وی ژ لایێ ئۆجالان ڤە تێنە گرتن و ئەشکەنجەکرن. پشترا ژ پەکەکێ جودا دبن و دچنە ئالمانیایێ.
«ساکینا جانسز»ژی ل سالا 2013ێ ل پاریسا پایتەختا فرانسایێ، ژ لایێ ئەندامەکێ میت و پەکەکێ ڤە هاتە تەرۆرکرن. دلاوەر یلدرم کو یەک ژ کادرێن بەرنیاسێن پەکەکێ بوو، ژ لایێ ئۆجالان ڤە هاتە تەسفیەکرن و تەقەیا خوەشیێ ل سەر جەنازەیێ وی هاتە کرن. تەرۆرکرنا دلاوەر، ئۆجالان ئارام نەکر، بەلکو «ئایتەن یلدرم»یا خوشکا وی ژی ب ئەشکەنجەیێ کوشت. شاهین بالیچ «مەتین» کو ئەندامێ سەرکردایەتیا پەکەکێ و یەک ژ فەرماندارێن لەشکری یێن ڤێ پارتیێ بوو، سالا 1990ێ ل ئەکادمییا مەعسووم کۆرکماز ل دۆلا بیقاع ب فەرمانا ئۆجالان هاتە کوشتن.
ب سەدان چیرۆکێن دی یێن پڕ ب خوین هەنە کو ب دەستێ زەلامێن جەلاد یێن ئاپۆ و وی ب خوە هاتینە ئەنجامدایین. بیقاع گۆرستانەکا دی یە کو ب هەزاران کورد تێدا هاتنە کۆمکوژکرن.
دیرۆک نە تشتەکێ ژ بیر دکەت و نە ژی کەسەکی عەفوو دکەت. ئۆجالان و پارتیا وی خالەکا رەش و گەمارن ب ناڤ چاڤێن دیرۆکا هەر چار پارچەیێن کوردستانی.
