مامێ ئەمین عیسا: ئەم دخوازین راستیا کوشتنا برازایێ من دیار ببیت

مامێ ئەمین عیسا: ئەم دخوازین راستیا کوشتنا برازایێ من دیار ببیت

مامێ ئەمین عیسا و ئەندامێ پۆلیتبورۆیا پارتیا دەمۆکراتا کوردستانێ – سووریا (پەدەکە-سێ) بەشار ئەمین دیار کر: “ئەم دخوازین ل خوە مکور بهێین کو ئەو (ئەمین عیسا) د ئیشکەنجەیێ دا ژیانا خوە ژ دەست دایە و دیار ببیت کو کی سەبەبێ ڤێ یە و ئەو کەس سزایێ خوە وەرگریت.”

د چاڤپێکەتنەکێ دا لگەل کوردستان٢٤ێ بەشار ئەمین راگھاند: “پێشی وان داخویانیەک دای و ئاشکەرا کری کو (ئەمین عیسا) ب مرنەکا سرووشتی مریە، جەلتەیا مێشکی لێ دایە، وی وەختی مە تەرمێ وی وەرگرت و مە بەرێ خوە دایێ، د دەما شووشتنێ دا 14 – 15 کەس ئامادە بوون، هەموو شاھدن ل سەر ڤێ مەسەلەیێ، مە جارەکا دی ژی خواست کو گۆرا وی ڤەکەن و لێکۆلینێ بکەن.”

بەشار ئەمین دەستنیشان کر: “دەما گۆتی بەرێز مەزلووم عەبدی سەرپرشتیا لێکۆلینێ دکەت، مە گۆت بەرێز مەزلووم ڤێ مژارێ دشۆپینیت.”

ھەروھا دیار کر: “مە ئیرۆ داخویانیەک دەرخست و مە گۆت دۆزا مە ڤەکرییە، ئەم دێ ل دووڤە بین، ئەم جارەکا دی بانگەوازیێ دکەین، ئەم ژ بلی راستیی تشتەکی دی ناخوازین، ئەم دخوازین ل خوە مکور بهێین کو ئەو د ئیشکەنجەیێ دا چوویە و دیار ببیت کو کی سەبەبێ ڤێ یە و ئەڤ تشتە ئەنجام دایە و ئەو سزایێ خوە وەرگریت.”

بەشار ئەمین دەستنیشان کر کو ئەو مژارا کوشتنا ئەمین عیسا دشۆپینن و ژ بۆ کو راستیا بوویەرێ دیار ببیت، ب رێیا مەدیایێ خەباتا خوە بەردەوام دکەن و گۆت: “پرسا مە بوویە پرسا رایا گشتی، ئەڤ پرسە ب تەنێ پرسا مە نەمایە.”

کوشتنا ئەمین عیسا عەلی ل سەر ئاستێ ناڤخوە و ناڤدەولەتی راستی کارڤەدانێن مەزن ھاتبوو و گەلەک کەس و لایەنان، ژ ناڤا وان ژی پەدەکە-سێ، ئەنەکەسێ، دژەتەرۆرا ھەرێما کوردستانێ و بالیۆزخانەیا ئامەریکا ل سووریێ ئەڤ تاوانە شەرمەزار کر و داخوازا ئاشکەرەکرنا ھوورگلیێن کوشتنا وی کرن.

ئەمین عیسا عەلی رۆژا 22یێ گولانا بۆری ژ ئالیێ ئاساییشا رۆژئاڤایێ کوردستانێ ڤە ھاتبوو بنچاڤکرن و پشتی 27 رۆژان تەرمێ وی رادەستی مالباتا وی ھاتبوو کرن. مالباتا وی ژی دبێژیت، ئەمین د بن ئەشکەنجەیەکا توند دا ھاتیە کوشتن.