د ڤان رۆژێن داوی دا دو بوویەرێن گەلەک گرنگ ھەنە و ب پەکەکێ ڤە گرێدایی نە. دڤێت ئەم ڤان ھەردو بوویەران بیننە سەر زمان و ئانالیزە بکەین. ھەلوەستی ل ھەمبەری ڤان بوویەران دیار بکەین. د دەربارێ ڤان دو بوویەران دا ژی پەکەکێ تەشهیر و شەرمەزار بکەین.
پەکەکێ رۆژا کو وەک پرۆژەیەکێ ئاڤا بووی و ھەتا ئیرۆ، خرابی، شەرفرۆشی، ئیستیفزازا خوە ل ھەمبەری تەڤگەرا نەتەوەیی یا کوردستانێ، ل ھەمبەری دیرۆک و چاندا نەتەوەیا کورد، ل دژی گەلێ کورد، ل دژی رێخستنێن کوردستانێ بەردەوام دکەت.
خرابی، شەرفرۆشی، ئیستیفزاز، ئێریشێن پەکەکێ د دەستپێکا ئاڤاکرنا وێ دا ل باکورێ کوردستانێ، د قۆناغا دویەمین دا ل باشوورێ کوردستانێ و رۆژئاڤایێ کوردستانێ، د قۆناغا سێیەمین دا ژی ل رۆژھەلاتا کوردستانێ بەردەوام کر.
ب تایبەتی ژی پشتی کو ل باشوورێ کوردستانێ کوردان سەروەری قازانج کر و بوونە دەستھلاتدار، مافێن خوەیێن نەتەوەیی قازانج کرن؛ ستاتویا فەدەرە/فەدەرال ئاڤا بوو، دژمناتی و شەرێ پەکەکێ ل ھەمبەر باشوورێ کوردستانێ خورتتر بوو.
د شەرێ پەکەکێ دا، ب ھەزاران پێشمەرگە و جوانێن کوردستانێ ھاتنە کوشتن.
د ئێریشێن پەکەکێ دا ب ھەزاران وەلاتپارێز ھاتنە کوشتن. پەکەکێ بەس د ناڤ خوە دا 17،000 کوردپەروەر کوشتن.
پەکەکێ ل کو دژمنەکی کوردان و کوردستانیان و کوردستانێ و نەتەوەیا کورد ھەبیت، دچیت د گەل وان رێکەفتنێ دکەت، ل سەر ناڤێ وان شەرێ ب وەکالەت دمەشینیت.
ل باکورێ کوردستانێ بوو سەدەما تەسفیەیا تەڤگەرا نەتەوەیی و رێخستنێن کوردستانێ.
ل رۆژئاڤایێ کوردستانێ ژی تەخریب کریە، دیکتاتۆری ئاڤا کریە، زولم و زۆرداریا ل گەلێ مە و ل کوردپەروەران دکەت، ب سالانە کو دهێتە نڤیساندن.
د ڤان رۆژێن داوی دا بەرپرسیارێن پەکەکێ ب رێیا مەدیایا خوە ل ھەمبەر پەدەکێ شەرەکێ ب رێڤە دبەن. درەو و مانیپولاسیۆنا تینن سەر زمان. پەکەکێ ب درەو و مانیپولاسیۆنێن خوە، کوردان دکەنە دژمنێ کوردان. بەرپرسێن پەکەکێ د داخویانیێن خوە دا دبێژن کو، “پەدەکە د ناڤا خیانەتێ دایە و شەرێ ل دژێ پەدەکێ ئێدی نابیتە شەرێ براکوژی.” واتە دبێژن کو ژ بۆنا پەدەکێ ژ ناڤ ببەن، دێ شەری کەن.
د ھەمان دەم دا گەلەک ئالیگرێن پەکەکێ د مەدیا جڤاکی دا ئاشکەرا ددەنە خویاکرن کو ت پەکەکە دەست ژ شەرێ ل گەل ترکیا بەردەت و دەستپێکی پەدەکێ ژ ھۆلێ راکەت. لەورا ژ بۆنا کو دەولەتا فەدەرەیا کوردستانێ ژ ھۆلێ راکەن، دژمناتیا پەدەکێ دکەن.
ئەو ستراتەژیا وێ، یا دەستپێکێ یە، وەک دەما ھاتیە ئاڤاکرنە. وەک دهێتە زانین پەکەکێ د مانیفەستۆیا خوەیا دامەزراندنێ دا بەریا دەولەتا کۆلۆنیالیستیا ترک، گەلێ کورد و رێخستن و پارتیێن کوردستانێ دژمن قەبوول کر. گۆر وێ ستراتەژیێ ل ھەمبەری رێخستن و پارتیێن کوردستانێ شەر کر. ئەو شەرێ وان بەریا سالا 1980یێ ل ھەمبەری کوکێ ھاتە ئاستەکێ بلند. ب سەدان کوردپەروەر ھاتنە کووشتن.
پەکەکێ زێدەتر ژ بێدەنگیا رێخستن و پارتیێن کوردستانێ قازانج کر. د ڤێ قۆناغێ دا ژی، ژ ڤێ یەکێ قازانجێ دکەت. رێخستن و پارتیێن باشورێ کوردستانێ دەنگێن خوە ل ھەمبەری شەرفرۆشی و خرابیا پەکەکێ یێن ل ھەمبەری پەدەکێ و دەولەتا فەدەرەیا کوردستان، بلند ناکەن.
ئەز د باوەریێ دا مە کو گەلەک حیزب و رێخستن ژی، ژ بۆ کو پەدەکێ زرارێ ببینیت و دەستھلاتداریێ ژ دەست بدەت، پشتگریا پەکەکێ دکەن.
لێ دڤێت باش بهێتە زانین کو شەر راگەهاندنا پەکەکێ ل دژی پەدەکێ، نە بەس ل ھەمبەری پەدەکێ یە. ئەڤ شەرێ وان ل دژی سەرخوەبوون و فەدەرالیزما کوردستانێ یە. لەوما ھەموو رێخستن و پارتیێن باشوورێ کوردستانێ یێن کو ژ فەدەرالیزمێ خوەدی دەردکەڤن، دڤێت ل دژی پەکەکێ ھەلوەستا خوە ڤەکری دیار بکەن.
دڤێت باش بهێتە زانیین کو ئارمانج و ستراتەژیا پەکەکێ ماکسیمالە. پەکەکە دخوازیت کو پێشیا پێڤاژۆیا دەولەتبوونا کوردستانێ بگریت و فەدەرالیزمێ ژی تێک ببەت.
دڤێت کورد مولەتێ نەدەن ڤێ خرابیا پەکەکێ. ل دژی پەکەکێ ب خوورتی شەری بکەن و دژایەتیێ بکەن.
ل رۆژاڤایێ کوردستانێ زولمەکا مەزن بەردەوام دکەت. دیکتاتۆریەتا پەکەکێ/پەیەدێ ناھێلیت کو رێخستنێن کوردستانێ خەباتێن خوە یێن سیاسی و رێخستنی بمەشینن. ل وێرێ ژی کوردان درەڤینن ئێشکەنجە دکەن و دکوژن. سیاسیان دگرن حەپس دکەن، ئێشکەنجە دکەن و دکوژن.
دڤێت پەکەکە ژ باشوورێ کوردستانێ بهێتە دەرخستن و سیستەما وێ ل رۆژئاڤایێ کوردستانێ بهێتە رووخاندن.…
وەزیفەیا مەزن ل سەر پشتا حکوومەتا فەدەرال یا ئیراقێ و حکوومەتا ھەرێمی یا کوردستانێ و مەجلیسا کوردستانێ، رێخستن و پارتیێن کوردستانێ یە.
پرس و خەتەریا پەکەکێ ل باشورێ کوردستانێ ب داخویانیان چارەسەر نابیت. پەکەکێ ل باشوورێ کوردستانێ رێخستنەکا بیانی، داگیرکەر، ئاژاوەگێر و تەرۆریستە. دڤێت کو ژ کوردستانێ بهێتە دەرکرن.
ل رۆژاڤایێ کوردسترانێ ژی سیستەما وان یا فاشیست و تۆتالیتار بهێتە رووخاندن.
پەکەکە دخوازیت کو کوردان ژناڤ ببەت و کوردستانێ ڤالا بکەت. کوردستانێ بکەتە وەلاتێ کۆلۆنیالیستان.
پەکەکێ گەلەک ئاشکەرا گرێدایی ڤێ ستراتەژیێ عەفرین تەسلیمی دەولەتا ترک کر، پشت را ژی عەفرین ڤالا کر و عەفرینی د کامپێن خوە دا مەحکوومی برچیبوونێ و زولمێ کرن. ل سەر وان دەستھلاتداریەکا فاشیست و تۆتالیتار چێکر.
نھا ژی مالباتێن عەفرینی ژ بۆ کو ل گوندێ خوە ئازاد بژین و چاندنێ بکەن و ژیانەکا خوەش دەرباس بکەن؛ ژ زولما پەکەکێ یا فاشیست و تۆتالیتار خەلاس ببن، ڤەدگەرنە عەفرینێ.
پەکەکێ ژ بۆ کو دەستھلاتداریا خوەیا فاشیست و تۆتالیتار ل سەر عەفرینیان بەردەوام بکەت ل دژی ڤێ ڤەگەرێ دەردکەڤیت.
