نیشانا سۆر یا په‌كه‌كێ و گایێ ئیسپانی
ژ پاش سه‌ره‌دانا ئه‌مانوێل ماكرۆن بۆ كوردستانێ، په‌كه‌كێ مه‌دیایا خوه ل دژی «حكوومه‌تا باشوور، په‌ده‌كێ و پێشمه‌رگه‌هان» سێرڤس كرییه، ئه‌ڤه نه‌تشته‌ك نوویه، ژ خوه رێخستن ژبلی خاپاندنێ و د‌ره‌وان، ژ چ كه‌سابه‌ته‌كا دی فێم ناكه‌ت.
دوران كالكان رێڤه‌به‌رێ په‌كه‌كێ یێ ب كۆد ناڤێ «عه‌باس» كو وه‌زیرێ چاپه‌مه‌نییا په‌كه‌كێ یه، تشته‌ك بێی وی ناهێته به‌لاڤكرن، كالكانێ كو هێژ نزانیت دو په‌یڤان ب كوردی نه بئاخڤیت و نه‌ژی بنڤیسیت، رێخستنێ ئه‌و بۆ شه‌رێ مه‌دیایی یێ ل دژی كوردستانێ ئه‌ركدار كرییه، كالكان ترك، ب مه‌ژیكێ خوه یێ كه‌مالیست، هه‌ر تشتێ ل دژی كوردستانێ و پیرۆزیێن وێ به‌لاڤدكه‌ت، یا راست وی گلۆپا كه‌سك یا هاڤێتنا ژه‌هرێ بۆ كادرێن مه‌دیایا په‌كه‌كێ هه‌لكرییه.
په‌كه‌كه ل پشت ڤی شه‌رێ قرێژ چ ئیشاره‌ت دده‌ته تركیێ؟
هه‌ر كورده‌كێ ب وژدان دزانیت مه‌یدانا خه‌باتا په‌كه‌كێ كو ده‌رێ یه، دزانیت په‌كه‌كێ باكور بۆ تركیێ هێلایه و ئه‌ڤرۆ دخوازیت باشوور و رۆژئاڤا ژی ب وی ده‌ردی ببه‌ت، «به‌رخوه‌دانا ساخته» یا په‌كه‌كێ ل باشوور زه‌لالترین به‌لگه‌یه ل سه‌ر ڤێ ئاخفتنێ، هه‌گه‌ر ب لۆژیك نرخاندن بۆ ڤێ به‌رخوه‌دانێ بهێته كرن، دێ ب زه‌لالی دیار بیت كو چه‌ند پاشتره په‌كه‌كه پتر نێزیكی گوند و باژارۆكان دبیت و سوپایێ تركیێ ژی پتر به‌ر ب كووراهییا باشوور ڤه دهێت.
به‌رخوه‌دانا «گرووپا ئه‌نقه‌رێ» قالا وێ دكه‌ت، ب ده‌ست ڤه به‌ردانا یێك ب یێك یا ناڤچه‌یێن باشووره بۆ تركیێ، خاكورك، شه‌كیف، حه‌فته‌نین، خه‌تا سنۆر و ب ده‌هان ناڤچه‌یێن كو ب سالانه د ده‌ست په‌كه‌كێ دا، ئه‌ڤرۆ ئالایێ داگیركه‌ران لێ به‌رزه، په‌كه‌كه ژی هاتییه د گوندان دا و جلێن سڤیلان ل چه‌كدارێن خوه كرینه و خه‌لكێ گوندان وه‌ك مه‌رتال بۆ خوه ب كار دئینیت، ب گۆتنه‌كا دی، هه‌گه‌ر مرۆڤ ڤێ پرسێ بكه‌ت، ئه‌رێ د 5 سالێن ده‌رباسبوویی دا چ ئه‌نجامه‌ك ژ به‌رخوه‌دانا په‌كه‌كێ یا ل باشوور هاتییه؟ ژبلی ره‌ڤێ، شه‌هیدكرنا پێشمه‌رگه‌هان، ره‌ڤاندنا زارۆكان، ستاندنا باجێ، تجاره‌تا هشبه‌رێ و كحۆلی و كوشتنا گه‌نجێن باشوور ب توهمه‌تا سیخۆریێ، چاندنا TNT یان ل سه‌ر رێیا پێشمه‌رگه‌هان، چ ئه‌جامه‌كێ دی نینه، ئه‌ڤه راستییه‌كه ناهێته په‌چنین، هه‌ر نرخاندنه‌كا ب وژدان بۆ ڤێ به‌رخوه‌دانێ، دێ ب زه‌لالی دیار بیت كو ئه‌ڤ نه به‌رخوه‌دانه به‌لكو راكیشانا تركیێ یه بۆ باشوور.
نیشانا سۆر یا په‌كه‌كێ و گایێ ئیسپانی!
ئیسپانیا ب جوره‌كێ ناڤ و ده‌نگ یێ سپۆرێ تێ ناس كرن ئه‌و ژی «Bullfighting»، ب كورتی كه‌سه‌كێ په‌هله‌وان نیشانا سۆر بۆ گایێ هار بلند دكه‌ت، گایێ هار ژی ب هه‌موو هێز و شیانێن خوه هێرشی نیشانێ دكه‌ت، ئه‌رێ هه‌گه‌ر مرۆڤ ل به‌رخوه‌دانا په‌كه‌كێ بنێریت، مانه عه‌ینی تشته؟ چاوا؟ سه‌برێ بكێشن به‌رسڤ ل ده‌ڤ مه‌یه.
هه‌ر ده‌را په‌كه‌كه بچیتێ، ب ئالا، سلۆگان، وێنه و پانكارتێن ئاپۆ پڕ دبیت، د مه‌دیایێ دا وان دیمه‌نان به‌لاڤدكه‌ت، ئه‌ڤ یه‌ك نیشانا رێخستنێ یه بۆ تركیێ!، په‌كه‌كه ب ڤی ره‌نگی تركیێ كێشی ناڤچه‌یێن كوردستانێ دكه‌ت، ل سالێن نۆتێ مام جه‌لال ره‌حمه‌تا خودێ لێ بیت باس ل ڤێ ته‌كتیكا په‌كه‌كێ و خه‌ته‌رییا وێ ل سه‌ر باشوور كربوو.
د گه‌ل ده‌ستپێكا شه‌رێ سووریێ، ده‌رفه‌ته‌كا زێڕین بۆ رۆژئاڤا چێبوو كو سه‌رده‌ست ببن، لێ هه‌ر زوو په‌كه‌كه هاته رۆژئاڤا و «ته‌كتیكا نیشانا سۆر» جێبه‌جێ كر، رۆژئاڤا پڕی وێنه‌یێن ئاپۆ كر و ب دارێ زۆرێ ئه‌و وێنه ب ژن و پیران دانه بلند كرن، ئه‌ڤه چه‌نده ئێك ژ ئه‌گه‌رێن داگیركرنا تركیێ بوو بۆ رۆژئاڤا، په‌كه‌كێ د ناڤبه‌را 3 رۆژان دا عه‌فرین، گرێ سپی و سه‌رێ كانیێ بۆ تركیێ هێلان و بازدا.
نها په‌كه‌كه عه‌ینی تشت دكه‌ت، هه‌تا ئه‌ڤرۆ ل باژار و باژارۆكێن مایی یێن رۆژئاڤا، وێنه‌یێن ئاپۆ بلند دكه‌ت و وان دیمه‌نان د مه‌دیایێ دا ده‌ردئێخیت، دربێسیێ به‌ری دو رۆژان ژ 3 ئه‌نییان ڤه ژ ئالیێ سوپایێ داگیركه‌ر ڤه هاته تۆپباران كرن، لێ ئه‌ڤرۆ په‌كه‌كێ كۆمه‌ك وه‌لاتیێن دربێسیێ كو پرانی ژێ پیر، ژن و زارۆك بوون، وێنه‌یێن ئاپۆ كرنه د ده‌ستان دا و ب دارێ زۆرێ مه‌ش ب وان ئه‌نجام دا.
تشتێ عه‌جێب، په‌كه‌كێ سلۆگانێن شه‌رمه‌زار كرنا په‌ده‌كێ ب زمانێ وان زارۆكان ددا گۆتن، پرس ل ڤێرێ ئه‌ڤه‌یه، ئه‌رێ قه‌ی په‌ده‌كه بوو دربێسیێ تۆپباران كری؟ قه‌ی په‌ده‌كه بوو ژ عه‌فرینێ، گرێ سپی و سه‌رێ كانیێ بازدای؟.
ژ خوه زارۆكێن كوردان ژی دزانن دییا كێ تركه!
به‌رخوه‌دانا په‌كه‌كێ خاپاندنا گه‌له و فه‌رز كرنا ستراتیجییا ئاپۆ یا ب ناڤێ «براتییا گه‌لانه» ، ستراتیجییا كو چ گرێدانه‌كا وێ ب كورد و كوردستانێ ڤه نینه، په‌كه‌كه دخوازیت گه‌لێ رۆژئاڤا ژ دۆزا وان دوور بێخیت و خاكا وان ب ئاوایه‌كی سیستماتیك ته‌سلیمی تركیێ بكه‌ت، رێخستنێ زۆرا داگیركه‌ری ژبیرا رۆژئاڤاییان برییه و بانگا وان بۆ دژاتییا باشوور و په‌ده‌كێ دكه‌ت، په‌كه‌كه دفكریت كوردێن رۆژئاڤا دێ ب ڤان د‌ره‌وێن وێ هێنه خاپاندن، گه‌لێ رۆژئاڤا باش ژ به‌رخوه‌دانا په‌كه‌كێ و به‌رخوه‌دانا رێبه‌رێ وان فێم دكه‌ت، زارۆكێن رۆژئاڤا ژی دزانن كو په‌كه‌كه 37 ساله شه‌رێ چه‌كداری دكه‌ت، لێ هێژ یه‌ك مه‌ترا خاكا كوردستانێ رزگار نه‌كرییه، به‌رخوه‌دانا وێ یا ساخته ژ مێژ‌یه بۆ كوردێن هه‌ر چار په‌رچه‌یان ئیفشا بوویه، عه‌ینی تشت به‌رخوه‌دانا ئاپۆ.
مامێ «عه‌باس» زارۆكێن كوردان ژی نها دزانن زكمه‌زنێ ئیمرالیێ چ قاس روو قاییم و سه‌ر شۆڕ بوو وه‌ختا گۆتی: «دییا من تركه، ژ تركیێ حه‌ز دكم، هوون ده‌رفه‌تێ بدن، ئه‌زێ خزمه‌تا ده‌وله‌تێ بكم»، گه‌ل فامایه، دزانیت كیژان پارتی وه‌لاتپارێز و نه‌ته‌وی یه و كیژان دژه كورده، وه‌كه چاوا دزانیت كانێ «دییا كێ» تركه!!.
