شەرێ ترکیێ و په‌كه‌كێ رێ ل به‌ر ئاڤاکرنا 800 گوندان گرتییه
د سێ رۆژێن بووری دا، فرۆکە و تۆپخانەیێن ترکیێ نێزیکی 15 جهان ل هەرێما کوردستانێ بۆردوومان و تۆپباران کرنە، ژ وان ژی هنەک ناڤچەیێن نێزیکی دەرکارێ ل سینۆرێ زاخۆیێ، نێزیکی کانی ماسێ و دێرەلۆکێ ل سینۆرێ ئامێدیێ و نێزیکی دینارتە ل سینۆرێ ئاکرێ.
ل گۆر رێڤەبەرییا چاندنی و دارستان و پەرژینێن دهۆکێ، ژ بەر بۆردوومان و تۆپبارانا ترکیێ و شەرێ ناڤبەرا سەربازێن وی وەلاتی و گەریلایێن په‌كه‌كێ، زیانەکا زێدە گهایە ناڤچەیێ.
کاوە سەبری، رێڤەبەرێ چاندنی و دارستان و پەرژینێن دهۆکێ ژ رووداوێ را گۆت: ب سەدەما شەرێ ناڤبەرا ترکیێ و په‌كه‌كێ نێزیکی 40 هەزار دونم ژ دارستان و گیایێ سینۆرێ پارێزگەهێ ژ ناڤ چوونە.
ئۆپەراسیۆنا هەری داوی یا ترکیێ بۆ سەر وان ناڤچەیێن هەرێما کوردستانێ کو گەریلایێن په‌كه‌كێ تێدانە، د داوییا مەها نیسانێ دا بوو، ب ناڤێ ئۆپەراسیۆنا پەنجێ بروسکێ دەستپێ کربوو.
ترکیێ هێزێن خوە ل 12 جهان ب جیهـ کرنە و ژ بەر ئۆپەراسیۆنا وێ ژی خەلکێ 6 گوندان دەربدەر بوونە و 3 وەلاتی ژی ل سینۆرێ ئامێدیێ بریندار بوونە.
لێ بەری ڤێ ئۆپەراسیۆنێ ژی، ئۆپەراسیۆنێن ترکیێ یێن دن هەبوون، ژ وان ژی ئۆپەراسیۆنا ناسکری ب پەنجێ باز و پەنجێ باز دوو.
حكمه‌ت محەمەد، بریاردەرێ کۆمیتەیا ناڤخوە و ئاساییشێ و ئەنجوومەنێن خوەجهی ل پارلامەنتۆیا کوردستانێ ژ رووداوێ را راگه‌هاند، ئیسال 20 گوند ژ بەر شەرێ په‌كه‌كێ و ترکیێ ڤالا بوونە، 6 کەسان جانێ خوە ژدەست دانە، زیانەکا زێدە گهشتیە شوونوار و ئەلەکتریکا ناڤچەیێن جهێ شەر ژی.
حكمه‌ت محەمەد گۆت ژی، ژ سالا 1990 ڤە زێدەتری 100 وەلاتییان ژ بەر وی شەری جانێ خوە ژدەست دانە و بریندار بوونە.
بالانبۆ محەمەد عەلی، جیگرێ سەرۆکێ کۆمیتەیا کارووبارێ پێشمەرگە ل پارلامەنتۆیا کوردستانێ دبێژیت: «وەلاتییان تەڤان گلی هەنە، ژ به‌ر كو مخابن هەم پووش و گیایەک زێدە شەوتییە و هەم مالێن وەلاتییان، دکارم ببێژم کو هاتنە رووخاندن، هەم ژی دەزگەهێن حکوومەتێ و خزمەتگوزاری راوەستیانە، لەورا خەلکێ ناڤچەیێن سینۆری گلیا رەوشێ دکن».
زێدەتری 25 سالانە، ئارتێشا ترکیێ و گەریلایێن په‌كه‌كێ ل هەرێما کوردستانێ شەر دکن.
ژ ئەنجاما ڤی شەری، دەرفەت نەبوو کو زێدەیی 800 گوندان بێنە ئاڤاکرن، دەستەیا پاراستن و چێکرنا ژینگەهێ دبێژیت، د ناڤبەرا سالێن 2010ێ و 2020ێ دا 873 دۆنم دارستان و پەرژین شەوتینە، و رێژەیا %30 هەتا %35 ژ بەر بۆردوومان و تۆپبارانا ترکیێ و ئیرانێ بوو.
