«سه‌رۆكێ مه»‌ هه‌به‌، بلا شه‌واتا خوه‌دێ ب عه‌فرینێ و گه‌لێ وێ بكه‌ڤه‌!!

رێخستنا په‌كه‌كێ پاش كو عه‌فرین د ناڤا چه‌ند رۆژان ده‌ ژ بۆ عه‌سكه‌رێ ترك هشتی و ره‌ڤیایی، ده‌ست ئاڤێتییه‌ خه‌باتێن خاپاندنا كۆچبه‌رێن وێ، ئه‌و ب دارێ زۆرێ ده‌رخستنه‌ مه‌شه‌كێ و سلۆگانا ب «روحێ پێنگاڤا 15ی ته‌باخێ ئه‌مێ رێبه‌ر ئاپۆ ئازاد بكن»!! دده‌ گۆتن.

ئاژانسا ANFێ یا په‌كه‌كێ، نووچه‌یه‌ك ب ناڤ و نیشانێ «عه‌فرینی ل دژی ته‌جریدا ئۆجالان مه‌شیان» ده‌رخستییه‌ پێش و تێده‌ گۆتییه‌ كو ب سه‌دان شێنیێن عه‌فرینێ ژ بۆ بداویكرنا ته‌جریدێ مه‌شه‌ك گرسه‌یی ل دارخستن.

تو كه‌سی ب قاسی ئاپۆ و په‌كه‌كێ رۆژا عه‌فرینییان تاری نه‌كرییه‌

په‌كه‌كێ ب ده‌هان شێنیێن عه‌فرینێ یێن كو ژ سه‌ده‌ما داگیركه‌ریێ و ره‌ڤیانا په‌كه‌كێ ل ده‌ما ئێریشێ، كۆچبه‌ری گوندێن شه‌هبایێ بووی كۆم كرنه‌، هه‌ر یێك ژ وان 2 وێنه‌یێن ئاپۆ دانه‌ ده‌ستێ وان، پرانی ژێ ژن و زارۆكن و نزانن كو وێنه‌یا وی زلامێ وان بلند كری سه‌ده‌ما ڤێ ده‌رده‌سه‌ریێ یه‌ كو ئه‌و كه‌تنه‌ تێده‌.

رێخستنا په‌كه‌كێ پڕ ب روو قایمی سلۆگانێن «ئه‌مێ رێبه‌ر ئاپۆ رزگار بكن» و «كه‌س نكاره‌ رۆژا مه‌ تاری بكه‌»، خستنه‌ ده‌ستێ كۆچبه‌رێن عه‌فرینێ ده‌، لێ یا راست ئه‌و هه‌مان كۆچبه‌رن یێن ژ سه‌ده‌ما سیاسه‌تا شاش یا په‌كه‌كێ و پیلانێن «ئاپۆ» كۆچبه‌ر و ده‌ربه‌ده‌ر بوونه‌، هه‌ر ئه‌و كۆچبه‌رن یێن كو تو كه‌سی ب قاسی په‌كه‌كێ و ئاپۆ رۆژا وان تاری نه‌كرنه‌.

ژ بۆ په‌كه‌كێ ئاپۆ هه‌به‌، بلا عه‌فرین و گه‌لێ وێ بچه‌ شه‌واتێ‌

بێئه‌خلاقییا په‌كه‌كێ ب ڤێ مه‌شێ هه‌موو سینۆر ده‌رباس كرنه‌، ژ به‌ر كو هه‌گه‌ر وێنه‌یێن شه‌هیدێن عه‌فرینێ و سلۆگانێن ب داوی كرنا داگیركه‌ریێ ل شوونا یێن ئاپۆ د ڤێ مه‌شێ ده‌ بلند كربان، ل وێ چاخێ مرۆڤ دكاره‌ ببێژه‌ یاوو رێخستنێ خه‌ما عه‌فرینێ هلگرتییه‌، د ڤێ مه‌شێ ده‌ ته‌نێ راستییه‌ك ده‌ردكه‌ڤه‌ به‌ر چاڤان ئه‌و ژی ئه‌ڤه‌: «ژ بۆ رێخستنا په‌كه‌كێ نه‌خاكا وه‌لات و نه‌ ژی گه‌ل تو واته‌ نینه‌، ئه‌و دكاره‌ نه‌ تنێ خاكا كوردستانێ به‌لكو گه‌لێ كورد ل هه‌ر ده‌رێ فه‌دایێ وی زلامی بكه‌ كو د ئیمرالیێ ده‌ رازایه»، ژ بۆ په‌كه‌كێ و گرووپا ئه‌نقه‌رێ ئاپۆ هه‌به‌، بلا عه‌فرین و گه‌لێ وێ بچه‌ شه‌واتێ‌.

رێخستنا په‌كه‌كێ ل ده‌ما ئێریشا داگیركه‌رییا سه‌ر عه‌فرینێ دگۆ: «عه‌فرین وێ ژ بۆ تركیێ ببه‌ دۆژه‌هـ، كارایلان دگۆ: هه‌گه‌ر شه‌ره‌فا ئاردۆگان هه‌به‌ وێ لنگێ وی بكه‌ڤه‌ ناڤا عه‌فرینێ»!!، لێ به‌لێ وان عه‌فرینا ره‌نگین ژ بۆی تركیێ هشت و شێنیێن وێ كۆچبه‌ر و ده‌ربه‌ده‌ر كرن.

په‌كه‌كه‌ یا كو ئیرۆ نكاره‌ عه‌فرینا بن ده‌ستێ تركا كو چه‌ند كیلۆمه‌تران ژ وان دووره‌ رزگار بكه‌، هاتییه‌ و سلۆگانا رزگاركرنا «گرئاڤه‌كێ» ب كۆچبه‌رێ به‌له‌نگازێ عه‌فرینێ دده‌ گۆتن كو ب سه‌دان كیلۆمه‌تران دووره‌، گه‌لۆ مرۆڤ دپرسه‌، قه‌ی دۆزا عه‌فرینییان ل ئیمرالیێ یه؟‌ قه‌ی ده‌مۆكراتیك كرنا تركیێ یا كو سه‌رۆكێ په‌كه‌كێ بانگا وێ دكه‌ چ ئێنجام ژ بۆ عه‌فرینێ و كوردان ئانی؟ بلا عه‌فرینی باش بزانبن یێن كو ئه‌و خستنه‌ ڤێ ره‌وشێ په‌كه‌كه‌ یه‌، یێن كو رۆژئاڤا كوردستانێ كرنه‌ باكورێ سووریێ په‌كه‌كه‌یه‌، یێن كو وان ل ده‌ربه‌رده‌ریێ ژی دخاپینه‌ هه‌ر په‌كه‌كه‌ یه و یێن كو دخوازن هه‌ر تشتی فه‌دایێ كه‌مالیستێ ل ئیمرالیێ بكن هه‌ر په‌كه‌كه‌ ب خوه‌ یه‌‌.

پوستێن ھەمان بەش