داخویانییا سه‌یر و بالكێش یا هه‌په‌گێ بۆ گوندێ دێشیشێ
ناڤەندا راگه‌هاندنا هه‌په‌گێ، داخویانییەکا سه‌یر و بالكێش به‌لاڤ كرییه و ل سەر شەهید کرنا سڤیلەکی ب دەستێ سوپایێ ترکیێ هندەک نەرین داینه، هه‌په‌گێ گۆت کو: «ئه‌م دێ حسابێ دگه‌ل وان كه‌سان كه‌ین ئه‌وێن كوردان دكوژن و خوینا شەهید ئیبراهیم حه‌سه‌ن محه‌مه‌د ل عه‌ردی نامینیت».
راستی ئەڤ داخویانی گەلەک سه‌یر و بالكێشه!، ژ بەر کو هه‌گه‌ر هه‌په‌گە راسته دخوازیت رێ ل بەر کوشتنا سڤیلان بگریت، گه‌له‌ك رێ و رێباز هه‌نه وه‌ك:
بلا ئێدی به‌س خه‌لكێ گوندان ژ بۆ خوه بكه‌ته مه‌رتالێن زیندی.
بلا نه‌چیت ل حه‌وشێن مالێن گوندییان تۆنێلان بكۆلیت.
بلا جلكێ خه‌لكێ مه‌ده‌نی ل خوه نه‌كه‌ت.
بلا ترومبێلێن خه‌لكێ مه‌ده‌نی ب كار نه‌ئینیت.
لێ به‌لێ په‌كه‌كه به‌ره‌ڤاژی دكه‌ت و ب هه‌موو ره‌نگان هه‌ول دده‌ت خه‌لكی ته‌ڤلی شه‌ری بكه‌ت، ئه‌ڤه ستراتیجییا په‌كه‌كێ یه، ئانكو ستراتیجییا په‌كه‌كێ ئه‌وه خه‌لك د ناڤ شه‌ری دا بیت و ل پێشییا چه‌كدارێن وان راوه‌ستیت، ژ به‌ر ڤێ رێخستنا په‌كه‌كێ به‌رده‌وام چه‌كدارێن خوه د هنێریته د ناڤا گوندان دا.
په‌كه‌كە ب ڤێ رێبازا خوە بوو ئه‌گه‌رێ ڤالاکرنا 5 هه‌زار گوندان ل باکورێ کوردستانێ، خوه‌بجهكرنا په‌كه‌كێ ل ناڤا گوندان نه ژ بۆ پاراستن و ئەمنییەتا ژن، زارۆک و خه‌لكێ سڤیلە، په‌كه‌كێ چ جاره‌كێ ئەڤ یه‌ك نه‌کرییه ئارمانجا خوە، بەرەڤاژی په‌كه‌كه کوشتنا سڤیلان و زارۆکان تەنێ وەک مژارەکا پرۆپاگاندایی ژ بۆ خوه ب كار دئینیت.
چەند نموونه‌یێن بچووك:
په‌كه‌كێ ل سالا 1992ێ خه‌لك راکره سەرهلدانێ، لێ نه پاراستن، ل باژاران ب ناڤێ کۆنگرێ نەتەوی کۆمیتە چێكرن و پاش كو ئه‌ندامێن كۆنگره‌ی هه‌موو هاتینه كوشتن، تۆلا چ ژ وان ڤه‌نه‌كر.
په‌كه‌كێ هێرشی حزبوللا کر، ئەندامەکێ وان کوشت، پیشترە خوە دا پاش، حزبوللا ل باژێرێن باکور نێزیكی هه‌زار كه‌سان کوشتن.
ل سالا 1994ێ دژمنی گوند ڤالا کرن، ژ بەر کو په‌كه‌كێ گوند کربوونه ناڤەندا خوە، خه‌لك کۆچبەربوون په‌كه‌كێ هاریکارییا یەک كه‌سی نەکر، سیاسەتا خوە یا چوونا ناڤ گوند و مالان و ئاڤاکرنا بریارگه‌هان د گوندان دا ژی چ جاره‌كێ بەرنەدا.
لی قەندیلێ مالێن گوندییان کرینه جهێ جڤینان و ئارمانج بۆ باله‌فرێن تركیێ
میناک ل 1ێ تەباخا 2015ێ لی گوندێ زەرگەلێ ل مالەکێ جەمیل بایک هات هندەک مێهڤان دیتن و پیشترە ژی بالەفرا ترکیێ هات بۆمبه‌باران کر، 8 کەسێن مەدەنی و دو گەریلا تێدا ژیانا خوە ژ دەست دا.
تەنێ د شەرێ خەندەکان دا، په‌كه‌كە چوو د ناڤ باژاران دا خەندەک کۆلان، د 265 رۆژان دا ل 10 ناڤچەیان خەندەک کۆلان و گۆتنه خه‌لكی هەگەر هوون تاخێن خوه به‌رده‌ن، ئه‌م دێ ده‌ستێ خوه دانین سه‌ر مولك و مالێ هه‌وه، خەلک نەچار ما ل مالێن خوه بمینیت، د ئه‌نجامێ دا 285 کەسێن مەدەنی و ب کێمی 3 هزار کەسێن دی کو ملیس و چەکدار بوون هاتنه کوشتن، ل گۆری ئامارێن رەسمی 32% یا خەلکی کۆچبەر بوون.
ئەم د شێین ب هه‌زاران میناکێن ب ڤی ره‌نگی بده‌ین کو په‌كه‌كێ خه‌لك ژ بۆ خوە ب کار ئینایه و قەد جاره‌كێ ژی ل ژیانا وان نەفکرییە.
ئەم هەموو دزانین کو ترک دژمنێ گەلێ مەیە، هەر دائیم ژی دخوازیت کوردان بکوژیت، باشە لێ بۆچی په‌كه‌كه رێ ڤەدکەت كو کورد بهێنه کوشتن؟ ل هەمان دەمێ بۆچی په‌كه‌كە ب خوە کوردان دکوژیت؟ ئەم تێدگه‌هین دژمن بۆچی كوردان دكوژیت، لێ بەلێ یا په‌كه‌كێ نه!!.
هەگەر ئەم بینین بەر هەڤ کوردێن کو په‌كه‌كێ ژ بەر ب کار ئینانا وان وەکە مه‌رتالێن زیندی کوشتینە، و یێن کو ترکیێ کوشتینە، دێ دیار بیت کو په‌كه‌كێ ب قاسی ترکیێ کورد کوشتینە.
هەگەر په‌كه‌كە دبێژیت کو ئەز دێ ژ بۆ کوشتنا کوردان حسابێ دگه‌ل وان كه‌م، بلا ئەول حسابێ دگه‌ل خوه بكه‌ت.
