د داخویانیا کو دوھی ل سەر ناڤێ کۆنسەیا رێڤەبەرا کەجەکێ ھاتیە وەشاندن دا ل دژی پەدەکێ و ھێزێن پێشمەرگە شەر هاتە راگەهاندن. کەجەکێ د داخویانیا خوە دا راگھاند کو ئەو دێ د دەمەکێ نێزیک دا ئێرشەکا بەرفرەھتر ل دژی ھێزێن پێشمەرگە ئەنجام دەن.
رێخستنا پەکەکێ-کەجەکێ ژ سالا 2019ێ و هێرڤە شەرەکێ د ئاستا داکەتی دا، ل دژی حکوومەتا ھەرێمێ و ھێزێن پێشمەرگە دمەشینیت. ھەتا نھا 9 پێشمەرگە ژ ئالیێ پەکەکێ ڤە ھاتنە شەھید کرن. ب دەھان پێشمەرگە بریندار بوونە وەکی دی، 7 تەقەمەنیێن کو پەکەکێ د شەش مەھێن داوی دا تەنێ ل ھەرێما بەھدینان ل سەر رێیا سڤیلان دانابوون، ھاتنە ژناڤبرن.
گەلۆ کەجەکە-پەکەکێ شیاینە کیژان ئۆپەراسیۆنا ترکیا ئاستەنگ بکەن؟
د داخویانیا کەجەکێ دا ھاتە ئیدیعاکرن کو گەریلا ل دژی دەولەتا ترک شەری دکەت و ئۆپەراسیۆنا وان بەلاڤ دکەت. د داخویانیێ دا ھاتە گۆتن، “ئەگەر پەدەکە نەکەتبا ناڤا ھەولدانێن کو گەریلا مژوول دکەن و رێگرن گەریلا دژی ئارتێشا ترک شەرەکێ ب باندۆر ئەنجام بدەت دا گەریلا دەولەتا ترکا د 2 ئۆپەراسیۆنێن بەرێ دا شکێنیت و وان ناچار کەت کو پاشڤە ڤەکێشابا.”
کەجەکە ئیدیعا دکەت ئارتێشا ترکا کو د مەھێن داوی دا تێک چوویە، ژ لایێ پەدەکێ و پێشمەرگە ڤە ھاتیە رزگارکرن. لێبەلێ، چاڤدێرێن لەشکەری و سیاسی و ئامارێن شەری دیار دکەن کو پەکەکە د دیرۆکا خوەیا لەشکەری دا د رەوشا ھەری تێکچوویی دا دەرباس دبیت. رەوشا دیار یا ھەرێمێ و کوشتنا رێڤەبەرێن پایابلند یێن پەکەکێ تێکچوونا پەکەکێ یا د قادا لەشکەری دا پشتراست دکەت.
پەکەکە ئێدی نکاریت ل چیایێن باکورێ کوردستانێ حەرەکەتێ بکەت. نێزیکی 5 سالانە کو ل باکورێ کوردستانێ چالاکییەک بچووک ژی نەھاتییە کرن و دربەک ل ئارتێشا ترکیێ نەدایە.
پەکەکە ل باکور بێھێز و بێ باندۆر بوویە. تەنێ ل ھەر ئەیالەتەکێ چەند کەسەک نیڤ سڤیل ژ بۆ تۆڤی مانە. پەکەکە ئەو رەوشا لەشکەری یا ل باکور تێدا، ھەمان دەم ل باشوور ژی کەتییە د رەوشە کا ووسا خراب دا. پەکەکە ژ سالا 2018ێ و هێرڤە د ھەموو ئۆپەراسیۆنێن ئارتێشا ترکیێ یێن ل دژی باشوورێ کوردستانێ دا شکەستن خوارییە و بارەگەھێن خوە ژدەست دانە. ئارتێشا ترک کەتیە ھەموو ھەرێمێن کو بەرێ وەکی ھەرێمێن پاراستنا مەدیا ب ناڤ دکرن. دەڤەرێن کو پەکەکە تێدا دەستهلاتدار بوو ھەموو رادەستی ئارتێشا ترک کرن. د ئۆپەراسیۆنێن کو ئارتێشا ترک ل دژی حەفتەنینێ د سالا 2020ێ دا ئەنجامدای دا، پەکەکێ ئیدیعا کر کو ئارتێشا ترک تێک چوویە. لێ بەلێ ئارتێشا ترک نھا ل حەفتەنینێ ھەموو نوقتەیێن ستراتەژیک ب دەست خستینە و بارەگەھێن خوە تێ دا ئاڤا کرنە. د ئۆپەراسیۆنا ترکیایێ یا خەتا مەتینا ئاڤاشین یا د سالا 2021ێ دا هاتیە ئەنجامدان ژی، پەکەکێ گرێن ستراتەژیک و پرانیا دەڤەرا ب جهـ هێلان. ھەرێمێن پاراستنا مەدیا ئیرۆ ژ بۆ پەکەکێ یێن بوویە هەرێمێن مینا دەڤەرێن باکورێ کوردستانێ و نکارن تێدا بژین.
پەکەکە ھەر ھەفتە دیمەنێن چالاکیا ل دژی ئارتێشا ترکا د گەریلا تیڤی دا بەلاڤ دکەت. ئەڤ وێنەیێن کو تێ دا نە دیارە کا لەشکەرێن ترک مرنە یان نە، ب پرانی ژ بۆ پرۆپاگاندایێ نە. ئەو ھەول ددەت کو ب ڤان ڤیدیۆیان جەماوەرێ خوە لسەر لنگا راگریت. پرانییا ڤان ڤیدەۆیان ژی ئارشیڤن. گەلۆ ھەکە ئەم وە حەساب بکەین کو پەکەکە رۆژانە ب دەھان لەشکەرێن ترک ل قاشوورا، زاپ و حەفتەنینێ دکوژیت ژی، ئەڤ نایێ واتەیا تێکچوونا دەولەتا ترک و نە ژی سەرکەتنا پەکەکێ نیشان ددەت. پەکەکە ب ناڤێ گەریلایا تەقەیەکا دەمکورت دکەت و پشترا دەڤەرێ ژ بۆ ئارتێشا ترک دھێلیت و دچیت. پشترا ژی خوە ب ناڤێن مەزن وەکی بازێن زاگرۆسێ، جەنگا حەفتەنینێ و ھتد بناڤ دکەت. لێ د راستییێ دا نە جەنگ ھەیە و نە ژی باز. پەکەکە هەموو شەران ل سەر پیشتا راگاھاندنا خوە برێڤە دبەت.
ژ بەر ڤێ یەکێ پەکەکە نکاریت ڤێ تێکچوونا خوە یا لەشکەری ب پەدەکێ و پێشمەرگە ڤە ڤەشیریت. وەکی دی، ئەڤە د وارێ تاکتیکێن شەری دا نەمومکنە. ژ بەر کو ئارتێشا ترک نە ژ ھوندرێ باشوورێ کوردستانێ، پێشڤە دچیت بەلکو ل دەڤەرێن د دەستێ پەکەکێ دا پێشدکەڤیت. ئانکو، ئازادیا پەکەکێ یا ئاژۆتنا مۆتۆرسیکلەتێ ل کۆلانێن گوندێن شێلادزێ نکاریت د شەرێ ل دژی ئارتێشا ترک دا رۆلی بگێریت.
ژ بەر کو پەکەکە خاکا باشوور پارچە پارچە رادەستی دەولەتا ترک دکەت و ئارتێشا ترک ھەما ھەما ژ ھەموو سنۆران 45 کیلۆمەتران کەتیە ناڤا ئاخا باشوور دا، ژ بەر ڤێ سەدەما مەترسیدار حکوومەتا ھەرێما کوردستانێ داکو ریگریێ ل پێشڤەهاتنا ھەر دو ھێزان (ترکیا و پەکەکێ) بگریت و نەهێلیت نیزیکی باژێران ببن، پێشمەرگەیێن کوردستانێ ل وان ناڤچەیان بجهـ دکەت. ژ بەر کو پەکەکە ھەر سال بەشەکێ ئەردێ باشوور رادەستی دەولەتا ترک دکەت و پاشێ ژی گاڤ ب گاڤ بەر ب کووراھییا ھەرێما کوردستانێ ڤە دچیت. کەسێ نە گۆتییە پەکەکێ تو چما ل ئەرمووشی، دالانپەری، شەتوونسی یان ژی گەلییێ پساخایی. لێ ئەم دبێژن چ شولێ تە ل ناڤا دێرەلۆک، شێلادزێ، ئامێدییێ، دییانا و زاخۆ ھەیە. هەگەر تو نەشیابی خوە ل چییایێن زاگرۆس بپارێزی دێ چاوا خوە ل ناڤا باژاران ئانکو ناڤ زارۆک، ژن و کالا پاریزی؟ ئەڤجا نە حەوجەیە ب خەشیمیێ رابی “جۆتکرنێ نیشانی جۆتیاری بدەی”.
پەردەیا نهێنییێ یا ل سەر داخویانیا قارایلانە
د داخویانیا کەجەکێ دا ژ ھەر کەسەکێ دهێتە خواستن کو ل دژی داگیرکەریا ترکا ببنە خوەدی ھەلوەست. لێ بەلێ، د داخویانیێ دا قەت باسی تەکلیفا دەولەتا ترک یا ژ پەکەکێ کری کو “شەری ل دژی حکوومەتا باشوور بکەت” نەھاتیە کرن. رێڤەبەرێ پەکەکێ موراد قارایلان د 10ێ تیرمەھێ دا گۆت کو “دەولەتا ترک تەکلیف ژ وان کرییە و ژ وان خواستییە کو شەرێ ل باکورێ کوردستانێ راوەستینن و ل پارچەیێن دی یێن کوردستانێ شەری بکەن”. کەجەکە و سازییێن دی یێن پەکەکێ د دەربارێ ھەڤدیتنێن د ناڤبەرا دەولەتا ترک و پەکەکێ دا چ ھوورگلیێن دی نەدان. لێ پەکەکە ئەڤ 5 سالە ل باکورێ کوردستانێ شەری ناکەت. لێ شەری ل تەڤاھیا باشوورێ کوردستانێ بەلاڤ دکەت. ب بەرێ خوە دانە ڤێ راستیێ، دهێتە دیتن کو د ناڤبەرا دەولەتا ترک و پەکەکێ دا رێکەفتنەک ھەیە کو شەری ل باشوورێ کوردستانێ بەرفەرەھ بکەن.
ئێریشا کۆنیایێ و داخویانیا کەجەکێ
دەمێ داخویانیا کەجەکێ ژی گەلەک راماندارە. ئەڤ داخویانیا کەجەکێ ھێژ 24 دەمژمێر ل سەر کوشتنا 7 کوردان ل کۆنیایێ د ئێریشا نیژادپەرەستی دا نەدەرباس بووی هاتە دەرکرن، دهێتە دیتن کو پەکەکە دخوازیت رۆژەڤا کوردان بەرەڤاژی بکەت. ژ بەر کو داخویانی د پێڤاژۆیەکێ دا کو ترکیا ب ھەموو ھێزا خوە ڤە ئێرشی سەر کوردێن سڤیل دکەت و دخازیت کۆمکوژیێ ل سەر کوردان ئەنجام بدەت، پەکەکە د ڤێ دەرازینکا ھەستییار دا دژی حکوومەتا ھەرێما کوردستانێ و پێشمەرگە بانگەوازیا شەری دکەت.
