خوه‌زی مه‌رۆڤ كالكه‌ك ژ روویێ كالكان هه‌به
سمكۆ عه‌بدولعه‌زیز
به‌شا: 2
دوران كالكان د رۆژا 3 ته‌باخا 2021ان ده ل مه‌دیا ها‌به‌رێ جاره‌ك دن كانییا گوند له‌وتاند و گۆ: «سلێمانی مه‌ترۆپۆله‌ك پڕ گرینگه و نابه وه‌كه هه‌ولێر و دهوكێ ببه».
ووسا دیاره تو كه‌س ب قاسی ته نزانه كبژان ده‌را ته د شه‌وته و پێویست ناكه تو و رێخستنا خوه هێسران ژ بۆی سلێمانیێ برژینن، هه‌گه‌ر هێسرێن وه راست بن؟ ئه‌ز د پرسم:
گه‌لۆ ب یا وه یه‌نه‌كه خه‌تا نه‌ته‌وه په‌روه‌ریێ دگره؟ هه‌گه‌ر ووسا به، پرس ئه‌ڤه چما د وانه‌یێن كو ل ئه‌كادمییا قورقوماز ده تێن گۆتن ئه‌ڤ یێك نه‌هاتییه ته‌سبیت كرن؟
چما د خولا په‌روه‌ردێ ده ل ور كو ژ بۆی ده‌ما شه‌ش مه‌هان ده‌وام دكه، وانه ل سه‌ر شه‌خسێ «مام جه‌لال» تونه‌یه؟
چما هه‌وه مام جه‌لال ب فه‌ئودال و كه‌ڤنه‌شۆپ و حه‌ز ل خوه‌كه‌ر و ب میكافیلى ددا ناس كرن؟ پڕ چما هه‌نه، ژ خوه ئه‌ز و تو ل ور شاگرد بووین.
هه‌گه‌ر نوكا ژی ئه‌م ژ كادرۆ و گێریلایێن په‌كه‌كێ بپرسن، گه‌لۆ كالكان ب تو تشته‌كێ تێ ناس كرن؟ باوه‌رم هه‌ری كێم 90% وێ ببێژن ب دوو روویاتیێ تێ ناس كرن، كالكان قه‌ی ئەوێن د زیندانا دیاربەكرێ دا مای و خوه رادەستی دەولەتێ نەکری، پشتی هاتینە ئازاد کرن، ما نه ته پرانیا وان یان ب سیخۆر ناساندن و هه‌وه تاسفییه کرن، یان وەکی سلێمان چروککایا رەڤیان، هه‌ر وها هه‌موو هه‌ڤالێن دان پێدان كری ئه‌رك د رێخستنێ ده وه‌رگرتن و یێك ژێ تو.
ته دوو ناڤ ل ناڤا گێریلایان ده هه‌نه، ئه‌شكه‌ره ژ ته‌ر ره دبێژن قوپتان كالكان و د ناڤا خوه دا ژ ته‌ر ره دبێژن: به‌كرۆك، هه‌گه باوه‌ر نه‌كه‌ى؟ ته‌عقیبێ بكه.
كالكانێ به‌كرۆك تو باش دزانى به‌كرۆكێ داستانا «مه‌م و زین» چ قاس ژ بۆی كوشتنا ڤینا مه‌م و زینێ خه‌بتی، لێ به‌لێ به‌كرۆكی نكاری وێ ڤینا د نێڤبه‌را وان ده بكوژه.
ڤینا سلێمانی، هه‌ولێر، دهۆك و هه‌له‌بچه ب ژه‌هرا كو تو د ئاڤێژی خه‌را نابه، ئه‌ڤ 4 مه‌ترۆپۆل ژ هێلا یێك حكوومه‌تا كوردى تێن مه‌شاندن، یێن مینا ته و رێخستنا ته، نكارن ڤان باژێران ژ هه‌ڤ ڤه‌قه‌تینن.
ل ئالیێ دن، تشتا كو ل سلێمانیێ دقه‌ومه، نه‌گرێدای ته‌ڤ سلێمانیێ یه، ژ خوه هه‌موو پارتیێن كوردستانی د سلێمانیێ ده نه، نه‌ته‌نێ یه‌نه‌كه، ل گۆری ئێنجامێن هلبژراتنا داوین ژی، یه‌نه‌كێ 35% ئا ده‌نگێن سلێمانیێ ب ده‌ست خستبوون.
مه‌رۆڤ دكاره ببێژه كو 80% ئالیگرێن یه‌نه‌كێ ژی ل دژى سیاسه‌تا لاهور شێخ جه‌نگی نه، ئه‌ڤ ژی دهێته واتایا كو ل سلێمانیێ ته‌نێ 5% ب لاهور ره نه.
لۆما سه‌ده‌ما شه‌واتا ب پشتا ته و رێخستنا ته ژ بۆی سلێمانیێ كه‌تی چی یه؟ سه‌ده‌م چنه هوون كه‌تنه لاڤه لاڤێ؟ هه‌گه‌ر به‌رسیڤا وه تونه به؟ به‌رسڤ ل جه‌م مه هه‌یه، تشتا كو ل سلێمانیێ د قه‌ومه ئه‌ڤه:
پێشی گرتنا ل بازرگانییا مادده‌یێن هشبه‌رێ یه كو تو و رێخستنا ته شریكێن وێ بازرگانیێ نه.
كۆنترۆلكرنا بازرگانییا سینۆری یه كو وێ ببه سه‌ده‌م ئالیكاری ژ رێخستنا ته وه‌رن قوت كرن.
قوت كرنا وێ كۆریدۆرێ یه كو هه‌وه دروست كری كو تێده چه‌ك ژ ئیرانێ بۆ سووریێ و لبنانێ و حه‌شدا شابی تێن شاندن.
پێشی گرتنه ل كادرۆیێن په‌كه‌كێ كو سه‌ربه‌ست ل باله‌فرخانه‌یا سلێمانیێ د حه‌ركین.
پێشی گرتنه ل جڤینێن قرێژ كو په‌كه‌كێ ب ئیستخباراتێن ده‌وله‌تێن داگیر كه‌ر ره ل سلێمانیێ دكرن.
