مەزلووم عەبدی: ئەز شانازیێ ب ناسناما سوریێ دکەم

مەزلووم عەبدی: ئەز شانازیێ ب ناسناما سوریێ دکەم

فەرماندارێ گشتی یێ ھێزێن سووریا یا دەمۆکراتیک (ھەسەدێ) مەزلووم عەبدی دبێژیت، ئەم شانازیێ ب ناسنامەیا سووریێ دکەین و دخوازین پرسگرێکێن خوە لگەل حکوومەتا سووریێ چارەسەر بکەین.

مەزلووم عەبدی د جڤینا سالانەیا مەجلسێن لەشکەری یێن ھەسەدێ کو تێدا فەرماندارێن ھێز و مەجلسێن لەشکەری یێن رۆژئاڤایێ کوردستانێ، شاندەیا ھەڤپەیمانیا ناڤدەولەتی و رایەدارێن رێڤەبەریا خوەسەر بەشدار بوون ئاخفت.

عەبدی جارەکا دی دوبارە کر کو ھەسەدە ئامادەیە لگەل ھەموو لایەنێن کو دخوازن ئالۆزیا سووریێ چارەسەر ببیت دا دیالۆگێ ئەنجام بدەت و وەھا گۆت: “ئەم ب دیالۆگێ، ئاگربەست، دیالۆگا سووری-سووری، چارەسەریا سیاسی و چارەسەرکرنا پرسگرێکێن لگەل حکومەتا شامێ داینە. دڤێت پەیاما مە شاش نەهێتە فامکرن. داخویانیێن حکوومەتا شامێ یێن دەربارێ ھێزێن مە نایێن قەبوولکرن و ناکەڤنە خزمەتا خەلکێ سووریێ. ئەو ھێزێن مە ب خیانەتێ و پارچەکرنا وەلات تاوانبار دکەت. ئەم دبێژینە وان، هەوە ئەڤ ھەرێم ژ بۆ داعش و کۆمێن تەرۆریستی هێلا. ھێزێن مەنە کو ئەڤ ھەرێمە رزگار کری و گەلێ وێ دپارێزن.”

ھەروەھا عەبدی گۆت کو ئەو سەرفرازە ژ بەر کو ژ سووریایێ یە و وەھا بەردەوام بوو: “ئەم سەربلندین ب ناسنامەیا خوەیا سووری. ھەموو ھێزێن د بن سەیوانا ھەسەدێ دا ب ڤێ یەکێ سەرفرازن. د جڤینا بەرێ دا مە بریارەکا گرنگ دا کو پەیکەرێ رێخستنێ یێ ھەسەدێ بگوھرین. لێ ژ بەر ئێرشێن دەولەتا ترکیێ و ڤیرۆسا کۆرۆنایێ ئەڤ بریار و گەلەک بریارێن دی نەھاتنە جێبەجێکرن.”

مەزلووم عەبدی دەربارێ گوھارتنا دەمۆگرافیا ھەرێمێن کو دەولەتا ترکیا داگیر کرنە ژی ئاخڤت و تەکەز کر کو گوھارتنا دەمۆگرافیێ بێ ناڤبەر بەردەوامە.

د بەردەوامیێ ژی دا عەبدی دەستنیشان کر کو دەولەتا ترکیا رۆژانە ئاگربەستێ بنپێ دکەت و ھەڤکاریا وان یا لگەل ھێزێن رووسیایێ ژ بۆ پاراستنا ئاگربەستێ ل سنۆرێن باکور بەردەوامە.

پوستێن ھەمان بەش