گوندیێ گوندێ دەشیشێ یێ کو د پەڤچوونا پەکەکێ-تەسەکێ دا شەھید بووبوو، ل زاخۆیێ ھات ڤەشارتن

ئیبراهیم حەسەن محەمەد کو ژ گوندێ دەشیشێ یە و د پەڤچوونا ناڤبەرا پەکەکێ و ترکیا دا شەھید بووبوو ل زاخۆیێ ھات بن ئاخ کرن.

گوندێ دەششێ د 15ێ گولانێ دا ژ بەر پەڤچوونێن د ناڤبەرا ترکیا و پەکەکێ دا ھاتبوو ڤالاکرن. ئیبراهیم حەسەن و 10 گوندی د دەمێن جودا دا ژ بۆ ئاڤدانا باخچەیێن خوە دچوونە گوندێن خوە.

ئیبراھیم حەسەن محەمەد دوھی ژ بۆ ئاڤدانا باخچەیێ خوە دیسا چوو گوندێ دەششێ. دەما کو ئیبراهیم حەسەن ل گوندی بوو، د ناڤبەرا ھێزێن چەکدارێن ترک و پەکەکێ دا ل ھەرێمێ پەڤچوون دەرکەت. د دەما پەڤچوونێ دا، بابێ 7 زارۆکان یێ 52 سالی، ئیبراھیم حەسەن محەمەد، د ئێریشا ھەوایی یا بالافرێن شەری یێن ھێزێن چەکدارێن ترک دا ژیانا خوە ژ دەست دا.

دایک و هەڤژینا وی پەیڤین

ئیبراھیم حەسەن محەمەد ل زاخۆ ب ئاخێ هات سپارتن

دایکا ئیبراهیم حەسەن، ئەمینا ئەبووزەد ژ بۆ رووداوێ ئاخڤت و گۆت: ئەو چووبوو باخچەیێ خوە ئاڤ بدە. من دەھ جاران گۆت، ” ژ بۆ خاترێ پێخەمبەر نەچی، بابێ تە د وان واران دا خێر نەدیتیە، تو ژی نابینی”.

ھەڤژینا ئیبراهیم حەسەن، بھار عەزەدین گۆت، “وی بارێ 13-14 کەسان ژ بۆ من هێلا. مە زارۆک ھەنە. ھەموو بار ل سەر من ما. پێویستیا مە ھەموویان ب وی ھەبوو”.

پەڤچوونێن ترکیێ و پەکەکێ زرارێ دگەهینیت گەلێ ناڤچەیێ

د پەڤچوونێن تەسەکێ و پەکەکێ دا ھەری زێدە گەلێ سڤیل زرارێ دبینیت. د شەری دا هیچ لایەنەک خەما مرۆڤان ناخوەت. دەما کو پەکەکە گەل و گوندیان وەکی مەرتالێن زندی بکار تینیت، ترکیا دودل نابیت کو سڤیلان ئارمانج بکەت.