نووری چەلیک
ئینکارکرنا “نەتەو-دەولەت”بوونا کوردان، دژدەرکەتنا سەرخوەبوونا کوردستانێ، پارازتنا یەکدەولەتبوون و یەکپارچەییا ترکیایێ وەک رێیا قەدەرێ دانانە بەر کوردان و کوردان ب ڤان دەک و دۆلابان دخاپینن، ژ خەتا نەتەوی دوور تێخن.
کەمالیزمێ وەک ئیدەۆلۆژییەک ھەڤبەش د مەژییێ کوردان دا دکۆلن.
ب ڤی ئاوایی دخوازن کوردان ژ خەتا نەتەوی و نەتەوپەروەرییێ سار بکەن و دلێ وان ژێ رەش بکەن.
کوردێن کو ل نەتەوا خوە و سەرخوەبوونا وەلاتێ خوە خوەدی دەردکەڤن ژی ب تۆھمەتێن وەک “نەتەوپەروەرێن پاشڤەروو” ب ناڤ دکەن. ئەڤ تۆھمەتێن سڤک و دووری لۆژیکی ژی ھەلبەت ژ سەرێ کانییێ، ئانکو ژ دەلھیزا دەولەتا ترک دەردکەڤن و چپکێن وان ل کوردان دکەڤن.
ئۆجالان د ھەڤدیتنا ھەری داوین دا ھەدەپە فراند بەر پەرێ ئاسیمانان و کوردێن کو ل دژ دەردکەڤن ژی دیسا مۆھرا “نەتەوپەروەرێن پاشڤەروو” ل وان خست. ل ڤێرە دا گۆتنێن ئۆجالان و کەمال بورکای ھەڤدو تەمام دکەن. واتە، ھەدەپە و پارتیا کەمال بورکای براستی ژی ژ بۆ کو نەتەوپەروەرییا کوردا بهێتە ئاستەنگکرن ھاتنە ئاڤاکرن.
ملەتێ کورد د دیرۆکا خوە دا ھەر فەداکاری کریە. ب مال و جانێ خوە ڤە پشتگری دایە دۆزا خوە، دۆزا کورد و کوردستانێ. لێ چ ھاتبیتە سەرێ ڤی ملەتێ مازلووم، ھەر ب دەستێ سەرۆک و رێڤەبرێن وی ھاتیە سەرێ وێ.
کەسێن کو سەرۆکاتی و رێڤەبرییا ڤی ملەتێ فەداکار کرنە، فەداکاری و دلسۆزییا ملەتێ کورد یان ژ بۆ بەرژەوەندییێن خوە و یان ژی ژ بۆ بەرژەوەندییێن دەولەتێن داگیرکەر ب کار ئانیە.
ژ بەر کو روحا نەتەوی، ئەڤین و ئەڤیندارییا کورد و کوردستانێ لگەل وان دا نەبوو و نینە، ژ بۆی وان ھەر رێیەک حەلالە. ژ بەر ڤێ، کورمێ دارێ ژ دارێ دەردکەڤیت.
کەسێ کو ئەڤیندارێ تشتەکی نەبیت، نەشێت خوە د بەر وێ ئەڤینێ دا فەدا بکەت.
چاوا کو ئۆجالان د نڤیس و ھەڤپەیڤینێن خوە دا دگۆت “بەندە کورد ئاشک یۆکتور – ئەشقا کوردی د من دا نینە” تەمام د ڤێ دەربارێ دا کەمال بورکای ژی د نڤیسینا خوە یا 31/8/2021ێ دا خویاکر و گۆت؛ چ ئەشقا نەتەو- دەولەتێ د من دا نینە. و ئەشق و ئەڤینا کورد و کوردستانێ وەک ئۆجالان د وی و رێڤەبرێن DBP، HDP و HAKPAR ێ دا ژی نینە.
ژ بەر ڤێ ژی، گەلەک ب ھێسانی دشین کەد، خوێدان، خوین و دەرفەتێن کو ب خوینا شەھیدان ھاتنە بدەستخستن، فەدا بکەن و دکەن ژی.
ئیرۆ خوین و خوێدانا شەھیدێن کوردستانێ ژ بۆ کەمال بورکای و یێن وەکو وی ھاتنە فەداکرن.
ژ بۆ دەمۆکراتیک جمھوورییەتا ترکیا، ژ بۆ یەکپارچەیی و یەکرێزییا دەولەتا ترکا ھاتنە فەداکرن.
ھەلبەت کورد ژی نە کوردێن بەرێ نە. ب ھەزاران کوردپەروەر و نەتەوپەروەر د ناڤ رەف و بنگەھا پەکەکێ، دەبەپێ و ھاکپارێ دا ھەنە.
ئەو کوردێن کو ب مال و جانێ خوە، ھەر تشتێن خوە ژ بۆ کوردستانەکا سەربخوە فەدا کریە، دێ ل کەد و خوێدانا خوە ژی خوەدی دەرکەڤن و بێدەنگ نامینن.
بێدەنگ نامینن کو حیزبێن چەقلماست وەک ھاکپار و ھەدەپێ ل سەر خوینا زارۆکێن وان بچەریت. بێدەنگ نامینن و رازی نابن کو دژبەرێن نەتەو-دەولەت ب ڤی رەنگی ب ھێسانی خوینا زارۆکێن وان د تاسا زێرین دا پێشکێشی کەمالیستێن ترک بکەن.
بێدەنگ نامینن کو ھندەک بازرگانێن سیاسی ل سەر پشتا کەچ و خۆرتێن وان بازرگانییا خوینێ بکەن. تام د ڤێ حەساسیێ دا، ئەز ژ کەمال بورکای دپرسم؛
ئۆجالان ب ئێریش کرنا نەتەوپەروەرا، ئانکو ملیەتچیا ئەرکێ خوە ئەنجام ددەت؛ گەلۆ یا تو دکەی چیە؟
نێزیک لێ نە دوور، ھەلبەت دێ ل دژی ڤێ کمباخیا هەوە دەنگ ژ کوردێن فەداکار و خوەدی غیرەت دەرکەڤیت.
